ພາກວິຊາພົວພັນສາກົນ, ຄະນະນິຕິສາດ ແລະ ລັດຖະສາດ ໄດ້ຈັດກອງປະຊຸມສຳມະນາກ່ຽວກັບ ການພົວພັນສາກົນ ແລະ ກົດໝາຍສາກົນ 

ໃນວັນທີ 4-5 ມີນາ 2024​ ພາກວິຊາພົວພັນສາກົນ, ຄະນະນິຕິສາດ ແລະ ລັດຖະສາດ ໄດ້ຈັດກອງປະຊຸມສຳມະນາກ່ຽວກັບ ການພົວພັນສາກົນ ແລະ ກົດໝາຍສາກົນ  ທີ່ ຫ້ອງປະຊຸມ L1 ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ເຊິ່ງມີຜູ້ເຂົ້າຮ່ວມທັງໜົດ 50 ທ່ານ. ໃຫ້ກຽດເຂົ້າຮ່ວມເປັນປະທານ ແລະ ກ່າວຕ້ອນຮັບ ໂດຍທ່ານ  ຮສ. ປອ ວຽງວິໄລ ທ່ຽງຈັນໄຊ ຄະນະບໍດີ ຄະນະນິຕິສາດ ແລະ ລັດຖະສາດ. ໂດຍມີການເຊື້ອເຊີນບັນດາທ່ານ ວິທະຍາກອນຜູ້ຊ່ຽວຊານມາບັນຍາຍ ຈາກກະຊວງການຕ່າງປະເທດ ລວມທັງໜົດ ຈຳນວນ  4 ທ່ານ, ມີອາຈານພາຍໃນ ຄນລ ຈຳນວນ 36 ທ່ານ,  ແລະ ນັກສຶກສາພາກວິຊາພົວພັນສາກົນ ທັງໜົດ 10 ​ຄົນ. ຈຸດປະສົງຂອງກອງປະຊຸມ ເພື່ອເຫັນໄດ້ເຖິງຄວາມສຳຄັນ ໃນການສ້າງ ແລະ ພັດທະນາການຮຽນ-ການສອນໃຫ້ມີຄວາມທັນສະໄຫມ ແລະ ສອດຄ່ອງກັບມາດຕະຖານເຄືອຂ່າຍມະຫາວິທະຍາໄລອາຊຽນ ແລະ ມີການຈັດຕັ້ງກິດຈະກໍາແລກປ່ຽນຄວາມຮູ້ດ້ານວິຊາການກັບບັນດາຄູ່ຮ່ວມມືທັງພາຍໃນ ແລະ ຕ່າງປະ ເທດ. ໂດຍສະເພາະການຮຽນຮູ້ໃນຄວາມສຳຄັນຂອງກົດໝາຍສາກົນ ແລະ ການພົວພັນສາກົນ. ໃນກອງປະຊຸມ ແມ່ນຮັບຟັງການບັນຍາຍ ໃນຫົວຂໍ້ ກ່ຽວກັບການພົວພັນສາກົນ ໃນສະຕະວັດທີ 21 ໃນຕອນເຊົ້າ ແລະ ຕອນບ່າຍ ຮັບຟັງການບັນຍາຍ ກ່ຽວກັບ ການທູດເສດຖະກິດ ໂດຍໃຫ້ກຽດບັນຍາຍ ໂດຍທ່ານ ອຳມະລາ ແສນຈົງຮັກ ຮອງຫົວໜ້າກົມເສດຖະກິດ, ກະຊວງການຕ່າງປະເທດ. ສຳລັບມື້ທີ 2 ຮັບຟັງກ່ຽວກັບຄວາມຮູ້ທົ່ວໄປກ່ຽວກັບກົດໝາຍສາກົນ ໂດຍການບັນຍາຍ ຂອງທ່ານ ທິບພະສອນ ແສງສຸລິຍະ ຮອງຫົວໜ້າກົມສົນທິສັນຍາ ແລະ ກົດໝາຍ, ແລະ ຫົວຂໍ້ການຈັດຕັ້ງປະຕິບັດກົດໝາຍສາກົນ ຂອງ ສປປ ລາວ ໂດຍ ທ່ານ ສັກປະເສີດ ສີສຸກ ຮອງຫົວໜ້າພະແນກການເມືອງ ແລະ ຄວາມໜັ້ນຄົງ.  ແລະ ໃນພາກບ່າຍ ແມ່ນຮັບຟັງການບັນຍາຍກ່ຽວກັບ ການພົວພັນຂອງກົດໝາຍສາກົນ ແລະ ກົດໝາຍພາຍໃນ ໃຫ້ກຽດມາບັນຍາຍ ໂດຍທ່ານ ສີລາເພັດ ຖິ່ນແກ້ວເມືອງເຫນືອ ຮອງຫົວໜ້າພະແນກກົດໝາຍສາກົນ. ກອງປະຊມ ໄດ້ມີການສົນທະນາແລກປ່ຽນຄວາມຄິດເຫັນ ແລະ ຖາມ-ຕອບຢ່າງສ້າງສັນ.​ ຫຼັງຈາກນັ້ນ, ກ່າວປິດພິທີ ໂດຍທ່ານ ອາຈານ ປອ. ສົມເດດ ແກ້ວວົງສັກ ຮອງຄະນະບໍດີ ຄະນະນິຕິສາດ ແລະ ລັດຖະສາດ. ກອງປະຊຸມໄດ້ ສໍາລັດລົງຢ່າງຈົບງາມໃນເວລາ ໃນເວລາ 17:00ໂມງ.

ຂຽນຂ່າວ : ໂດຍ ອຈ ຄອນສະຫັວນ ວົງວັນນະໄຊ

ພາບບັນຍາກາດ