Vision and goals
ອີງໃສ່ແຜນພັດທະນາການສຶກສາ ໄລຍະ 05 ປີ (2021-2025) ຂອງມະຫາວິທະຍາໄລແຫ່ງຊາດ ເພື່ອພັດທະນາຄະນະນິຕິສາດ ແລະ ລັດຖະສາດ ໃຫ້ກາຍເປັນສະຖາບັນການສຶກສາ ແລະ ຄົ້ນຄວ້າວິທະຍາສາດລະດັບຊາດໃນຂົງເຂດກົດໝາຍແລະລັດຖະສາດທີ່ມີຄຸນນະພາບ, ມີມາດຕະຖານພາກພື້ນ ແລະ ສາກົນ. ຄນລ ຈຶ່ງໄດ້ກຳນົດວິໄສທັດ, ພາລະບົດບາດ ແລະ ແຜນພັດທະນາດັ່ງນີ້:
- ວິໄສທັດ
ຄະນະນິຕິສາດ ແລະ ລັດຖະສາດ ຈະກາຍເປັນສະຖາບັນການສຶກສາ ແລະ ການຄົ້ນຄວ້າວິທະຍາສາດທາງດ້ານກົດໝາຍ ແລະ ລັດຖະສາດ ທີ່ມີຄຸນນະພາບມາດຕະຖານພາກພື້ນ ແລະ ສາກົນ.
2. ພາລະບົດບາດ
- ຍົກສູງການພັດທະນາຊັບພະຍາກອນມະນຸດໃຫ້ກາຍເປັນນັກວິຊາການທາງດ້ານກົດໝາຍ, ນັກບໍລິຫານການປົກຄອງ, ນັກການທູດ ແລະ ການພົວພັນສາກົນ ໃນລະດັບປະລິນຍາຕີຂື້ນໄປ.
- ດຳເນີນ ແລະ ສົ່ງເສີມການຄົ້ນຄ້ວາວິທະຍາສາດໃນຂົງເຂດກົດໝາຍ ແລະ ລັດຖະສາດ ໃຫ້ມີມາດຕະຖານ ເພື່ອຕອບສະຫນອງແນວທາງນະໂຍບາຍຂອງພັກ, ແຜນພັດທະນາເສດຖະກິດ–ສັງຄົມ ຂອງຊາດ ແລະ ນຳເອົາຜົນສຳເລັດການຄົ້ນຄ້ວາໄປຈັດຕັ້ງປະຕິບັດໃຫ້ມີປະສີດທິພາບ ແລະ ປະສິດທິຜົນ.
- ບໍລິການທາງດ້ານວິຊາການທີ່ມີປະສິດທິພາບ ເພື່ອຕອບສະຫນອງຄວາມຕ້ອງການໃຫ້ແກ່ສັງຄົມ.
- ປົກປັກຮັກສາ ແລະ ເສີມຂະຫຍາຍມູນເຊື້ອວັດທະນະທຳ, ຮີດຄອງປະເພນີອັນດີງາມຂອງຊາດຕາມ 3 ລັກສະນະ ແລະ 5 ຫຼັກມູນຂອງການສຶກສາ, ຮັບເອົາວັດທະນະທໍາອັນກ້າວໜ້າຂອງພາກພື້ນ ແລະ ສາກົນທີ່ສອດຄ່ອງເຂົ້າໃນການພັດທະນາ ຄນລ.
ພາລະກິດລວມ ຂອງ ຄນລ
- ພັດທະນາ ຄູ–ອາຈານ, ພະນັກງານ ພາຍໃນ ຄນລ ໃຫ້ມີຄວາມຮູ້, ຄວາມສາມາດ, ມີທັກສະ ແລະ ມີຄວາມຊຳນິຊຳນານສະເພາະດ້ານ.
- ສ້າງນັກສຶກສາໃຫ້ເປັນນັກວິຊາການທີ່ມີຄວາມຮູ້, ຄວາມສາມາດ, ທັກສະຢູ່ໃນລະດັບນໍາໜ້າຂອງຊາດ, ກ້າວສູ່ລະດັບພາກພື້ນ ແລະ ສາກົນ.
- ພັດທະນາລະບົບກົນໄກການບໍລິຫານຄຸ້ມຄອງ ຄນລ ໃຫ້ມີປະສິດທິພາບ, ປະສິດທິຜົນ, ວ່ອງໄວກະທັດຮັດ, ມີຄວາມທັນສະໄຫມ ແລະ ມີຄວາມໂປ່ງໃສ.
- ພັດທະນາ ຄນລ ໃຫ້ມີພື້ນຖານໂຄງລ່າງ, ເຄືື່ອງມື, ວັດຖຸອຸປະກອນ ແລະ ເຕັກໂນໂລຊີ ທີ່ທັນສະໄຫມເພື່ອຮັບໃຊ້ການຮຽນ-ການສອນ ແລະ ການບໍລິຫານຈັດການຮັບປະກັນໃຫ້ມີຄວາມສະດວກ, ສະອາດ, ສີຂຽວ, ສະຫງົບ ແລະ ສະຫວ່າງ.
