ໜ່ວຍພັກພະແນກການ ຄນລ ໄດ້ຈັດກອງປະຊຸມເຊື່ອມຊຶມ, ເຜີຍແຜ່ເອກະສານວຽກງານກວດກາ

ໃນວັນທີ 6 ສິງຫາ 2021 ຜ່ານມານີ້, ໜ່ວຍພັກພະແນກການ ຄະນະນິຕິສາດ ແລະ ລັດຖະສາດ(ຄນລ)  ໄດ້ຈັດກອງປະຊຸມເຊື່ອມຊຶມ, ເຜີຍແຜ່ເອກະສານວຽກງານກວດກາ ຂຶ້ນທີ່ຫ້ອງປະຊຸມ ຜ່ານທາງອອນລາຍ ດ້ວຍ  Google Meet  ລະບົບເຄືອຂ່າຍອິນເຕີເນັດ ຄນລ , ໂດຍການເປັນປະທານ ແລະໃຫ້ກຽດເຜີຍແຜ່ເອກະສານຂອງ ສະຫາຍ ນາງ. ປທ. ທັດສະນາລອນ ສີສຸນ໌ນ ເລຂາໜ່ວຍພັກພະແນກການ ຄນລ, ມີບັດສະຫາຍຮອງເລຂາໜ່ວຍພັກ, ພ້ອມດ້ວຍສະມາຊິກພັກສົມບູນ-ສໍາຮອງຂອງ ໜ່ວຍພັກ ພະແນກການ ຄນລ  ເຂົ້້າຮ່ວມ.
          ໃນທີ່ປະຊຸມ, ໄດ້ຮັບຟັງການເຜີຍແຜ່ເອກະສານ ຈໍານວນ 3 ສະບັບຄື: 1) ບົດໂອ້ລົມຂອງສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ປະທານອົງການກວດກາລັດຖະບານ ແລະອົງການຕ້ານການສໍ້ລາດບັງຫຼວງຂັ້ນສູນກາງຕໍ່ກອງປະຊຸມວຽກງານກວດກາທົ່ວປະເທດ ປະຈໍາປີ 2020 ແລະ 5 ປີ (2016-2020) ຄັ້ງວັນທີ 29 ມັງກອນ 2021; 2) ບົດສະຫຼຸບຫຍໍ້ ການເຄື່ອນໄຫວວຽກງານກວດກາ 5 ປີ (2016-2020) ແລະປີ 2020; 3) ບົດສະຫຼຸບການເຄື່ອນໄຫວວຽກງານກວດກາ 5 ປີ (2016-2020), ປີ 2020 ແລະທິດທາງແຜນການປີ 2021 ຂອງຄະນະພັກກະຊວງສຶກສາທິການ ແລະກີລາ

ພ້ອມດຽວກັນ, ບັນດາໜ່ວຍພັກຕ່າງໆພາຍໃນ ຄນລ  ກໍໄດ້ຈັດກອງປະຊຸມເຊື່ອມຊຶມ, ເຜີຍແຜ່ເອກະສານວຽກງານກວດກາໃຫ້ບັນດາສະມາຊິກພັກຂອງຕົນເຊັ່ນກັນ.