“ລາຍລະອຽດ ແລະ ຄວາມຮູ້ພື້ນຖານ ຂອງ ຄະນະ ນິຕິສາດ-ລັດຖະສາດ.”
ວິໃສ່ທັດ ແລະ ຄຳຂວັນ
ສ້າງໃຫ້ ຄນລ ກາຍເປັນສະຖາບັນການສຶກສາທີ່ມີຄຸນນະພາບ ແລະ ນຳໜ້າໃນການກໍ່ສ້າງບຸກຄະລາກອນທີ່ມີຄວາມຮູ້, ຄວາມສາມາດ, ມີວິຊາສະເພາະທີ່ແນ່ນອນ, ມີຄຸນສົມບັດສິນທຳປະຕິວັດ ເພື່ອປະກອບສ່ວນໃນການປົກປັກຮັກສາ, ສ້າງສາພັດທະນາປະເທດຊາດ ແລະ ການສ້າງລັດແຫ່ງກົດໝາຍເທື່ອລະກ້າວ.
ສ້າງໃຫ້ ຄນລ ເປັນແບບຢ່າງໃນການປະຕິບັດລະບຽບກົດໝາຍຕາມຄຳຂວັນທີ່ວ່າ:
ເສີມສ້າງຄວາມຮູ້ ເຊີດຊູຄວາມຍຸຕິທຳ
ຄຽງຄູ່ຈັນຍາບັນ ຍຶດໝັ້ນລະບຽບວິໄນ
ຄົ້ນຄິດຜົນງານວິໄຈ ກ້າວໄປສູ່ລັດແຫ່ງກົດໝາຍ.
ທີ່ຕັ້ງ
ຄະນະນິຕິສາດ ແລະ ລັດຖະສາດ ເອີ້ນຫຍໍ້ວ່າ ຄນລ, ໃນເມື່ອກ່ອນເອີ້ນວ່າໂຮງຮຽນກົດໝາຍເຊິ່ງຂຶ້ນກັບກະຊວງຍຸຕິທໍາ ໄດ້ຮັບການສ້າງຕັ້ງຂຶ້ນໃນວັນທີ 23 ມີນາ 1986, ຕໍ່ມາໄດ້ຖືກໂອນເຂົ້າເປັນຄະນະວິຊາໜຶ່ງຂອງມະຫາວິທະຍາໄລແຫ່ງຊາດໃນປີ 1997, ມີສຳນັກງານຕັ້ງຢູ່ ບ້ານດອນນົກຂຸ້ມ, ເມືອງສີສັດຕະນາກ, ນະຄອນຫຼວງວຽງຈັນ ຫຼື ວິທະຍາເຂດດອນນົກຂຸ້ມ.
ພາລະບົດບາດ
ພາລະບົດບາດຫຼັກຂອງ ຄນລ ແມ່ນກໍ່ສ້າງນັກວິຊາການທາງດ້ານ ກົດໝາຍ, ລັດຖະສາດ ແລະ ການພົວພັນສາກົນ, ທັງລະດັບປະລີນຍາຕີ ແລະ ຫຼັງປະລີນຍາຕີ ເພື່ອຕອບສະໜອງບຸກຄະລາກອນໃຫ້ພຽງພໍກັບຄວາມຮຽກຮ້ອງຕ້ອງການຂອງສັງຄົມທາງດ້ານປະລິມານ ແລະ ຄຸນນະພາບ, ປະກອບສ່ວນເຂົ້າໃນການພັດທະນາເສດຖະກິດ ແລະ ສັງຄົມ,ສ້າງພື້ນຖານໃຫ້ແກ່ການສ້າງລັດແຫ່ງກົດໝາຍ ໃຫ້ນັບມື້ນັບເຂັ້ມແຂງຂື້ນເທື່ອລະກ້າວ.
