ຄະນະນິຕິສາດ ແລະ ລັດຖະສາດ,ມຊ ເຊັນສັນຍາ MOA ກັບ  ຄະນະນິຕິສາດ ມະຫາວິທະຍາໄລມະຫາສາລະຄາມ ແລກປ່ຽນທາງວິຊາການ ນັກສຶກສາ,ຄູອາຈານ ແລະ ງານວິໄຈຮ່ວມກັນ

ວັນທີ 30 ມີນາ 2022 ມະຫາວິທະຍາໄລແຫ່ງຊາດລາວ ຈັດພິທີເຊັນສັນຍາບັນທຶກຄວາມຕົກລົງທາງວິຊາການ ລະຫວ່າງ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດລາວ ກັບ ຄະນະນິຕິສາດ ມະຫາວິທະຍາໄລມະຫາສາລະຄາມ ລາດສະອະນາຈັກ ປະເທດໄທ ໂດຍ ທ່ານຮອງສາດສະດາຈານ ປະລິນຍາເອກ ອຸດົມ ພອນຄໍາເພັງ ອະທິການບໍດີ ມະຫາວິທະຍາໄລແຫ່ງຊາດລາວ ປະທານໃນພິທີ ພ້ອມດ້ວຍ ທ່ານຮອງສາດສະດາຈານ ດຣ. ປຣະຍຸກ ສີວິໄລ (Assoc.Prof. Dr. Prayook Srivilai) ອະທິການບໍດີ ມະຫາວິທະຍາໄລມະຫາສາລະຄາມ ຮ່ວມກັນກ່າວຕອນຮັບແຂກຜູ້ມີກຽດທັງສອງສະຖາບັນ

ໂດຍ ທ່ານ ຮອງສາດສະດາຈານ ວຽງວິໄລ ທ່ຽງຈັນໄຊ ຄະນະບໍດີ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ແລະ ທ່ານຜູ້ຊ່ວຍສາດສະດາຈານ ພົງພັນ ບຸພະເກ (Asst. Prof. Pongpan Bupake)  ຄະນະບໍດີ ຄະນະນິຕິສາດ ມະຫາວິທະຍາໄລມະຫາສາລະຄາມ ເຊັນສັນຍາບົດບັນທຶກຄວາມຕົກລົງທາງວິຊາການດັ່ງກ່າວ

ເຂົ້າຮ່ວມໂດຍ ມີບັນດາ ຮອງຄະນະບໍດີ,ຫົວໜ້າພາກວິຊາ,ຫົວໜ້າພະແນກ ແລະ ພະນັກງານຄູອາຈານທັງສອງຝ່າຍເຂົ້າຮ່ວມເປັນສັກຂີພິຍານທີ່ຫ້ອງປະຊຸມ B10 ຊັ້ນສອງ ອາຄານຕຶກB ຜ່ານທາງອອນລາຍ

ທັງນີ້,ທັງສອງສະຖາບັນຕົກລົງຮ່ວມກັນເພື່ອພັດທະນາຄວາມຮ່ວມມືທາງວິຊາການ ເຊີ່ງຈະຕ້ອງມີການຮ່ວມມືໃຫ້ເກີດກິດຈະກຳຕ່າງໆ ເຊັ່ນ ການແລກປ່ຽນນັກສຶກສາ,ແລກປ່ຽນພະນັກງານຄູອາຈານ ແລະ ນັກວິໄຈ ການເຮັດບົດໂຄງການວິໄຈຮ່ວມກັນ ລວມທັງປະຊຸມທາງວິຊາການ ການເຂົ້າຮ່ວມໃນງານສຳມະນາປະຊຸມທາງວິຊາການ ຕະຫລອດຈົນແລກປ່ຽນຂໍ້ມູນ ແລະ ຜົນງານວິໄຈ ເພື່ອກໍ່ໃຫ້ເກີດປະໂຫຍດສູງສຸດໃນດ້ານການຈັດການຮຽນການສອນ ຍົກລະດັບສັກກາຍະພາບທາງວິຊາການ ໂດຍອາໄສບົດບັນທຶກຄວາມຕົກລົງທາງວິຊາການນີ້ ໃນການສ້າງ ແລະ ສົ່ງເສີມຄວາມຮ່ວມມືລະຫວ່າງປະເທດໃນການພັດທະນາທາງດ້ານນິຕິສາດລະຫວ່າງທັງສອງປະເທດຕໍ່ໄປໃນອະນາຄົດ.