ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ໄດ້ຈັດກອງປະຊຸມການສໍາມະນາກ່ຽວກັບການວິເຄາະຕໍາແໜ່ງງານ,ການຂຽນກຳນົດຕໍາແໜ່ງງານ
ໃນວັນທີ 11-13 ຕຸລາ 2023 ນີ້, ຄະນະນິຕິສາດ ແລະລັດຖະສາດ (ຄນລ) ມະຫາວິທະຍາໄລແຫ່ງຊາດ (ມຊ), ໄດ້ຈັດກອງປະຊຸມການສໍາມະນາກ່ຽວກັບວິເຄາະຕໍາແໜ່ງງານ,ການຂຽນກຳນົດຕໍາແໜ່ງງານ,ທີ່ ຫ້ອງປະຊຸມຣີສອດນາປ່າກວາງ,ເມືອງແກ້ວອຸດົມ,ແຂວງວຽງຈັນ, ໂດຍການເປັນປະທານຮ່ວມຂອງທ່ານ ຮສ. ໂພສີ ທິບດາວັນ ຮອງອະທິການບໍດີ ມຊ, ທ່ານ ຮສ. ປອ. ວຽງວິໄລ ທ່ຽງຈັນໄຊ ຄະນະບໍດີ ຄນລ, ມີທ່ານຮອງຄະນະບໍດີ, ແຂກຖືກເຊີນ, ຫົວໜ້າພາກວິຊາ,ຮອງຫົວໜ້າພາກວິຊາ,ຫົວໜ້າພະແນກ,ຮອງຫົວໜ້າພະແນກ,ພະນັກງານ, ຄູ-ອາຈານ ເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມການສໍາມະນາກ່ຽວກັບວິເຄາະຕໍາແໜ່ງງານ, ການຂຽນກໍານົດຕໍາແໜ່ງງານ ເພື່ອສາມາດກໍານົດໄດ້ແຜນຄວາມຕ້ອງການພະນັກງານ, ການປະເມີນລັດຖະກອນ (ຄູ ແລະ ບໍລິຫານ) ຂອງພະນັກງານ ຄູ-ອາຈານ, ວຽກງານປະກັນສັງຄົມ ແລະ ກອງທຶນຄູແຫ່ງຊາດ ຂອງຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ
ການດໍາເນີນກອງປະຊຸມ:
1. ການເຊື່ອມຊຶມເອກະສານມີດັ່ງນີ້:
– ລະບົບປະກັນສັງຄົມພາຍໃຕ້ກົດໝາຍວ່າດ້ວຍການປະກັນສັງຄົມ ເລກທີ 54/ສພຊ (ສະບັບປັບປຸງ);
– ຂໍ້ຕົກລົງວ່າດ້ວຍກອງທຶນສະຫວັດດີການຄູແຫ່ງຊາດ ເລກທີ 8000/ສສກ, ນະຄອນຫຼວງວຽງຈັນ, ວັນທີ 12 ທັນວາ 2022;
– ດໍາລັດວ່າດ້ວຍລັດຖະກອນຄູ ເລກທີ 202, ນະຄອນຫຼວງວຽງຈັນ ວັນທີ 12 ພຶດສະພາ 2023;
– ການປະເມີນລັດຖະກອນ (ຄູ ແລະ ບໍລິຫານ);
– ດໍາລັດວ່າດ້ວຍການກໍານົດຕໍາແໜ່ງງານ ເລກທີ 734/ລບ, ນະຄອນຫຼວງວຽງຈັນ,ທວັນທີ 31 ທັນວາ 2021;
– ຄໍາແນະນໍາກ່ຽວກັບການຈັດຕັ້ງປະຕິບັດດໍາລັດວ່າດ້ວຍການກໍານົດຕໍາແໜ່ງງານ, ສະບັບເລກທີ 734/ລບ, ລົງວັນທີ 31 ທັນວາ 2021;
ຜ່ານການເຊື່ອມຊຶມເອກະສານ ໄດ້ມີການສົນທະນາແລກປ່ຽນຄໍາຄິດເຫັນທາງວິຊາການຢ່າງຟົດຟື້ນຕໍ່ກັບເອກະສານທັງ 6 ສະບັບ.
2. ການຈັດແບ່ງກຸ່ມ ເປັນ 4 ກຸ່ມ: ກຸ່ມທີ 1 ພາກວິຊາກົດໝາຍແພ່ງ, ອາຍາ ແລະ ກົດໝາຍທຸລະກິດ, ກຸ່ມທີ 2 ພາກວິຊາລັດຖະສາດ ແລະ ພົວພັນສາກົນ, ກຸ່ມທີ 3 ພະແນກຈັດຕັ້ງ ແລະ ຄຸ້ມຄອງພະນັກງານ, ພະແນກບໍລິຫານ ແລະ ສັງລວມ, ພະແນກການເງິນ ແລະ ຊັບສິນ, ພະແນກຄຸ້ມຄອງນັກສຶກສາ, ກຸ່ມທີ 4 ພະແນກວິຊາການ, ພະແນກການຫຼັງປະລິນຍາຕີ, ພະແນກຄົ້ນຄ້ວາວິທະສາດ ແລະ ພະແນກຫ້ອງສະໝຸດ ເພື່ອລະດົມຄວາມຄິດເຫັນ ໃນການກໍານົດຕໍາແໜ່ງງານຂອງພະແນກການ ແລະ ພາກວິຊາ ພ້ອມທັງນໍາສະເໜີຜົນຂອງການກໍານົດດັ່ງກ່າວໃນກອງປະຊຸມ ແລະ ປະກອບຄໍາເຫັນຕໍ່ກັບການກໍານົດຕໍາແໜ່ງງານຂອງພະແນກການ ແລະ ພາກວິຊາ.
3. ຂໍ້ສະເໜີ:
– ສະເໜີຕໍ່ ມຊ ແລະ ຄນລ ເຮັດຫຼຽນກາສະເຫຼີມສະຫຼອງວັນຄູແຫ່ງຊາດ ຄົບຮອບ 30 ປີ ຫຼື ມະຫາວິທະຍາໄລແຫ່ງຊາດ ຄົບຮອບ 28 ປີ;
– ສະເໜີຕໍ່ຄະນະວິຊາໃຫ້ຂຽນພາລະບົດບາດ ສິດ ແລະ ໜ້າທີ່ຂອງຄະນະວິຊາໃຫ້ລະອຽດຈະແຈ້ງຂຶ້ນຕື່ມ;
– ສະເໜີພະແນກຈັດຕັ້ງ ແລະ ຄຸ້ມຄອງພະນັກງານກວດກາຄືນກ່ຽວກັບສະຖິຕິການປະກັນສັງຄົມຂອງພະນັກງານຄູອາຈານໃນຄະນະວິຊາ ບໍ່ສອດຄ່ອງກັບ ສະຖິຕິຈໍາຜູ້ປະກັນຕົນທີ່ຂຶ້ນຢູ່ກະຊວງແຮງງານ.
ກອງປະຊຸມໄດ້ປິດລົງໃນເວລາ 12:00 ໂມງ ຂອງວັນທີ 13 ພະຈິກ 2023, ມອບໃຫ້ພະແນກຈັດຕັ້ງ ແລະ ຄຸ້ມຄອງພະນັກງານ ສໍາເນົາໃຫ້ພາກສ່ວນທີ່ກ່ຽວຂ້ອງ ເພື່ອເປັນພື້ນຖານໃນການຈັດຕັ້ງປະຕິບັດ.
