ຄນລ ຈັດກອງປະຊຸມທາບທາມບຸກຄະລາກອນ,ປະກາດຕໍາແໜ່ງຮອງຄະນະບໍດີ ແລະ ຫົວໜ້າພາກວິຊາພົວພັນສາກົນ
ໃນຕອນເຊົ້າວັນທີ 3 ກັນຍາ 2021, ຄະນະນິຕິສາດ ແລະ ລັດຖະສາດ(ຄນລ), ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີ ປະກາດແຕ່ງຕັ້ງຕໍາແໜ່ງ ຮອງຄະນະບໍດີ ແລະ ຕໍາແໜ່ງ ຫົວໜ້າພາກວິຊາ ພົວພັນສາກົນ ຂຶ້ນທີ່ຫ້ອງປະຊຸມ B10 ຄນລ. ໂດຍ ການເຂົ້າຮ່ວມເປັນປະທານຂອງທ່ານ ຮສ.ປອ ຮຸ່ງເພັດ ຈັນທະວົງ ຮອງອະທິການບໍດີ ມຊ ແລະມີ ຄະນະບໍດີ, ຮອງຄະນະບໍດີ, ບັນດາຫົວໜ້າ ແລະຮອງພາກວິຊາ, , ຫົວໜ້າ ແລະຮອງພະແນກ, ຫົວໜ້າ ແລະຮອງໜ່ວຍວິຊາ ພ້ອມດ້ວຍພະນັກງານ, ຄູ-ອາຈານພາຍໃນຄະນະເຂົ້າຮ່ວມ.
ໃນກອງປະຊຸມໄດ້ຮັບຟັງການເຜີຍແຜ່ນິຕິກໍາດ້ານການເງີນໂດຍບັນລະຍາຍຂອງ ທ່ານ ກອງມາ ນາຊາລັດ ຫົວໜ້າພະແນກການເງີນ ຄນລ ,ໃນພິທີດັ່ງກ່າວ ທ່ານ ຄໍາເຟືອງ ລໍວັນໄຊ ຫົວໜ້າຫ້ອງການຈັດຕັ້ງ ແລະຄຸ້ມຄອງພະນັກງານ ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງ ອຈ. ປອ ສົມເດດ ແກ້ວວົງສັກ ເປັນຮອງຄະນະບໍດີ ແລະແຕ່ງຕັ້ງ ທ່ານ ອຈ ປທ ແກ້ວສາຍຈົງ ສາຍສຸວັນນະວົງ ເປັນຫົວໜ້າພາກວິຊາພົວພັນສາກົນ,ຫລັງຈາກນັ້ນກໍ່ໄດ້ລົງຄະແນນສຽງເພື່ອທາບທາມບຸກຄະລາກອນຕໍາແໜ່ງຮອງຫົວໜ້າພາກວິຊາພົວພັນສາກົນ ແລະ ຕໍາແໜ່ງຫົວໜ້າພະແນກການສຶກສາຫຼັງປະລິນຍາຕີ.
ໃນໂອກາດດັ່ງກ່າວ, ທ່ານ ຮສ. ປອ. ຮຸ່ງເພັດ ຈັນທະວົງ ຮອງອະທິການບໍດີ ມຊ ໄດ້ໂອ້ລົມ ຕໍ່ພິທີ ເຊິ່ງທ່ານໄດ້ກ່າວຍ້ອງຍໍຊົມເຊີຍຕໍ່ຜົນສຳເລັດ ທີ່ບັນດາພະນັກງານ, ຄູ-ອາຈານທີ່ໄດ້ຖຸ່ມເທສະຕິປັນຍາ ແລະເຫື່ອແຮງຂອງຕົນປະກອບສ່ວນເຂົ້າໃນການພັດທະນາ ຄນລ ກໍຄື ມຊ ເວົ້າລວມ; ເວົ້າສະເພາະແມ່ນໄດ້ເອົາໃຈໃສ່ພັດທະນາເຄື່ອງມືການສິດສອນໃຫ້ສອດຄ່ອງກັບຄວາມຕ້ອງການຂອງສັງຄົມ ຢ່າງມີຄວາມຮັບຜິດຊອບສູງຕະຫຼອດໄລຍະເວລາຜ່ານມາ. ພ້ອມນັ້ນ, ທ່ານຍັງໄດ້ກ່າວເນັ້ນໃຫ້ ຜູ້ໄດ້ຮັບຕໍາແໜ່ງໃໝ່ ກໍຄື ຄະນະນໍາ ຄນລ ຈົ່ງສືບຕໍ່ຍົກສູງຄວາມຮັບຜິດຊອບ ໃນການຊີ້ນໍາໆພາ ການຈັດຕັ້ງປະຕິບັດແຜນ 5 ປີຕໍ່ໜ້າໂດຍສະເພາະແມ່ນການສ້າງພະນັກງານສືບທອດປ່ຽນແທນທາງດ້ານບໍລິຫານ ແລະວິຊາການ. ສໍາລັບຄູ-ອາຈານໃຫ້ເພີ່ມທະວີໃນການປະຕິບັດໜ້າທີ່ຂອງຕົນເອງຂຶ້ນຕື່ມໂດຍສະເພາະແມ່ນ ດ້ານການສິດສອນ, ການສຶກສາຄົ້ນຄວ້າວິໄຈ, ທ່ານກ່າວຕື່ມວ່າ ຄວາມຈໍາເປັນພາວະວິໄສ ໃນການປະຕິບັດໜ້າທີ່ວຽກງານທີ່ຖືກມອບໝາຍໃຫ້ສຳເລັດນັ້ນ ກໍຄື ການຍົກສູງຄວາມຮູ້ ແລະຄວາມສາມດຂອງຄູອາຈານ ຄວນມີ 5 ດ້ານຄື: 1. ຍົກສູງວິຊາສະເພາະຂອງຕົນເອງ; 2. ຍົກລະດັບຄວາມຮູ້ ດ້ານການເມືອງ, ແນວທາງການພັດທະນາຂອງລັດຖະບານກໍຄືຂອງພັກ; 3. ຄວາມຮູ້ທາງດ້ານ ICT ເຂົ້າໃນການຈັດຕັ້ງການສອນແບບອອນລາຍ. 4. ຄວາມຮູ້ທາງດ້ານການບໍລິຫານເວລາ ແລະບໍລິຫານການເງິນ, ແລະ 5. ການສ້າງສາຍພົວພັນຮ່ວມມືກັບອົງກອນຂອງລັດ ແລະສາກົນ.
