ຄນລ ຈັດພິທີມອບ-ຮັບຫ້ອງເຝິກອົບຮົມ

 ໃນຕອນບ່າຍວັນທີ 12 ກຸມພາ 2020 ນີ້, ຄະນະນິຕິສາດ ແລະລັດຖະສາດ(ຄນລ) ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີມອບ-ຮັບຫ້ອງເຝິກອົບຮົມຂຶ້ນທີ່ ຄະນະຂອງຕົນ. ໂດຍການເປັນກຽດເຂົ້າຮ່ວມຂອງທ່ານ ສຈ. ປອ. ສົມສີ ຍໍພັນໄຊ ອະທິການບໍດີ ມຊ, ທ່ານ ແຊມ ເຊເຣນເນີ(Sam Schreiner) ອຸປະທູດແຫ່ງຣາຊະອານາຈັກລຸກຊຳບວກ ປະຈຳ ສປປ ລາວ, ທ່ານຜູ້ຕາງໜ້າໂຄງການອົງການລຸກຊຳບວກ, ທ່ານຫົວໜ້າທີ່ປຶກສາໂຄງການພັດທະນາ ລຸກຊຳບວກ ລາວ/031, ມີທ່ານ ຮສ. ວຽງວິໄລ ທ່ຽງຈັນໄຊ ຄະນະບໍດີ ຄນລ, ມີບັນດາທ່ານຄະນະບໍດີ, ຮອງຄະນະບໍດີ, ຄະນະບໍລິຫານໂຄງການ, ຫົວໜ້າຫ້ອງການ, ຫົວໜ້າພາກວິຊາ, ຫົວໜ້າພະແນກ ພ້ອມດ້ວຍແຂກທີ່ຖືກເຊີນເຂົ້າຮ່ວມ.

          ໃນພິທີທ່ານ ຮສ. ວຽງວິໄລ ທ່ຽງຈັນໄຊ ຄະນະບໍດີ ຄນລ ໄດ້ໃຫ້ຮູ້ວ່າ: ໂຄງການລຸກຊໍາບວກໄດ້ໃຫ້ການພັດທະນາ ຄນລ ເປັນໄລຍະທີ 2 ເຊິ່ງໄລຍະທີ I ແມ່ນເລີ່ມຈັດຕັ້ງປະຕິບັດ ມາແຕ່ປີ 2010 ມີຊື່ວ່າ: LAO/023; ສ່ວນໄລຍະທີ II ເລີ່ມຈັດຕັ້ງປະຕິບັດມາແຕ່ປີ 2017 ຫາປີ 2022, ໂຄງການດັ່ງກ່າວນີ້ໄດ້ເນັ້ນການຊ່ວຍເຫຼືອດ້ານການສິດສອນ ແລະເຝິກອົບຮົມກົດໝາຍ ແລະ “  Promotion of the Rule of Law Concept in Lao PDR or LAO/031” ; ລວມໄລຍະເວລາ 5 ປີ. ໂຄງການດັ່ງກ່າວແມ່ນມີສອງເປົ້າໝາຍຄື: ເປົ້າໝາຍທີ 1 (SO1) ສ້າງສິ່ງແວດລ້ອມ ທີ່ອໍານວຍຄວາມສະດວກໃຫ້ແກ່ການເຂົ້າເຖິງລະບົບຍຸຕິທໍາ ແລະເປົ້າໝາຍທີ່ 2 (SO2) ສືບຕໍ່ສົ່ງເສີມການສຶກສາ ແລະການເຝິກອົມຮົມ ເພື່ອການພັດທະນາຂະແໜງການສຶກສາກົດໝາຍ (ກໍຄື ຄນລ ມະຫາວິທະຍາໄລແຫ່ງຊາດ ແລະ ຄນລ ມະຫາວິທະຍາໄລຈຳປາສັກ).

          ໃນປີຜ່ານມາໂຄງການລາວ/031 ແມ່ນໄດ້ປະສົບຜົນສໍາເລັດໃນການຈັດຕັ້ງປະຕິບັດກິດຈະກໍາຫຼາຍໆດ້ານ ໂດຍສະເພາະແມ່ນການສະໜັບ ສະໜູນ ທາງດ້ານບຸກຄະລາກອນ ແລະສະຖາບັນຂອງ ຄນລ, ມຊ  ເພື່ອປັບປຸງອໍານວຍຄວາມສະດວກໃຫ້ແກ່ ຄນລ ທາງໂຄງການຈິ່ງເຫັນຄວາມສໍາຄັນໃນການປັບປຸງຫ້ອງເຝິກອົບຮົມ ເຊິ່ງໃນເມື່ອກ່ອນເປັນຫ້ອງປະຊຸມລັກສະນະທຳມະດາ ຄ້າຍຄືຫ້ອງຮຽນ ແຕ່ໂຄງການໄດ້ໃຫ້ທຶນປັບປຸງຄື: ເພດານ, ເຄື່ອງສຽງ, ໂຕະ-ຕັ້ງ ແລະອຸປະກອນທັນສະໄໝ ເຊິ່ງແບ່ງອອກເປັນ 2 ຫ້ອງຄື: ຫ້ອງປະຊຸມນ້ອຍ 1 ຫ້ອງ ແລະຫ້ອງປະຊຸມໃຫຍ່ 1 ຫ້ອງ. ລວມມູນຄ່າການປັບປຸງທັງໝົດ ຈໍານວນ 455,701,000 ກີບ.(ສີ່ຮ້ອຍຫ້າສິບຫ້າລ້ານເຈັດແສນນຶ່ງພັນກີບ) ການປັບປຸງແມ່ນເລີ່ມມາແຕ່ເດືອນຕຸລາ ປີ 2019 ແລະສໍາເລັດໃນເດືອນມັງກອນ 2020.

           ໃນໂອກາດນີ້ ທ່ານ ສຈ. ປອ. ສົມສີ ຍໍພັນໄຊ ໄດ້ກ່າວສະແດງຄວາມຂອບໃຈ ແລະຮູ້ບຸນຄຸນມາຍັງໂຄງການທີ່ໄດ້ໃຫ້ການສະໜັບສະໜູນປັບປຸງ ແລະຍົກສູງມາດຕະຖານຄຸນນະພາບຂອງຫ້ອງເຝິກອົບຮົມ ແລະຂອບໃຈມາຍັງລັດຖະບານ ແລະປະຊາຊົນປະເທດລຸກຊຳບວກ ທີ່ໄດ້ໃຫ້ການຊ່ວຍເຫຼືອ ແລະເຮັດໃຫ້ມີໂຄງການຮ່ວມມືພັດທະນາລຸກຊຳບວກ ລາວ/031 ນີ້ເກີດຂຶ້ນ ແລະທ່ານຍັງໄດ້ຂອບໃຈມາຍັງທ່ານອຸປະທູດແຫ່ງຣາຊະອານາຈັກລຸກຊໍາບວກປະຈຳ ສປປ ລາວ ແລະບັນດາພາກສ່ວນກ່ຽວຂ້ອງກັບການສະໜັບສະໜູນໂຄງການປັບປຸງ ແລະຍົກສູງມາດຕະຖານຄຸນນະພາບ ຫ້ອງເຝິກອົບຮົມນີ້ດ້ວຍຜົນສຳເລັດ. ທ່ານ ໄດ້ກ່າວເນັ້ນວ່າ ຄະນະນຳ ແລະພະນັກງານ, ຄູ-ອານຈານ ຄນລ ຈະນໍາໃຊ້ຫ້ອງເຝິກອົບຮົມນີ້ດ້ວຍຄວາມຮັບຜິດຊອບສູງ, ໃຫ້ເກີດຜົນປະໂຫຍດສູງສຸດ, ມີຄວາມຮັບຜິດຊອບໃນການປົກປັກຮັກສາ ເພື່ອເຮັດໃຫ້ຫ້ອງເຝິກອົບຮົມມີຄວາມທົນທານ ແລະບໍ່ເຊື່ອມໂຊມລົງກ່ອນເວລາອັນຄວນ. ພ້ອມທັງໄດ້ມອບໃບກຽດຕິຄຸນໃຫ້ທ່ານ ເລຈີນໍ ປຣາສະຕານາ ຫົວໜ້າທີ່ປຶກສາໂຄງການ ພັດທະນາ ລຸກຊໍາບວກ ລາວ/031 ເພື່ອເປັນການຈາລຶກຄຸນງາມຄວາມດີ ແລະບັນທຶກໄວ້ໃນປຶ້ມຕິດຕາມຜົນງານຂອງ ຄນລ, ມຊ ແລະຈາກນັ້ນໄດ້ມີການຕັດແຖບຜ້າເປີດນໍາໃຊ້ຫ້ອງປະຊຸມຢ່າງເປັນທາງການອີກດ້ວຍ.