ພິທີປະກາດຈັດຕັ້ງຕໍາແໜ່ງບໍລິຫານປະເພດ IV ຂອງຄະນະນິຕິສາດ ແລະ ລັດຖະສາດ,ມຊ ຄັ້ງວັນທີ14 ຕຸລາ 2021

ໃນຕອນເຊົ້າວັນທີ 14 ຕຸລາ 2021, ຄະນະນິຕິສາດ ແລະ ລັດຖະສາດ(ຄນລ), ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີ ປະກາດແຕ່ງຕັ້ງຕໍາແໜ່ງ ຫົວໜ້າພະແນກການສຶກສາຫຼັງປະລິນຍາຕີ  ແລະ ຕໍາແໜ່ງ ຮອງຫົວໜ້າພາກວິຊາ ພົວພັນສາກົນ ຂຶ້ນທີ່ຫ້ອງປະຊຸມ B10 ຄນລ. ໂດຍ ການເຂົ້າຮ່ວມເປັນປະທານຂອງທ່ານ ຮສ.ໂພສີ ທິບດາວັນ   ຮອງອະທິການບໍດີ ມຊ ແລະມີ ຄະນະບໍດີ, ຮອງຄະນະບໍດີ, ບັນດາຫົວໜ້າ ແລະຮອງພາກວິຊາ, , ຫົວໜ້າ ແລະຮອງພະແນກ, ຫົວໜ້າ ແລະຮອງໜ່ວຍວິຊາ ພ້ອມດ້ວຍພະນັກງານ, ຄູ-ອາຈານພາຍໃນຄະນະເຂົ້າຮ່ວມ.

ໃນກອງປະຊຸມໄດ້ຮັບຟັງການກ່າວສະພາບລວມ ແລະ ມີຄໍາເຫັນໂອ້ລົມຕໍ່ພະນັກງານ,ຄູ-ອາຈານຂອງ ທ່ານ ຮສ.ວຽງວິໄລ ທ່ຽງຈັນໄຊ ຄະນະບໍດີ  ຄນລ ,ໃນພິທີດັ່ງກ່າວ ທ່ານ ນາງ ທອງລວນ ຂາວສະອາດ ຮອງຫົວໜ້າຫ້ອງການຈັດຕັ້ງ ແລະຄຸ້ມຄອງພະນັກງານ ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງ ທ່ານ. ປອ ສີພາ ຈັນທະວົງ ເປັນຫົວໜ້າພະແນກການສຶກສາຫຼັງປະລິນຍາຕີ  ແລະແຕ່ງຕັ້ງ ທ່ານ.ປທ ປາງທອງ ໄຊຍະວົງ ເປັນຮອງຫົວໜ້າພາກວິຊາພົວພັນສາກົນ.

ໃນໂອກາດດັ່ງກ່າວ, ທ່ານ ຮສ.ໂພສີ ທິບດາວັນ   ຮອງອະທິການບໍດີ ມຊ ໄດ້ໂອ້ລົມ ຕໍ່ພິທີ ເຊິ່ງທ່ານໄດ້ກ່າວຍ້ອງຍໍຊົມເຊີຍຕໍ່ຜົນສຳເລັດ ທີ່ບັນດາພະນັກງານ, ຄູ-ອາຈານທີ່ໄດ້ຖຸ່ມເທສະຕິປັນຍາ ແລະເຫື່ອແຮງຂອງຕົນປະກອບສ່ວນເຂົ້າໃນການພັດທະນາ ຄນລ ກໍຄື ມຊ ເວົ້າລວມ; ເວົ້າສະເພາະແມ່ນໄດ້ເອົາໃຈໃສ່ພັດທະນາເຄື່ອງມືການສິດສອນໃຫ້ສອດຄ່ອງກັບຄວາມຕ້ອງການຂອງສັງຄົມ ຢ່າງມີຄວາມຮັບຜິດຊອບສູງຕະຫຼອດໄລຍະເວລາຜ່ານມາ. ພ້ອມນັ້ນ, ທ່ານຍັງໄດ້ກ່າວເນັ້ນໃຫ້ ຜູ້ໄດ້ຮັບຕໍາແໜ່ງໃໝ່,ຈົ່ງສືບຕໍ່ຍົກສູງຄວາມຮັບຜິດຊອບທາງດ້ານການເມືອງ ໃນການຊີ້ນໍາໆພາ ການຈັດຕັ້ງປະຕິບັດແຜນ 5 ປີຕໍ່ໜ້າໂດຍສະເພາະແມ່ນການສ້າງພະນັກງານສືບທອດປ່ຽນແທນທາງດ້ານບໍລິຫານ ແລະວິຊາການ. ສໍາລັບຄູ-ອາຈານໃຫ້ເພີ່ມທະວີໃນການປະຕິບັດໜ້າທີ່ຂອງຕົນເອງຂຶ້ນຕື່ມໂດຍສະເພາະແມ່ນ ດ້ານການສິດສອນ, ການສຶກສາຄົ້ນຄວ້າວິໄຈ, ທ່ານກ່າວຕື່ມວ່າ ຄວາມຈໍາເປັນພາວະວິໄສ ໃນການປະຕິບັດໜ້າທີ່ວຽກງານທີ່ຖືກມອບໝາຍໃຫ້ສຳເລັດນັ້ນ ກໍຄື ການຍົກສູງຄວາມຮູ້ ແລະຄວາມສາມດຂອງຄູອາຈານ ຄວນມີ 5 ດ້ານຄື: 1. ຍົກສູງວິຊາສະເພາະຂອງຕົນເອງ; 2. ຍົກລະດັບຄວາມຮູ້ ດ້ານການເມືອງ, ແນວທາງການພັດທະນາຂອງລັດຖະບານກໍຄືຂອງພັກ; 3. ຄວາມຮູ້ທາງດ້ານ ICT ເຂົ້າໃນການຈັດຕັ້ງການສອນແບບອອນລາຍ. 4. ຄວາມຮູ້ທາງດ້ານການບໍລິຫານເວລາ ແລະບໍລິຫານການເງິນ, ແລະ 5. ການສ້າງສາຍພົວພັນຮ່ວມມືກັບອົງກອນຂອງລັດ ແລະສາກົນ.