ພະແນກວິຊາການ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ(ມຊ) ໄດ້ຈັດກອງປະຊຸມແລກປ່ຽນບົດຮຽນ ແລະ ປະສົບການກ່ຽວກັບວຽກງານການປະກັນຄຸນນະພາບການສຶກສາລະຫວ່າງ 13 ຄະນະວິຊາພາຍໃນ ມະຫາວິທະຍາໄລແຫ່ງຊາດ,ທີ່ທ່າລາດ,ແຂວງວຽງຈັນ - FLP

ໃນວັນທີ 26-28 ກັນຍາ 2022 ນີ້, ພະແນກວິຊາການ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ(ມຊ) ໄດ້ຈັດກອງປະຊຸມແລກປ່ຽນບົດຮຽນ ແລະ ປະສົບການກ່ຽວກັບວຽກງານການປະກັນຄຸນນະພາບການສຶກສາລະຫວ່າງ 13 ຄະນະວິຊາພາຍໃນ ມະຫາວິທະຍາໄລແຫ່ງຊາດ,ທີ່ທ່າລາດ,ແຂວງວຽງຈັນ. ໃຫ້ກຽດເຂົ້າຮ່ວມໂດຍທ່ານ ຮສ.ໂພສີ ທິບດາວັນ ຮອງອະທິການບໍດີ ມຊ, ມີທ່ານ ຮສ. ວຽງວິໄລ ທ່ຽງຈັນໄຊ ຄະນະບໍດີ ຄນລ, ມີຮອງຫົວໜ້າກົມປະກັນຄຸນນະພາບການສຶກສາ ຈາກກະຊວງສຶກສາທິການ ແລະ ກິລາ, ຮອງຄະນະບໍດີ,ຫົວໜ້າຫ້ອງການ ມະຫາວິທະຍາໄລແຫ່ງຊາດ,ຫົວໜ້າຫ້ອງການວິຊາການ ມຊ ມີຜູ້ຕາງໜ້າ ຮອງຄະນະບໍດີ,ຫົວໜ້າພະແນກວິຊາການຈາກ 13 ຄະນະວິຊາ ແລະ ພະນັກງານ, ຄູ-ອາຈານທີ່ກ່ຽວຂ້ອງເຂົ້າຮ່ວມ.

ຈຸດປະສົງຂອງກອງປະຊຸມ ເພື່ອເປັນການແລກປ່ຽນບົດຮຽນ ແລະ ປະສົບການກ່ຽວກັບວຽກງານການປະກັນຄຸນນະພາບການສຶກສາລະຫວ່າງຄະນະວິຊາພາຍໃນ ມະຫາວິທະຍາໄລແຫ່ງຊາດ,ເພື່ອເປັນການແບ່ງປັນບົດຮຽນ ແລະ ປະສົບການຂອງ ຄະນະນິຕິສາດ ແລະ ລັດຖະສາດ (ຄນລ,ມຊ)ກ່ຽວກັບການປະເມີນຫຼັກສູດປະລິນຍາຕີຕາມມາດຕະຖານຂອງ AUN ໃຫ້ທຸກຄະນະວິຊາພາຍໃນ ມະຫາວິທະຍາໄລແຫ່ງຊາດ

ໃນໂອກາດດັ່ງກ່າວ ທ່ານ ຮສ.ໂພສີ ທິບດາວັນ ຮອງອະທິການບໍດີ ມະຫາວິທະຍາໄລແຫ່ງຊາດ ໄດ້ກ່າວວ່າ ມື້ນີ້ພວກເຮົາໄດ້ມາຖອດຖອນບົດຮຽນກັບ ຄະນະນິຕິສາດ ແລະ ລັດຖະສາດ ຫລື ເອີ້ນຊື່ຫຍໍ້ວ່າ ຄນລ ເປັນຕົ້ນກໍ່ມີຢູ່ວ່າອັນທີໜື່ງ ມະຫາວິທະຍາໄລແຫ່ງຊາດພວກເຮົາໄດ້ຮັບການປະເມີນລະດັບ AUN-QA, ສອງຫລັກສູດກ່ອນ ຫລັງຈາກປະເມີນສອງຫລັກສູດແລ້ວ,ໄດ້ປະເມີນອີກສາມຫລັກສູດ ໃນສາມຫລັກສູດຄະແນນຍັງບໍ່ທັນອອກມາເທື່ອ ຫລັງຈາກນັ້ນການປະເມີນຂອງພວກເຮົາທຸກຄະນະຕ້ອງໄດ້ປະເມີນຈາກພາຍນອກ ພາຍໃນພວກເຮົາກໍ່ເຮັດຢູ່ແລ້ວ ສະນັ້ນຜົນທີປະເມີນນີ້ກໍ່ມີຫລາຍຢ່າງທີ່ຄະນະນໍາ,ຫົວໜ້າພະແນກ,ຫົວໜ້າຫ້ອງການຕ່າງໆທີ່ມີສ່ວນກ່ຽວຂ້ອງພວກເຮົາກໍ່ຕ້ອງໄດ້ຄິດບາງອັນພວກເຮົາເຮັດໄດ້ ແຕ່ວ່າບາງອັນເຮົາເຮັດບໍ່ໄດ້ ກໍ່ຕ້ອງໄດ້ສະເໜີໃຫ້ລັດຖະບານຮັບຮູ້ວ່າຖ້າເຮົາຢາກເຊື່ອມໂຍງກັບພາກພື້ນ ແລະ ສາກົນ ເຮົາຄວນເຮັດແນວໃດ ຖ້າພວກເຮົາບໍເຮັດປະກັນຄຸນນະພາບການສຶກສາໄດ້ ພວກເຮົາກໍ່ບໍ່ສາມາດເຊື່ອມໂຍງກັບສາກົນໄດ້, ຂ້າພະເຈົ້າເຊື່ອໝັ້ນວ່າ ຂໍ້ຮຽກຮ້ອງໃຫ້ບັນດາທ່ານທີ່ເຂົ້າຮ່ວມໄດ້ຟັງລະອຽດວ່າເພີ່ນມີຄໍາເຫັນຫຍັງມາ ຂໍໃຫ້ເຂັ້ມຂຸ້ນນໍາກັນ ເຮັດໃຫ້ກອງປະຊຸມສຳເລັດຕາມເປົ້າໝາຍ,ສຸດທ້າຍຂໍອ່ອຍພອນໃຫ້ທຸກທ່ານທີ່ເຂົ້າຮ່ວມກອງປະຊຸມ ຈົ່ງມີສຸຂະພາບເຂັ້ມແຂງ.

ໃນກອງປະຊຸມເປັນກຽດມອບໃບຢັ້ງຢືນທີ່ຜ່ານການປະເມີນປະກັນຄຸນນະພາບການສຶກສາລະດັບ AUN-QA ມອບໂດຍ ທ່ານ ຮສ.ໂພສີ ທິບດາວັນ ຮອງອະທິການບໍດີ ມະຫາວິທະຍາໄລແຫ່ງຊາດ ໃຫ້ສອງພາກວິຊາ ຄື: ພາກວິຊາລັດຖະສາດ ແລະ ພາກວິຊາພົວພັນສາກົນ ຄະນະນິຕິສາດ ແລະ ລັດຖະສາດ (ມຊ).