ພາກວິຊາພົວພັນສາກົນຈັດບັນຍາຍພິເສດກ່ຽວກັບການແກ້ໄຂຂໍ້ຂັດແຍ້ງສາກົນ

ພາກວິຊາພົວພັນສາກົນຈັດບັນຍາຍພິເສດກ່ຽວກັບການແກ້ໄຂຂໍ້ຂັດແຍ້ງສາກົນວັນທີ 26 ມີນາ 2019, ພາກວິຊາພົວພັນສາກົນໄດ້ຈັດບັນຍາຍພິເສດ ໃນຫົວຂໍ້ແນວທາງການຕ່າງປະເທດຂອງ ສປປ ລາວ ໃນການລະງັບຂໍ້ພິພາດໂດຍສັນຕິວິທີ ໂດຍແມ່ນ ທ່ານ ໄຊຍະການ ສີສຸວົງ, ອະດີດເອກອັກຄະລັດຖະທູດແຫ່ງ ສປປ ລາວ ປະຈໍາຣາຊະອານະຈັກອັງກິດ, ອະດີດຮອງເລຂາທິການອາຊຽນຄົນທຳອິດຂອງ ສປປ ລາວ ໄດ້ໃຫ້ກຽດມາເປັນວິທະຍາກອນໃນຄັ້ງນີ້. ໃນງານ, ທ່ານ ອາຈານ ບຸນຄົງ ເພັດດາວຮຸ່ງ ຫົວໜ້າພາກວິຊາພົວພັນສາກົນ ໄດ້ຂຶ້ນກ່າວຕ້ອນຮັບ ແລະ ຂອບໃຈມາຍັງທ່ານເອກອັກຄະລັດຖະທູດ ທີ່ໄດ້ສະຫຼະເວລາອັນມີຄ່າເພື່ອມາບັນຍາຍໃນຄັ້ງນີ້ ໂດຍສະເພາະໃຫ້ແກ່ນັກສຶກສາ ປີ 3 ພາກວິຊາພົວພັນສາກົນໃນລາຍວິຊາການແກ້ໄຂຂໍ້ຂັດແຍ້ງສາກົນ (ມີນັກສຶກສາປີ 2 ຈໍານວນໜຶ່ງກໍ່ເຂົ້າຮ່ວມ)ລວມທັງໝົດກວ່າ80ຄົນ.

ໃນຊ່ວງທຳອິດ ທ່ານ ເອກອັກຄະລັດຖະທູດ ໄຊຍະການ ໄດ້ລົງເລິກເຖິງສະພາບການຂອງການຮ່ວມມືໃນອາຊຽນຕັ້ງແຕ່ໄລຍະທີ່ ສປປ ລາວ ເລີ່ມເຂົ້າເປັນສະມາຊິກຜ່ານປະສົບການເຮັດວຽກທີ່ຍາວນານກວ່າ 40 ປີ ລວມທັງສະພາບການເມືອງ-ຄວາມໝັ້ນຄົງໃນພາກພື້ນ ໃນໄລຍະທີ່ທ່ານດໍາລົງຕໍາແໜ່ງຮອງເລຂາທິການອາຊຽນ. ໃນຊ່ວງທີສອງນັ້ນ ທ່ານຍັງໄດ້ຍົກບັນຫາໃນພາກພື້ນເອີຣົບ ແລະ ສາກົນ ໂດຍສະເພາະແມ່ນແນວທາງການຕ່າງປະເທດຂອງອັງກິດ ແລະ ຄວາມສໍາພັນທາງການທູດກັບ ສປປ ລາວ, ເຊິ່ງບົດຮຽນທີ່ທ່ານໄດ້ມາແບ່ງປັນນີ້ແມ່ນກາຍເປັນອົງຄວາມຮູ້ອັນສໍາຄັນແກ່ນັກສຶກສາທີ່ຕ້ອງການເຮັດວຽກໃນຂະແໜງການຕ່າງປະເທດໃນອະນາຄົດ.ພາຍຫຼັງການບັນຍາຍ, ທ່ານ ເອກອັກຄະລັດຖະທູດ ໄຊຍະການ ກໍ່ໄດ້ເປີດເວທີໃຫ້ນັກສຶກສາໄດ້ຕັ້ງຄໍາຖາມ ແລະ ໃຫ້ກຽດຖ່າຍຮູບລວມກັບນັກສຶກສາ ໂດຍການມາຢ້ຽມຢາມ ຄນລ ໃນຄັ້ງນີ້ຖືເປັນຄັ້ງທຳອິດຂອງທ່ານ ເຊິ່ງພວກເຮົາກໍ່ຫວັງເປັນຢ່າງຍິ່ງວ່າຈະມີໂອກາດໄດ້ແລກປ່ຽນບົດຮຽນກັບທ່ານອີກຄັ້ງໃນອະນາຄົດ.
ຮູບພາບໂດຍ: ໄຊຍະສອນ ອິນທິສາລາດ

ແຫລ່ງທີ່ມາຂໍ້ມູນ : IR Students’ Group