ຄນລ  ຈັດພິທີສະຫຼຸບຊຸດຮຽນການສຶກສາຫຼັງປະລິນຍາຕີ  ແລະ ພິທີມອບ-ຮັບ ປະກາສະນິຍະບັດໃຫ້ແກ່ຜູ້ສຳເລັດການສຶກສາ ລະດັບປະລິນຍາໂທ ສາຂາ ນິຕິສາດ,ກົດໝາຍການປົກຄອງ,ກົດໝາຍທຸລະກິດ ແລະ ປະຖົມນິເທດໃຫ້ແກ່ນັກສຶກສາປະລິນຍາໂທ ສາຂາ ກົດໝາຍການປົກຄອງ ແລະ ກົດໝາຍທຸລະກິດ

ໃນວັນທີ 5 ເມສາ 2024 ຜ່ານມາ, ຄະນະນິຕິສາດ ແລະ ລັດຖະສາດ (ຄນລ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສະຫຼຸບຊຸດຮຽນການສຶກສາຫຼັງປະລິນຍາຕີ  ແລະ ພິທີມອບ-ຮັບ ປະກາສະນິຍະບັດໃຫ້ແກ່ຜູ້ສຳເລັດການສຶກສາ ລະດັບປະລິນຍາໂທ ສາຂາ ນິຕິສາດ,ກົດໝາຍການປົກຄອງ,ກົດໝາຍທຸລະກິດ ແລະ ປະຖົມນິເທດໃຫ້ແກ່ນັກສຶກສາປະລິນຍາໂທ ສາຂາ ກົດໝາຍການປົກຄອງ ແລະ ກົດໝາຍທຸລະກິດ ທີ່ຕຶກອາເນກປະສົງຊັ້ນ 3ຫ້ອງປະຊຸມ L1, ໂດຍການເຂົ້າຮ່ວມທ່ານ ຮອງສາດສະດາຈານ ປະລິນຍາເອກ ເດຊານຸລາດ ແສນດວງເດດ, ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮອງສາດສະດາຈານ ປະລິນຍາເອກ  ວຽງວິໄລ ທ່ຽງຈັນໄຊຄະນະບໍດີ ຄະນະນິຕິສາດ ແລະ ລັດຖະສາດ ,  ມີບັນດາແຂກຖືກເຊີນ, ທ່ານຮອງຫົວໜ້າຫ້ອງການ, ຄະນະຮັບຜິດຊອບຫຼັກສູດ,ຮອງຄະນະບໍດີ,ຫົວໜ້າພາກວິຊາ,ຫົວໜ້າພະແນກ, ຄູ-ອາຈານ, ພະນັກງານ ແລະນັກສຶກສາເຂົ້າຮ່ວມ.

          ໃນພິທີ, ອາຈານ ປະລິນຍາເອກ ສີພາ ຈັນທະວົງ ຫົວໜ້າພະແນກການສຶກສາຫຼັງປະລິນຍາຕີ ຄະນະນິຕິສາດ ແລະ ລັດ ຖະສາດ ໄດ້ຂຶ້ນລາຍງານຫຍໍ້ກ່ຽວກັບການຮຽນ-ການສອນ ແລະຜົນສຳເລັດການສຶກສາ ລະດັບປະລິນຍາໂທຂອງຄະນະວິຊາ ໂດຍສັງເຂບ ດັ່ງນີ້ :

1). ຈໍານວນຫຼັກສູດ

ປັດຈຸບັນຄະນະນິຕິສາດ ແລະ ລັດຖະສາດ ມີຫຼັກສູດປະລິນຍາໂທ 4 ສາຂາ ຄື: ນິຕິສາດ, ກົດໝາຍການປົກຄອງ, ກົດໝາຍທຸລະກິດ ແລະ ກົດໝາຍສາກົນ.

2). ການຮຽນ-ການສອນ ໃນແຕ່ລະຫຼັກສູດ

1)       ຫຼັກສູດປະລິນຍາໂທ ນິຕິສາດ ດໍາເນີນການຮຽນ-ການສອນ ມາແລ້ວ 14 ຮຸ່ນ ແລະ ສໍາເລັດການສຶກສາໄປ ແລ້ວຈໍານວນ 11 ຮຸ່ນ, ສ່ວນຮຸ່ນທີ 12 ຈົບໄປແລ້ວ 7 ທ່ານ , ຮຸ່ນທີ 13 ແມ່ນກໍາລັງຂຽນວິທະຍານິພົນ ແລະ ຮຸ່ນທີ 14 ແມ່ນກໍາລັງຮຽນລາຍວິຊາ ໃນຫຼັກສູດ.

2)       ຫຼັກສູດປະລິນຍາໂທ ສາຂາ ກົດໝາຍການປົກຄອງ ດໍາເນີນການຮຽນ-ການສອນ ມາໄດ້ 10 ຮຸ່ນ ແລະ ສໍາເລັດການ ສຶກສາໄປແລ້ວ 8 ຮຸ່ນ, ຮຸ່ນທີ 9 ແມ່ນກໍາລັງກະກຽມການຂຽນວິທະຍານິພົນ ແລະ 10 ແມ່ນກໍາລັງເກັບໜ່ວຍ ກິດລາຍວິຊາໃນຫຼັກສູດ

3)       ຫຼັກສູດປະລິນຍາໂທ ກົດໝາຍທຸລະກິດ ດໍາເນີນການຮຽນ-ການສອນ ມາແລ້ວ 8 ຮຸ່ນ ແລະ ຈົບການສຶກສາມາແລ້ວ 6 ຮຸ່ນ, ຮຸ່ນທີ 7 ແມ່ນກໍາລັງກະກຽມຂຽນວິທະຍານິພົນ ແລະ ຮຸ່ນທີ 8 ແມ່ນກໍາລັງເກັບໜ່ວຍ ກິດລາຍວິຊາ ໃນຫຼັກສູດ

4)       ຫຼັກສູດປະລິນຍາໂທ ກົດໝາຍສາກົນ ທີ່ສິດສອນ ແລະ ຂຽນວິທະຍານິພົນ ເປັນພາສາອັງກິດ (ຫຼັກສູດນີ້ຮ່ວມມື ກັບມະຫາວິທະຍາໄລ ລີຢົງ 3 ຂອງປະເທດ ຝລັ່ງ) ໄດ້ດໍາເນີນການຮຽນ-ການສອນມາແລ້ວ 3 ຮຸ່ນ,ຈົບການສຶກສາ ໄປແລ້ວ 2 ຮຸ່ນ ແລະ ຮຸ່ນທີ 3 ກໍາລັງຂຽນວິທະຍານິພົນ.

ມາຮອດປັດຈຸບັນ, ມີຜູ້ສໍາເລັດການສຶກສາລະດັບປະລິນຍາໂທ ຈາກ 4 ຫຼັກສູດ ຈໍານວນ 536 ຄົນ ໃນນີ້ເປັນເພດຍິງ 162 ຄົນ, ສ່ວນນັກສຶກສາທີ່ກໍາລັງສຶກສາຢູ່ປັດຈຸບັນ ມີ 199 ຄົນ ຍິງ 53 ຄົນ. ໃນນີ້ກົດໝາຍສາກົນ ມີ 18 ຄົນ, ຍິງ 8 ຄົນ, ກົດໝາຍທຸລະກິດ 53 ຄົນ, ຍິງ 18 ຄົນ, ກົດໝາຍການປົກຄອງ ມີ 51 ຄົນ ຍິງ 14 ຄົນ ແລະ ນິຕິສາດ 85 ຄົນ, ຍິງ 13 ຄົນ.

ສໍາລັບນັກສຶກສາທີ່ຈົບການສຶກສາໃນມື້ນີ້, ປະກອບມີ ທັງໝົດ 26 ທ່ານ, ຍິງ 4 ທ່ານ ໃນນີ້ນັກສຶກສາປະລິນຍາໂທ ສາຂາ ກົດໝາຍທຸລະກິດ ຈໍານວນ 9 ທ່ານ, ຍິງ 1 ທ່ານ, ປະລິນຍາໂທ ສາຂາ ນິຕິສາດ 7 ທ່ານ ຍິງ 1 ທ່ານ ແລະ ນັກສຶກສາປະລິນຍາໂທ ສາຂາກົດໝາຍການປົກຄອງ 10 ທ່ານ ຍິງ 2 ທ່ານ.

3). ລະບົບການຮຽນ-ການສອນ

          ການຮຽນ-ການສອນ ຢູ່ ຄນລ ແບ່ງອອກເປັນ 3 ລະບົບ ຄື:

–         ຮຽນຕອນແລງ ວັນຈັນ-ສຸກ ເລີ່ມເວລາ 16.30-20.30 ໂມງ ຊຶ່ງປະຕິບັດກ່ອນປີ 2023

–         ຮຽນແບບເປັນໂມດູນ ວັນເສົາ ແລະ ອາທິດ ເວລາ 8.30-16.30 ໂມງ ເລີ່ມແຕ່ ເດືອນ ມີນາ 2022 ພາຍຫຼັງມີການປັບປຸງຫຼັກສູດ ຕາມຂໍ້ຕົກລົງວ່າດ້ວຍມາດຕະຖານ ຫຼັກສູດແຫ່ງຊາດລະດັບປະລິນຍາໂທ ເລກທີ 4487/ສສກ, ລົງວັນທີ 2 ຕຸລາ 2020.

–         ຮຽນແບບ 2 ວິຊາ ຕໍ່ວັນ ຄື ວັນ ເສົາ ຕອນເຊົ້າ ເລີ່ມເວລາ 8.30-12;00 ໂມງ 1 ວິຊາ, ຕອນບ່າຍວັນເສົາ ເລີ່ມ ເວລາ 13.30-16.30 ໂມງ 1 ວິຊາ ແລະ ວັນອາທິດ ຕອນເຊົ້າ ເລີ່ມເວລາ 8.30-12;00 ໂມງ 1 ວິຊາ, ຕອນບ່າຍວັນເສົາ ເລີ່ມ ເວລາ 13.30-16.30 ໂມງ 1 ວິຊາ ລວມທັງໝົດ 1 ອາທິດ ໄດ້ຮຽນ 4 ວິຊາ ຫຼື 4 ວິຊາ ຕໍ່ໜຶ່ງພາກຮຽນ.

4). ອາຈານສອນ, ຊີ້ນໍາ ແລະ ປ້ອງກັນ ວິທະຍານິພົນ

ອາຈານສອນ, ຊີ້ນໍາ ແລະ ປ້ອງກັນ ວິທະຍານິພົນ ແມ່ນປະຕິບັດຕາມເງື່ອນໄຂທີ່ກໍານົດໄວ້ໃນຂໍ້ຕົກລົງວ່າດ້ວຍ ມາດ ຕະຖານຫຼັກສູດແຫ່ງຊາດລະດັບ ປະລິນຍາໂທ ເລກທີ 4487/ສສກ, ລົງວັນທີ 2 ຕຸລາ 2020 ແລະ ການຕົກລົງເຫັນດີຂອງຄະນະ ຮັບຜິດຊອບຫຼັກສູດຊີ້ນໍາລວມຫຼັກສູດ ທີ່ພາຍໃຕ້ການຊີ້ນໍາຂອງທ່ານຮອງອະທິການບໍດີ ມະຫາວິທະຍາໄລແຫ່ງຊາດ.

ປັດຈຸບັນ ອາຈານສອນ, ຊີ້ນໍາວິທະຍານິພົນ ແລະ ເປັນກໍາມະການຂອງ ຄນລ ມີຈໍານວນ ທັງໝົດ 53 ທ່ານ, ຊຶ່ງ ປະກອບມີ ສາດສະດາຈານ ປະລິນຍາເອກ 3 ທ່ານ, ຮອງສາດສະດາຈານ ປະລິນຍາເອກ 2 ທ່ານ, ອາຈານ ປະລິນຍາເອກ ຈໍານວນ 3 ທ່ານ, ປະລິນຍາເອກ 15 ທ່ານ, ສາດສະດາຈານ ປະລິນຍາໂທ 2 ທ່ານ, ຮອງສາດສະດາຈານ ປະລິນຍາໂທ ຈໍານວນ 3 ທ່ານ, ອາຈານປະລິນຍາໂທ 12 ທ່ານ ທີ່ເຫຼືອແມ່ນອາຈານປະລິນຍາໂທ ທີ່ມີຄວາມຊ່ຽວຊານສະເພາະດ້ານ ເຊັ່ນ ຮອງປະທານສານປະຊາຊົນສູງ ສຸດ, ຫົວໜ້າກົມສົນທິສັນຍາ ແລະ ກົດໝາຍ ກະຊວງການຕ່າງປະເທດ ແລະ ອື່ນໆ.

5). ອາຄານ, ສະຖານທີ່ ແລະ ສິ່ງອໍານວຍຄວາມສະດວກ

ອາຄານການຮຽນ-ການສອນ ລະດັບປະລິນຍາໂທ ຂອງ ຄນລ ແມ່ນນໍາໃຊ້ອາຄານ ຫ້ອງສະໝຸດ ທີ່ປະກອບມີ 3 ຊັ້ນ. ໃນນີ້ຊັ້ນທີ 3 ນັບແຕ່ຫ້ອງ L1 – L5 ແມ່ນໃຊ້ສໍາລັບການຮຽນ-ການສອນຂອງທັງ 4 ສາຂາ, ສ່ວນຫ້ອງ L6 ແມ່ນເປັນຫ້ອງສໍາລັບພັກຜ່ອນຂອງຄູ-ອາຈານ. ອາຄານຊັ້ນ 1-2 ຂອງອາຄານ ແມ່ນຫ້ອງສະໝຸດ ແລະ ຫ້ອງຄົ້ນຄວ້າ ຊຶ່ງນັກສຶກສາສາມາດເຂົ້າໃຊ້ບໍລິການໄດ້ ເພາະວ່າເປີດບໍລິການ 7 ວັນ ຕໍ່ອາທິດ. ຫ້ອງສະໝຸດຂອງ ຄນລ ມີປຶ້ມອ່ານຫຼາຍກວ່າ 10.000 ເຫຼັ້ມ ແລະ ນັກສຶກສາຍັງສາມາດ ເຂົ້າອ່ານປຶ້ມຜ່ານຫ້ອງສະໝຸດ ອອນລາຍ ຫຼື (E-library) ພາຍຫຼັງທີ່ໄດ້ເຂົ້າເປັນສະມາຊິກຫ້ອງສະໝຸດ ຄນລ ແລະ ສາມາດດາວ ໂລດ ເອກະສານກ່ຽວຂ້ອງຂອງມະຫາວິທະຍາໄລທົ່ວໂລກ ໂດຍບໍ່ເສຍຄ່າ.

6). ບັນຫາ ແລະ ສິ່ງທ້າທາຍ

ໄປຄຽງຄູ່ກັບຜົນສໍາເລັດ ແລະ ຜົນງານກ່ຽວກັບການຮຽນ-ການສອນຂ້າງເທິງນັ້ນ, ການຄຸ້ມຄອງ ແລະ ບໍລິຫານຫຼັກສູດ ກໍຄືປະຕິບັດຫຼັກສູດ ຍັງປະສົບກັບບັນຫາ ແລະ ສິ່ງທ້າທາຍ ຄື:

          1). ການສໍາເລັດການສຶກສາ ຕາມຕາຕະລາງການຮຽນ-ການສອນ ຍັງມີໜ້ອຍ ສະແດງອອກໃນພາກຮຽນ 1 ສົກສຶກສາ 2024-2025 ມີນັກສຶກສາຄາດວ່າ ຈະຈົບ 83 ຄົນ, ແຕ່ສໍາເລັດ ຕົວຈິງ ພຽງ 26 ຄົນ ຫຼື ເທົ່າກັບ 31.32% ທັງນີ້ກໍຍ້ອນວ່າ ຫຼັກສູດ ສາມາດ ຮຽນໄດ້ເຖິງ 5 ປີ ຫຼື 10 ພາກຮຽນ;

          2). ນັກສຶກສາປະລະການຮຽນ ຍັງມີຢູ່ໃນແຕ່ລະສົກຮຽນ;

          3). ຄວາມກະຕືລືລົ້ນໃນການສຶກສາ ແລະ ການປະຕິບັດລະບຽບການຮຽນ-ການສອນຂອງນັກສຶກສາ ຍັງບໍ່ທັນສູງ;

          4). ເວທີໃນການສະເໜີບົດຄວາມວິຊາການ ແລະ ຕີພິມບົດຄວາມວິຊາການ ໃນສາຂາ ກົດໝາຍຕ່າງໆ ຍັງບໍ່ທັນພຽງພໍ ກັບຄວາມຕ້ອງການຂອງນັກສຶກສາ;

7). ແຜນການໃນຕໍ່ໜ້າ

          1). ເອົາໃຈໃສ່ຕິດຕາມການຮຽນ-ການສອນທຸກສາຂາ ຢ່າງເປັນປະຈໍາ ແລະ ຕໍ່ເນື່ອງ;

          2). ແຈ້ງການເປີດຮັບນັກສຶກສາປະລິນຍາໂທ ສາຂາ ນິຕິສາດ ຮຸ່ນທີ 15 ໃນເດືອນ ມີຖຸນາ 2024 ນີ້;

          3). ຕິດຕາມການຂໍສະເໜີຮັບຮອງຫຼັກສູດປະລິນຍາເອກ ສາຂາ ນິຕິສາດ ນໍາ ກະຊວງສຶກສາທິການ ແລະ ກິລາ ເພື່ອໃຫ້ ທັນເປີດຮັບນັກສຶກສາ ໃນ ເດືອນ 3 ປີ 2025;

          4). ສົມທົບກັບ ຄະນະນິຕິສາດ ມະຫາວິທະຍາໄລ ຊັງມູແລັງ ລີອົງ 3 ດໍາເນີນການປັບປຸງຫຼັກສູດ ປະລິນຍາໂທ ສາຂາ ກົດໝາຍສາກົນ;

          5). ພັດທະນາຫຼັກສູດ ການພົວພັນສາກົນ ເປັນພາສາລາວ ເພື່ອໃຫ້ ທັນເປີດຮັບນັກສຶກສາ ໃນ ເດືອນ 3 ປີ 2025;

          6). ສະເໜີຄະນະວິຊາ ຈັດໃຫ້ມີເວທີການນໍາສະເໜີ ແລະ ຕີພິມບົດຄວາມວິຊາການ ເພື່ອຮອງຮັບເງື່ອນໄຂຈົບການສຶກສາ ຕາມມາດຕະຖານຫຼັກສູດແຫ່ງຊາດ ລະດັບປະລິນຍາໂທ;

          7). ຕິດຕາມ ການເບີກຈ່າຍຄ່າແຮງງານສິດສອນ, ຊີ້ນໍາບົດ ໃຫ້ທັນກັບສະພາບການ;

          8). ສ້າງກິດຈະກໍາຮ່ວມ ລະຫວ່າງ ອາຈານ ແລະ ນັກສຶກສາປະລິນຍາໂທ ເພື່ອຮັບຕ້ອນກອງປະຊຸມ 3 ຂັ້ນຂອງພັກ ແລະ ວັນສໍາຄັນຂອງພັກ-ຂອງຊາດ.

 ພ້ອມນັ້ນ, ໃນທີ່ປະຊຸມຍັງໄດ້ມອບປະກາສະນີຍະບັດ ໃຫ້ແກ່ນັກສຶກສາ ຜູ້ສໍາເລັດການສຶກສາ ດັ່ງກ່າວ ໂດຍການມອບຂອງທ່ານ ຮອງສາດສະດາຈານ ປະລິນຍາເອກ ເດຊານຸລາດ ແສນດວງເດດ, ຮອງອະທິການບໍດີ ມະຫາວິທະຍາໄລແຫ່ງຊາດ

ຮູບພາບບັນຍາກາດພາຍໃນງານ