ຫຼັກສູດ: ປະລິນຍາຕີ 4 ປີ
ຄະນະນິຕິສາດ ແລະ ລັດຖະສາດ
University of lao
ນິຍາມ ແລະ ຄວາມສຳຄັນ
ລັດຖະສາດ ໝາຍເຖິງການສຶກສາດ້ານການເມືອງ, ການປົກຄອງ ແລະ ການບໍລິຫານພາກລັດ. ຄວາມຮູ້ທາງດ້ານລັດຖະສາດ ແມ່ນມີຄວາມສໍາຄັນໃນການສ້າງຄວາມເຂົ້າໃຈທາງດ້ານການບໍລິຫານປົກຄອງລັດ, ວິເຄາະຈຸດດີ-ຈຸດອ່ອນຂອງລະບົບການປົກຄອງຕ່າງໆ ແລະ ສຶກສາບັນດາພຶດຕິກຳຂອງມະນຸດທີ່ຢູ່ຮ່ວມກັນໃນສັງຄົມ ເພື່ອນຳໃຊ້ເຂົ້າໃນການພັດທະນາຮູບແບບການປົກຄອງໃຫ້ເຂັ້ມແຂງ ແລະ ມີປະສິດທິພາບ ເພື່ອຮັບປະກັນ ສິດຜົນປະໂຫຍດ ແລະ ການຢູ່ຮ່ວມກັນໂດຍສັນຕິຂອງຄົນໃນສັງຄົມ.
ວິຊານີ້ຮຽນກ່ຽວກັບຫຍັງ
ສາຂານີ້ຮຽນກ່ຽວກັບ ບັນດາກົດໝາຍທີ່ເປັນເຄື່ອງມືໃນການປົກຄອງ ແລະ ການບໍລິຫານລັດ, ໂຄງສ້າງ ແລະ ກົນໄກການປົກຄອງ ລວມທັງ ວິທະຍາສາດການເມືອງ, ລະບອບການເມືອງ ຂອງ ສປປ ລາວ ແລະ ທິດສະດີການບໍລິຫານລັດ. ໃນນັ້ນ, ນັກສຶກສາຈະໄດ້ລົງເລິກກ່ຽວກັບ ບັນດາຫຼັກການທາງດ້ານກົດໝາຍ ເຊັ່ນ: ກົດໝາຍລັດຖະທໍາມະນູນ, ກົດໝາຍວ່າດ້ວຍສະພາແຫ່ງຊາດເປັນຕົ້ນ. ນອກນັ້ນ, ຍັງສຶກສາກ່ຽວກັບ ສະພາວະຂອງການເປັນຜູ້ນໍາ ແລະ ຈັນຍາບັນຂອງນັກປົກຄອງ ອີກດ້ວຍ.
ວິທີການສິດສອນ
ການສິດສອນ ແມ່ນມີການບັນລະຍາຍທາງດ້ານທິດສະດີ ແລະ ສຶກສາເຫດການຕົວຈິງຂອງສະພາບສັງຄົມ, ມີການຕັ້ງບັນຫາເພື່ອໃຫ້ນັກສຶກສາຄົ້ນຄວ້າ ແລະ ສົນທະນາເປັນກຸ່ມໂດຍນຳໃຊ້ທິດສະດີເຂົ້າໃນການວິເຄາະບັນຫາດັ່ງກ່າວແລ້ວ ນໍາສະເໜີທັດສະນະຂອງນັກສຶກສາ. ນອກນັ້ນ, ຍັງມີການທັດສະນະສຶກສາ ແລະ ການຝຶກງານຢູ່ຕາມບັນດາຫ້ອງການປົກຄອງ ໃນຂັ້ນສູນກາງ ເຊັ່ນ: ກະຊວງພາຍໃນ, ຫ້ອງວ່າການລັດຖະບານ, ສະພາແຫ່ງຊາດ ແລະ ບັນດາຫ້ອງການລັດຂັ້ນທ້ອງຖີ່ນ.
ທັກສະ/ຄວາມສົນໃຈ
ຄວາມຮູ້ພື້ນຖານທາງດ້ານວິຊາສັງຄົມເປັນຕົ້ນແມ່ນວິຊາ ສຶກສາພົນລະເມືອງ, ປະຫວັດສາດ ແລະ ພາສາລາວ; ມີຄວາມສົນໃຈ ທາງດ້ານໂຄງສ້າງຂອງລັດຖະບານ, ການສ້າງກົດໝາຍ, ການຈັດຕັ້ງປະຕິບັດກົດໝາຍໃນຊີວິດປະຈໍາວັນ; ມີຄວາມສົນໃຈ ແລະ ມັກຕິດຕາມເຫດການທາງດ້ານການເມືອງທີ່ເກີດຂື້ນ ແລະ ຕັ້ງຄໍາຖາມສີ່ງທີ່ກ່ຽວຂ້ອງກັບກົດໝາຍ ແລະ ການເມືອງ.
ຈົບແລ້ວສາມາດ
ມີຄວາມສາມາດໃນການວິເຄາະລະບົບການປົກຄອງ, ນຳໃຊ້ເຄື່ອງມືທາງດ້ານກົດໝາຍເຂົ້າໃນການປົກຄອງຢ່າງມີປະສິດທິພາບ, ສ້າງບັນດານິຕິກໍາທາງດ້ານການເມືອງການປົກຄອງລວມທັງການສ້າງບັນດາເອກະສານທາງດ້ານການປົກຄອງເປັນຕົ້ນແມ່ນ: ແຈ້ງການ, ໜັງສືສະເໜີ ຫຼື ຂໍ້ຕົກລົງ. ມີທັກສະດ້ານການເປັນຜູ້ນໍາ ເພື່ອການປົກຄອງທ້ອງຖີ່ນ ແລະ ການບໍລິຫານລັດ.
ອາຊີບ
ເປັນນັກວິຊາການ ແລະ ນັກບໍລິຫານ ໃນຂົງເຂດນິຕິກໍາທາງດ້ານການປົກຄອງ ຕາມບັນດາສໍານັກງານ, ອົງການ ແລະ ຫ້ອງການປົກຄອງຂອງລັດຖະບານ ເປັນຕົ້ນແມ່ນກະຊວງພາຍໃນ, ຫ້ອງວ່າການລັດຖະບານ, ສະພາແຫ່ງຊາດ, ຫ້ອງວ່າການນະຄອນຫຼວງ, ຫ້ອງວ່າການປົກຄອງແຂວງ ແລະ ອື່ນໆ. ນອກນັ້ນ, ຍັງສາມາດເປັນຜູ້ຊ່ວຍທາງດ້ານນິຕິກໍາໃນ ພາກເອກະຊົນອີກດ້ວຍ.
ສະຖານທີ່ຕັ້ງ
ຄະນະ ນິຕິສາດ ແລະ ລັດຖະສາດ
ວິທະຍາເຂດດອນນົກຂຸ້ມ ມະຫາວິທະຍາໄລແຫ່ງຊາດ
ຖະໜົນມິດຕະພາບລາວ-ໄທ, ບ້ານ ດອນນົກຂູ້ມ, ເມືອງສີສັກຕະນາກ, ນະຄອນຫຼວງວຽງຈັນ
ຕູ້ ປ.ນ 822. ໂທ: 021 312010 ຫຼື 352801, ແຟັກ: 021 314976
ອີເມວ: flp@nuol.edu.la
ວິຊາຮຽນ
ວິຊາຄວາມຮູ້ພື້ນຖານຂອງວິຊາສະເພາະ
- ກົດໝາຍແພ່ງ
- ພື້ນຖານກົດໝາຍໂຣມັນ
- ກົດໝາຍທີ່ດິນ
- ກົດໝາຍປົກປັກຮັກສາສິ່ງແວດລ້ອມ
- ກົດໝາຍພາສີ
- ກົດໝາຍຄອບຄົວ
- ກົດໝາຍແຮງງານ
- ກົດໝາຍຊັບສິນທາງປັນຍາ
- ພາສາຕ່າງປະເທດ
- ເສດຖະສາດມະຫາພາກ
- ເສດຖະສາດຈຸລະພາກ
- ກົດໝາຍສົ່ງເສີມການລົງທືນ
- ກົດໝາຍອາຍາ
- ອາຍາວິທະຍາ
ໝວດວິຊາສະເພາະ
- ກົດໝາຍລັດຖະທໍາມະນຸນ
- ທິດສະດີລັດ ແລະ ກົດໝາຍ
- ກົດໝາຍສັນຊາດ
- ກົດໝາຍວ່າດ້ວຍສະພາແຫ່ງຊາດ
- ກົດໝາຍວ່າດ້ວຍຊັບສິນຂອງລັດ
- ຄວາມຮູ້ພື້ນຖານການບໍລິຫານລັດ
- ຄວາມຮູ້ພື້ນຖານລັດຖະສາດ
- ການເງິນແຫ່ງລັດ
- ການປົກຄອງສົມທຽບ
- ການປົກຄອງທ້ອງຖີ່ນ
- ຈັນຍາບັນຂອງນັກປົກຄອງ
- ກົດໝາຍການປົກຄອງພາກທົ່່ວໄປ
- ກົດໝາຍການປົກຄອງພາກສະເພາະ
- ເຕັກນິກບໍລິຫານ
- ການບໍລິຫານອົງການ
- ການບໍລິຫານບຸກຄະລາກອນ
- ການບໍລິຫານການພັດທະນາ
- ພາວະຜູ້ນໍາ
- ຈິດຕະວິທະຍາຄຸ້ມຄອງ
- ການບໍລິຫານສົມທຽບ
- ເສດຖະສາດການເມືອງ
- ທິດສະດີການພົວພັນລະຫວ່າງຊາດ
- ກົດໝາຍລະຫວ່າງຊາດພາກລັດ
- ກົດໝາຍລະຫວ່າງຊາດພາກບຸກຄົນ
- ກົດໝາຍເສດຖະກິດສາກົນ
