ພິທີເຊັນບົດບັນທຶກຄວາມເຂົ້າໃຈທາງວິຊາການ (MOA) ໃນການສິດສອນຫຼັກສູດປະລິນຍາເອກ ສາຂາ ນິຕິສາດ ຢູ່ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ - FLP

ໃນວັນຈັນ ຕອນເຊົ້້າ ຂອງວັນທີ 24 ກຸມພາ 2025 ເວລາ 9:00-11:30 ໂມງ ຢູ່ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ໄດ້ມີພິທີເຊັນບົດບັນທຶກຄວາມເຂົ້າໃຈທາງວິຊາການ ລະຫວ່າງ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ແລະ ຄະນະນິຕິສາດ ມະຫາວິທະຍາໄລທຳມະສາດ, ປະເທດໄທ. ເຂົ້າຮ່ວມໃນພິທີດັ່ງກ່າວ ປະກອບມີຄະນະຜູ້ບໍລິຫານຈາກສອງສະຖາບັນ ດັ່ງນີ້:

ຄະນະຜູ້ບໍລິຫານ ແລະ ອາຈານຈາກຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ເຂົ້າຮ່ວມມີ:

1. ອຈ. ປອ. ສົມເດດ ແກ້ວວົງສັກ ຜູ້ຮັບຜິດຊອບແທນຄະນະບໍດີ ຄນລ;

2. ອຈ. ທັດສະນະລອນ ສີສຸນົນທ໌ ຮອງຄະນະບໍດີ;

3. ທ່ານ ອຈ. ນາງ ບຸນນໍາ ຊົມວິມານ (ຮອງຫົວໜ້າຫ້ອງການ ການສຶກສາຫຼັງປະລິນຍາຕີ, ມຊ);

4. ນອກຈາກນັ້ນ ຍັງມີບັນດາຫົວໜ້າພາກວິຊາ, ຮອງພາກວິຊາ, ຫົວໜ້າພະແນກ, ຮອງພະແນກ ຂອງ ຄນລ;

ສ່ວນຄະນະຜູ້ບໍລິຫານ ຈາກຄະນະນິຕິສາດ ມະຫາວິທະຍາໄລທຳມະສາດ, ປະເທດໄທ ເຂົ້າຮ່ວມມີ:

1. ຮສ. ປອ. ປົກປ້ອງ ສີສະນິດ ຄະນະບໍດີ ຄະນະນິຕິສາດ ມະຫາວິທະຍາໄລທຳມະສາດ, ປະເທດໄທ;

2. ຜູ້ຊ່ວຍສາດສະດາຈານ. ປອ. ອຳນາດ ຕັ້ງສິຣິພິມານ ຮອງຄະນະບໍດີ;

3. ອາຈານ ສະຖາພອນ ລິ້ມມະນີ ຈາກສຳນັກພິມວິນຍູຊົນ.

ການຮ່ວມມືທາງວິຊາການດັ່ງກ່າວ ຖືວ່າເປັນບາດກ້າວສໍາຄັນຂອງການຮ່ວມມືທາງດ້ານວິຊາການລະຫວ່າງສອງສະຖາບັນ ເພື່ອເສີ່ມສ້າງການພົວພັນ, ແລກປ່ຽນອົງຄວາມຮູ້ ແລະ ພັດທະນາຄຸນນະພາບການສຶກສາທາງດ້ານກົດໝາຍ ໂດຍສະເພາະແມ່ນຄວາມຮ່ວມມື ເພື່ອສິດສອນ ແລະ ຊີ້ນຳບົດວິທະຍານິພົນ ໃນຫຼັກສູດປະລິນຍາເອກ ສາຂາ ນິຕິສາດ ຂອງ ຄະນະນິຕິສາດ ແລະ ລັດຖະສາດ ໃນອານະຄົດນີ້.

ຂ່າວໂດຍ : ທ່ານ ອຈ ປອ ປັນຍາສັກ ແສງອ່ອນແກ້ວ