ປະກາດຕໍາແໜ່ງບໍລິຫານປະເພດ 4 ຂັ້ນຮອງຫົວໜ້າພາກວິຊາ, ແລະ ທາບທາມເອົາຄະນະບໍລິຫານງານພັກຮາກຖານ ຄນລ ຮອບ1

ໃນຕອນບ່າຍຂອງວັນທີ 21 ມັງກອນ 2025, ຄະນະນິຕິສາດ ແລະ ລັດຖະສາດ(ຄນລ), ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີ ປະກາດຕໍາແໜ່ງບໍລິຫານປະເພດ 4 ຂັ້ນຮອງຫົວໜ້າພາກວິຊາ, ແລະ ທາບທາມເອົາຄະນະບໍລິຫານງານພັກຮາກຖານ ຄນລ ຮອບ1 ຂື້ນທີ່ຫ້ອງປະຊຸມ L1 , ໂດຍ ການເຂົ້າຮ່ວມເປັນປະທານຂອງທ່ານ  ຮສ.ປອ  ສິນທະວອນ ດາລາວົງ   ຮອງອະທິການບໍດີ ມຊ , ມີບັນດາ, ຮອງຄະນະບໍດີ, ຫົວໜ້າພາກວິຊາ,ຮອງພາກວິຊາ, ,ຫົວໜ້າພະແນກ, ຮອງພະແນກ ພ້ອມດ້ວຍພະນັກງານ, ຄູ-ອາຈານພາຍໃນຄະນະເຂົ້າຮ່ວມ.

           ໃນກອງປະຊຸມໄດ້ຮັບຟັງຜ່ານບົດສະຫຼຸບລາຍງານການເມືອງໃນການກະກຽມຄວາມພ້ອມກອງປະຊຸມໃຫ່ຍຮາກຖານ ຄນລ ຄັ້ງທີ 5 ໂດຍ ສະຫາຍ ປອ ສົມເດດ ແກ້ວວົງສັກ ປະທານກວດກາພັກຮາກຖານ ຮອງຄະນະບໍດີ ຄະນະນິຕິສາດ ແລະ ລັດຖະສາດ ຜູ້ຮັບຜິດຊອບວຽກ ແທນ ຄະນະບໍດີ

 ໃນພິທີ, ທ່ານ ນາງ ທອງລວນ ຂາວສະອາດ ຮອງຫົວໜ້າຫ້ອງການຈັດຕັ້ງ ແລະຄຸ້ມຄອງພະນັກງານ ມະຫາວິທະຍາໄລແຫ່ງຊາດ, ໄດ້ຜ່ານຂໍ້ຕົກລົງແຕ່ງຕັ້ງຕໍາແໜ່ງບໍລິຫານງານ ປະເພດ 4 ໂດຍແຕ່ງຕັ້ງ ທ່ານ ອຈ ປທ ຍອດຊາຍ ດາລາສັກ ຮັບຕໍາແໜ່ງເປັນຮອງຫົວໜ້າພາກວິຊາກົດໝາຍທຸລະກິດ, ທ່ານ ອຈ ປອ ນາງ ບົວລະພຽນ ສີສຸກ ຮັບຕໍາແໜ່ງເປັນຮອງຫົວໜ້າພາກວິຊາພົວພັນສາກົນ,ທ່ານ ອຈ ປທ ທອງຄໍາ ລໍ່ຢ່າງ ຮອງຫົວໜ້າພາກວິຊາກົດໝາຍທຸລະກິດ ຍ້າຍໄປເປັນຮອງຫົວໜ້າພາກວິຊາກົດໝາຍແພ່ງ

  ໃນໂອກາດດັ່ງກ່າວ ທ່ານ ຮສ.ປອ. ສິນທະວອນ ດາລາວົງ   ຮອງອະທິການບໍດີ ມຊ ໄດ້ໂອ້ລົມ ຕໍ່ພິທີ ເຊິ່ງທ່ານໄດ້ກ່າວຍ້ອງຍໍຊົມເຊີຍຕໍ່ຜົນສຳເລັດ ທີ່ບັນດາພະນັກງານ, ຄູ-ອາຈານທີ່ໄດ້ຖຸ່ມເທສະຕິປັນຍາ ແລະເຫື່ອແຮງຂອງຕົນປະກອບສ່ວນເຂົ້າໃນການພັດທະນາ ຄນລ ກໍຄື ມຊ ເວົ້າລວມ; ເວົ້າສະເພາະແມ່ນໄດ້ເອົາໃຈໃສ່ພັດທະນາເຄື່ອງມືການສິດສອນໃຫ້ສອດຄ່ອງກັບຄວາມຕ້ອງການຂອງສັງຄົມ ຢ່າງມີຄວາມຮັບຜິດຊອບສູງຕະຫຼອດໄລຍະເວລາຜ່ານມາ. ພ້ອມນັ້ນ, ທ່ານຍັງໄດ້ກ່າວເນັ້ນໃຫ້ ຜູ້ໄດ້ຮັບຕໍາແໜ່ງໃໝ່ ກໍຄື ຄະນະນໍາ ຄນລ ຈົ່ງສືບຕໍ່ຍົກສູງຄວາມຮັບຜິດຊອບ ໃນການຊີ້ນໍາໆພາ ການຈັດຕັ້ງປະຕິບັດແຜນ 5 ປີຕໍ່ໜ້າໂດຍສະເພາະແມ່ນການສ້າງພະນັກງານສືບທອດປ່ຽນແທນທາງດ້ານບໍລິຫານ ແລະວິຊາການ. ສໍາລັບຄູ-ອາຈານໃຫ້ເພີ່ມທະວີໃນການປະຕິບັດໜ້າທີ່ຂອງຕົນເອງຂຶ້ນຕື່ມໂດຍສະເພາະແມ່ນ ດ້ານການສິດສອນ, ການສຶກສາຄົ້ນຄວ້າວິໄຈ, ທ່ານກ່າວຕື່ມວ່າ ຄວາມຈໍາເປັນພາວະວິໄສ ໃນການປະຕິບັດໜ້າທີ່ວຽກງານທີ່ຖືກມອບໝາຍໃຫ້ສຳເລັດນັ້ນ ກໍຄື ການຍົກສູງຄວາມຮູ້ ແລະຄວາມສາມດຂອງຄູອາຈານ ຄວນມີ 5 ດ້ານຄື: 1. ຍົກສູງວິຊາສະເພາະຂອງຕົນເອງ; 2. ຍົກລະດັບຄວາມຮູ້ ດ້ານການເມືອງ, ແນວທາງການພັດທະນາຂອງລັດຖະບານກໍຄືຂອງພັກ; 3. ຄວາມຮູ້ທາງດ້ານ ICT ເຂົ້າໃນການຈັດຕັ້ງການສອນແບບອອນລາຍ. 4. ຄວາມຮູ້ທາງດ້ານການບໍລິຫານເວລາ ແລະບໍລິຫານການເງິນ, ແລະ 5. ການສ້າງສາຍພົວພັນຮ່ວມມືກັບອົງກອນຂອງລັດ ແລະສາກົນ.