ພິທິສະຫຼຸບຊຸດຮຽນ 2018-2022 ປະຈໍາສົກສຶກສາ 2021-2022, ໄຂສົກຮຽນໃໝ່ ສົກສຶກສາ 2022-2023

ໃນວັນທີ 06 ຕຸລາ 2022 ທີ່ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ໄດ້ຈັດພິທິສະຫຼຸບຊຸດຮຽນ 2018-2022 ປະຈໍາສົກສຶກສາ 2021-2022, ໄຂສົກຮຽນໃໝ່ ສົກສຶກສາ 2022-2023 ຂື້ນຢູ່ຫ້ອງປະຊຸມ L01 ໂດຍເປັນກຽດເປັນປະທານ ໂດຍ ທ່ານ ຮສ. ວຽງວິໄລ ທ່ຽງຈັນໄຊ ຄະນະບໍດີ ຄນລ ມີບັນດາ ອະດິດຄະນະບໍດີ,ອາຈານອາວຸໂສ,ອາຈານຮັບເຊີນ, ຮອງຄະນະບໍດີ, ຫົວໜ້າພາກວິຊາ, ຫົວໜ້າພະແນກ, ຫົວໜ້າສູນ, ຄູ-ອາຈານ, ພະນັກງານ ແລະ ນັກສຶກສາ ເຂົ້າຮ່ວມຢ່າງພ້ອມພຽງ

ໃນໂອກາດພິທີສະຫຼຸບຊຸດຮຽນ 2018-2022 ປະຈໍາສົກສຶກສາ 2021-2022, ໄຂສົກຮຽນໃໝ່ ສົກສຶກສາ 2022-2023 ຂື້ນຜ່ານບົດສະຫຼຸບ ໂດຍທ່ານ ອຈ.ປອ. ສົມເດດ ແກ້ວວົງສັກ ຮອງຄະນະບໍດີ ຝ່າຍວິຊາການ ທ່ານໄດ້ກ່າວວ່າ : ມື້ນີ້ ຂ້າພະເຈົ້າຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງ ທີ່ຂື້ນມາລາຍງານເນື່ອງໃນພິທີສະຫຼຸບຊຸດຮຽນ 2018-2022 ປະຈໍາສົກສຶກສາ 2021-2022 ແລະໄຂສົກຮຽນໃຫມ່ 2022-2023 ອີງໃສ່ພາບໃນປັດຈຸບັນໃນທ່າມກາງການແຜ່ລະບາດຂອງພະຍາດໂຄວິດ 19 ໃນຊຸມຊົນ ແລະ ແຜ່ລະບາດເປັນວົງກວ້າງ ເຮັດໃຫ້ສະຖານະການມີປ່ຽນແປງໃນຫຼາຍດ້ານ ດັ່ງນັ້ນ ຂ້າພະເຈົ້າຂໍສະຫຼຸບລາຍງານການເຄື່ອນໄຫວວຽກງານຂອງຄະນະນິຕິສາດ ແລະ ລັດຖະສາດ ໃນດ້ານຕ່າງໆ ໂດຍສັງເຂບລາຍລະອຽດດັ່ງນີ້:

ສະພາບລວມ

ຄະນະນິຕິສາດ ແລະ ລັດຖະສາດ ເປັນຄະນະໜື່ງໃນ 13 ຄະນະວິຊາທີ່ຂື້ນກັບ ມະຫາວິທະຍາໄລແຫ່ງຊາດ ຊື່ງມີພາລະບົດບາດໃນການກໍ່ສ້າງນັກວິຊາການທາງດ້ານກົດໝາຍ, ການປົກຄອງ ແລະ ການຕ່າງປະເທດ ໃນລະດັບປະລິນຍາຕີ ແລະ ປະລິນຍາໂທ ເພື່ອຕອບສະໜອງນັກວິຊາການໃຫ້ໄດ້ຕາມຄວາມຮຽກຮ້ອງຕ້ອງການຂອງປະເທດຊາດ.

ໃນການພັດທະນາຄຸນນະພາບການສຶກສາ ຄະນະນິຕິສາດ ແລະ ລັດຖະສາດ ໄດ້ຖືເອົາວຽກງານການພັດທະນາດ້ານວິຊາການເປັນເປົ້າໝາຍທີ່ສຳຄັນ ແລະ ເປັນວຽກບູລິມະສິດ.  ນອກຈາກການເອົາໃຈໃສ່ປັບປຸງພັດທະນາຕົນເອງຢ່າງຮອບດ້ານ ຍັງມີຄວາມຈຳເປັນຕ້ອງໄດ້ແລກປ່ຽນບົດຮຽນກັບບັນດາຄະນະວິຊາຕ່າງໆ ຢູ່ພາຍໃນ ແລະ ຕ່າງປະເທດ ໂດຍສະເພາະວຽກງານການພັດທະນາທາງດ້ານວິຊາການ, ຄຽງຄູ່ກັນນັ້ນ ຄະນະນິຕິສາດ ແລະ ລັດຖະສາດ ຍັງມີຊ່ຽວຊານຊ່ວຍໃຫ້ຄຳແນະນຳ ແລະ ມີການຝຶກອົບຮົມກ່ຽວກັບວຽກງານຫລັກສູດ ແລະ ວຽກງານປັບປຸງຄຸນນະພາບການສຶກສາ ເພື່ອເຮັດໃຫ້ຄຸນນະພາບການສຶກສາຂອງ ຄະນະນິຕິສາດ ແລະ ລັດຖະສາດ ສາມາດບັນລຸຕາມແຜນຍຸດທະສາດຂອງ ມະຫາວິທະຍາໄລແຫ່ງຊາດວາງອອກ ແລະ ນັບມື້ນັບກ້າວເຂົ້າສູ່ມາດຖານໃນພາກພື້ນ ແລະ ສາກົນເທື່ອລະກ້າວ.

ຄຽງຄູ່ກັບການສິດສອນທາງດ້ານວິຊາສະເພາະ, ຄະນະນິຕິສາດ ແລະລັດຖະສາດ ຍັງໄດ້ເອົາໃຈໃສ່ສຶກສາອົບຮົມທາງດ້ານການເມືອງແນວຄິດ ໃຫ້ແກ່ນັກສຶກສາເປັນປະຈຳ ໂດຍຜ່ານວິທີການ ແລະ ກິດຈະກຳ ເຊັ່ນ ການສິດສອນໃນຫຼັກສູດ, ການປະຖະກະຖາ ແລະ ການຢ້ຽມຊົມສະຖານທີ່ມູນເຊື້ອຕ່າງໆ.

ແຜນພັດທະນາທາງດ້ານວິຊາການ ຂອງຄະນະນິຕິສາດ ແລະ ລັດຖະສາດ ໄດ້ຖືເອົາພາກວິຊາ, ພະແນກ ແລະ ສູນເປັນໃຈກາງໃນການປະສານສົມທົບກັບພາກສ່ວນທີ່ກ່ຽວຂ້ອງ ຊື່ງລວມມີການພັດທະນາຫຼັກສູດ ແລະ ວິທີການສິດສອນ, ກິດຈະກໍາເສີມຫຼັກສູດ, ການປະກັນຄຸນນະພາບການສຶກສາ, ການຂຽນປື້ມຕໍາລາ ແລະ ການຄົ້ນຄວ້າວິທະຍາສາດ ໃຫ້ສອດຄ່ອງກັບສະພາບຄວາມເປັນຈິງ.

ມາຮອດປັດຈຸບັນນີ້ ຄະນະນິຕິສາດ ແລະ ລັດຖະສາດ ສາມາດກໍ່ສ້າງນັກວິຊາການລະດັບປະລິນຍາຕີໄດ້ເຖິງ 26 ຊຸດ ແລະ ລະດັບປະລິນຍາໂທນິຕິສາດໄດ້ 11 ຮຸ່ນ, ປະລິນຍາໂທ ສາຂາກົດໝາຍປົກຄອງ 6 ຮຸ່ນ, ປະລິນຍາໂທ ສາຂາກົດໝາຍທຸລະກິດ 5 ຮຸ່ນ ແລະ ປະລິນຍາໂທ ສາຂາກົດໝາຍສາກົນ 2 ຮຸ່ນ.

ໂຄງປະກອບການຈັດຕັ້ງ ຂອງ ຄນລ ປະກອບມີ 5 ພາກວິຊາ, 8 ພະແນກ ແລະ 1 ສູນ;

ດ້ານບຸກຄະລາກອນ ຄນລ ປະກອບມີ ຄະນະບໍດີ 1 ທ່ານ, ຮອງຄະນະບໍດີ 3 ທ່ານ, ຫົວໜ້າພາກວິຊາ 5 ທ່ານ, ຫົວໜ້າພະແນກ 8 ທ່ານ ແລະ ຫົວໜ້າສູນ 1 ທ່ານ.

ປັດຈຸບັນ ຄນລ ປະກອບມີ: ຄູ-ອາຈານ, ພະນັກງານ, ນັກສຶກສາ  ແລະ ຫຼັກສູດທີ່ເປີດສອນ ເຊິ່ງມີລາຍລະອຽດດັ່ງນີ້:

ກ. ຄູ-ອາຈານ ແລະ ພະນັກງານ

ຄູ-ອາຈານ ແລະ ພະນັກງານ ລວມທັງໝົດ 94 ທ່ານ, ຍິງ 42 ທ່ານ, ພະນັກງານບໍລິຫານທົ່ວໄປ ລວມມີ 15 ທ່ານ, ຍິງ 12 ທ່ານ, ອາຈານສອນ ລວມມີ 79 ທ່ານ, ຍິງ 30 ທ່ານ  ໃນນັ້ນມີຮອງສາດສະດາຈານ 2 ທ່ານ, ຍິງ 1 ທ່ານ; ອາຈານ 17 ທ່ານ, ຍິງ 2 ທ່ານ ແລະ ຜູ້ຊ່ວຍອາຈານ 9 ທ່ານ, ຍິງ 5 ທ່ານ.

ມີວຸດທິການສຶກສາລະດັບປະລິນຍາເອກມີ  7 ທ່ານ, ຍິງ 2 ທ່ານ, ປະລິນຍາໂທມີ 69 ທ່ານ, ຍິງ 28 ທ່ານ, ລະດັບປະລິນຍາຕີ 16 ທ່ານ, ຍິງ 10 ທ່ານ, ຊັ້ນສູງ 1 ທ່ານ, ຍິງ 1 ທ່ານ ແລະ ຊັ້ນກາງ 1 ທ່ານ, ຍິງ 1 ທ່ານ.

ຂ. ນັກສຶກສາ

ໃນສົກສຶກສາ 2021-2022 ຄນລ ມີນັກສຶກສາທັງໝົດ 1.648 ຄົນ, ຍິງ 871 ຄົນ, ໃນນັ້ນມີນັກສຶກສາປະລິນຍາຕີ 1.459 ຄົນ, ຍິງ 814 ຄົນ ແລະ ນັກສຶກສາປະລິນຍາໂທ 189 ຄົນ,​ ຍິງ 57 ຄົນ.

ສົກສຶກສາ 2021-2022 ຄນລ ມີນັກສຶກສາ ປີ 4 ທັງໝົດ 365 ຄົນ, ຍິງ 199 ຄົນ ໃນນັ້ນມີນັກສຶກສາ ທີ່ສຳເລັດການສຶກສາທັງໝົດ 342 ຄົນ, ຍິງ 188 ຄົນ ຄິດເປັນເປີເຊັນ 97%. ມີນັກສຶກສາຕົກຄ້າງທັງໝົດ 23 ຄົນ, ຍິງ 11 ຄົນ. ໃນຊຸດຮຽນນີ້ ມີນັກສຶກສາ ຂອງ ຄນລ ໄດ້ຮັບໃບປະກາສະນີຍະບັດ ກຽດນິຍົມ ຈໍານວນ 19 ຄົນ, ຍິງ 12 ຄົນ (ພາກວິຊາກົດໝາຍທຸລະກິດ ຈໍານວນ 2 ຄົນ, ຍິງ 1 ຄົນ; ພາກວິຊາພົວພັນສາກົນ ຈໍານວນ 16 ຄົນ, ຍິງ 10 ຄົນ ແລະ ພາກວິຊາກົດໝາຍປົກຄອງ ຈໍານວນ 1 ຄົນ, ຍິງ 1 ຄົນ). ນັກສຶກສາ ລະດັບປະລິນຍາໂທ ສຳເລັດການສຶກສາ ທັງໝົດ 60 ຄົນ, ຍິງ 19 ຄົນ.

ແຍກຕາມຫຼັກສູດ ມີີດັ່ງນີ້: ຫຼັກສູດກົດໝາຍແພ່ງ ສຳເລັດການສຶກສາ 44 ຄົນ, ຍິງ 22 ຄົນ

                             ຫຼັກສູດກົດໝາຍອາຍາ ສຳເລັດການສຶກສາ 57 ຄົນ, ຍິງ 21 ຄົນ

                             ຫຼັກສູດການປົກຄອງ ສຳເລັດການສຶກສາ 64 ຄົນ, ຍິງ 30 ຄົນ

                             ຫຼັກສູດພົວພັນສາກົນ ສຳເລັດການສຶກສາ 77 ຄົນ, ຍິງ 54 ຄົນ

                             ຫຼັກສູດກົດໝາຍທຸລະກິດ ສຳເລັດການສຶກສາ 56 ຄົນ, ຍິງ 35 ຄົນ

                             ຫຼັກສູດນິຕິສາດ (ລະບົບຕໍ່ເນື່ອງ) ສຳເລັດການສຶກສາ 18 ຄົນ, ຍິງ 12 ຄົນ

                             ຫຼັກສູດກົດໝາຍອາຍາ (ລະບົບຕໍ່ເນື່ອງ) ສຳເລັດການສຶກສາ 26 ຄົນ, ຍິງ 14 ຄົນ

ຄ. ຫຼັກສູດການຮຽນ-ການສອນ 

ໃນປັດຈຸບັນ ຄະນະນິຕິສາດ ແລະ ລັດຖະສາດ ມີຫຼັກສູດການຮຽນ -ການສອນ ທັງໝົດ 13 ຫຼັກສູດດັ່ງນີ້:

ຫຼັກສູດປະລິນຍາຕີ ມີ 9 ຫຼັກສູດ ແລະ ຫຼັກສູດປະລິນຍາໂທ ມີ 4 ຫຼັກສູດ.

1. ຕີລາຄາສະພາບການເຄື່ອນໄຫວແຕ່ລະດ້ານ

1. ດ້ານດີ

1) ດ້ານການເມືອງແນວຄິດ

ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ໄດ້ເອົາໃຈໃສ່ໃນການສຶກສາອົບຮົມແນວຄວາມຄິດຂອງນັກສຶກສາພາຍໃນຄະນະໃຫ້ມີຄວາມຄິດອຸ່ນອ່ຽງທຸ່ນທ່ຽງ ຕາມທິດນໍາຂອງມະຫາວິທະຍາໄລແຫ່ງຊາດ  ເຖິງແມ່ນວ່ານັກສຶກສາຈະພົບບັນຫາທາງດ້ານສະພາບແວດລ້ອມ, ເສດຖະກິດສັງຄົມ ແລະ ການແພ່ລະບາດຂອງພະຍາດໂຄວິດ-19 ແຕ່ນັກສຶກສາກໍມີແນວຄິດຫຼັກໜັ້ນ ຕໍ່ແນວທາງນະໂຍບາຍ ແລະ ການຊີ້ນໍາ-ນໍາພາຂອງພັກ-ລັດ, ພ້ອມນັ້ນຍັງຕັ້ງໜ້າສຶກສາຮໍ່າຮຽນຝຶກຝົນຫຼໍ່ຫຼອມຕົນເອງໃຫ້ມີຄວາມຮູ້, ຄວາມສາມາດ, ມີຄຸນສົມບັດສິິນທໍາປະຕິວັດ, ມີຄວາມອົດທົນຜ່ານຜ່າອຸປະສັກ, ມີຄວາມສາມັກຄີພາຍໃນ ແລະ ພາຍນອກ, ມີສະຕິຕໍ່ການຈັດຕັ້ງສູງ, ເຄົາລົບກົດລະບຽບໄດ້ຢ່າງເຄັ່ງຄັດແລະ ຮູ້ຈັກປັບໂຕເຂົ້າກັບການປ່ຽນແປງຂອງສັງຄົມ.

2) ດ້ານການ​ຮຽນ

– ນັກສຶກສາໄດ້ສຶກສາຄົ້ນຄວ້າຮໍ່າຮຽນຕາມຫຼັກສູດການຮຽນ-ການສອນທີ່ກໍານົດໄວ້ໃນແຕ່ລະພາກຮຽນຢ່າງເປັນປົກກະຕິ, ສາມາດຮັບຮູ້ ແລະ ເຂົ້າໃຈເນື້ອໃນທາງດ້ານກົດໝາຍ ແລະ ຮັບປະກັນທາງດ້ານຄຸນນະພາບ.

– ນັກສຶກສາໄດ້ມີການສຶກສາຮໍ່າຮຽນເປັນຈຸ, ເປັນກຸ່ມ,​ ເຂົ້າຮຽນເປັນປົກກະຕິ (ໃນຮູບແບບອອນລາຍ ແລະ ນັກສຶກສາຈໍານວນໜຶ່ງໄດ້ມາຮຽນເຊິ່ງໜ້າໃນຊ່ວງຜ່ອນຜັນພະຍາດໂຄວິດ-19), ນັກສຶກສາມີຄວາມກ້າຫານປະກອບຄໍາຄິດຄໍາເຫັນ ແລະ ຮຽນຮູ້ໃນການພັດທະນາຕົນເອງຢ່າງມີຫົວຄິດປະດິດສ້າງ.

3)ດ້ານການເຄື່ອນໄຫວນອກຫຼັກສູດ

ຄະນະນິຕິສາດ ແລະ ລັດຖະສາດ ໄດ້ເອົາໃຈໃສ່ຊີ້ນຳ -ນຳພາ ໃຫ້ມີກິດຈະກຳເສີມທັກສະ, ຄວາມຮູ້ ໂດຍປະຕິບັດຕາມ 3 ລັດສະນະ 5 ຫຼັກມູນຂອງການສຶກສາ. ນອກຈາກການຮຽນວິຊາສະເພາະແລ້ວ, ນັກສຶກສາຍັງໄດ້ປະກອບສ່ວນເຂົ້າໃນວຽກງານນອກຫຼັກສູດຄື: ມີການຈັດກອງປະຊຸມອາຊຽນ QUIZ, ແຂ່ງຂັນສານຈໍາລອງ MOOT COURT, ການແຂ່ງຂັນຖາມ-ຕອບ ຂອງກຸ່ມນັກສຶກສາ ALSA ທາງອອນລາຍ, ກິດຈະກໍາແລກປ່ຽນລະຫວ່າງນັກສຶກສາ, ຕັ້ງຄ້າຍຂອງນັກສຶກສາພາກພົວພັນສາກົນ ແລະ ອອກແຮງງານລວມ.

4) ດ້ານການປະກັນຄຸນນະພາບການສຶກສາ

ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ໄດ້ຈັດການປະເມີນຫຼັກສູດທັງ 5 ສາຂາ ຕາມມາດຕະຖານຄຸນນະພາບຂອງເຄືອຂ່າຍມະຫາວິທະຍາໄລອາຊຽນ (ແບບອອນລາຍ) ຈໍານວນ 2 ຄັ້ງ ຄື: ຄັ້ງທີ 246 ແລະ ຄັ້ງທີ 249 ເຊິ່ງ 2 ຫຼັກສູດ (ສາຂາກົດໝາຍປົກຄອງ ແລະ ສາຂາພົວພັນສາກົນ) ແມ່ນໄດ້ຜ່ານມາດຕະຖານອາຊຽນ ASEAN ແລະ ໄດ້ຮັບໃບຢັ້ງຢືນເປັນທີ່ຮຽບຮ້ອຍແລ້ວ. ສ່ວນອີກ 3 ຫຼັກສູດ ຄັ້ງທີ 249 ແມ່ນຍັງສືບຕໍ່ປັບປຸງອີກໄລຍະໜຶ່ງປີ.

2. ດ້ານຂໍ້ຄົງຄ້າງ

– ຄູອາຈານຈໍານວນໜຶ່ງຍັງຖືເບົາຕໍ່ກັບການເຂົ້າຄະແນນໃນລະບົບຖານຂໍ້ມູນ.

– ນັກສຶກສາຈໍານວນໜຶ່ງຍັງບໍ່ລົງທະບຽນຮຽນໃນລະບົບຖານຂໍ້ມູນເຮັດໃຫ້ບໍ່ມີລາຍຊື່ໃນເວລາທີ່ອາຈານປະຈໍາວິຊາ

ເຂົ້າຄະແນນ.

          – ການຈັດຕັ້ງການຮຽນ-ການສອນບາງລາຍວິຊາຍັງບໍ່ສາມາດປະຕິບັດຕາມແຜນການຮຽນ-ການສອນທີ່ກໍານົດໄວ້.

– ນັກສຶກສາບາງຄົນຍັງຂາດຄວາມເປັນເຈົ້າການໃນການປະຕິບັດລະບຽບເຂົ້າຮຽນໃນລະບົບອອນລາຍ, ຂາດຄວາມຮັບຜິດຊອບບາງຄັ້ງຄາວ, ການຊອກຮູ້ຮໍ່າຮຽນ ແລະ ການຝຶກຝົນຕົນເອງໃຫ້ກາຍເປັນແບບຢ່າງທີ່ດີຍັງບໍ່ທັນເຮັດໄດ້ດີເທົ່າທີ່ຄວນ. 

– ນັກສຶກສາບາງຄົນຍັງບໍ່ທັນເປັນເຈົ້າການໃນການຄົ້ນຄວ້າຮໍ່າຮຽນ, ຍັງມີແນວຄິດຈົ່ງຈຽມບໍ່ກ້າສະແດງອອກໃນການສົນທະນາແລກປ່ຽນບົດຮຽນ ແລະ ຕອບຄໍາຖາມໃນເວລາອາຈານສອນ.

– ຍັງມີນັກສຶກສາຈໍານວນໜຶ່ງບໍ່ທັນເອົາໃຈໃສ່ໃນການເຄື່ອນໄຫວກິດຈະກໍາຕ່າງໆ, ບໍ່ເຂົ້າຮ່ວມກິດຈະກໍາ ຂອງພາກວິຊາຈັດຂຶ້ນເຊັ່ນ: ງານກິລາ, ສິລະປະ ແລະ ຂະບວນການອື່ນໆ ບາງຈໍານວນແມ່ນຢູ່ບໍ່ສຸດກົກສຸດປາຍ.

ບັນຫາແລະສິ່ງທ້າທາຍຂອງຄະນະວິຊາ

– ການພັດທະນາຫຼັກສູດຕາມມາດຖານ QA-AUN ຍັງເປັນວຽກງານອັນໜັກໜ່ວງຂອງບັນດາອາຈານແລະນັກວິຊາການ

– ການສ້າງຫຼັກສູດໃໝ່, ຫຼັກສູດສາກົນ ແລະ ການກະກຽມໂຄງການຫຼັກສູດ ປ ເອກ

– ການນຳໃຊ້ການອ້າງອີງທາງດ້ານກົດໝາຍ ຊຶ່ງເປັນຂໍ້ລິເລີ້ມໃໝ່ໃນການ ຄຄ ວິທະຍາສາດກົດໝາຍ

– ທ່າອ່ຽງຂອງການລົງທຶນເຂົ້າໃສ່ການສຶກສາຫຼຸດລົງ (ການເກັບລາຍຮັບວິຊາການ) ແລະ ຄວາມຕ້ອງການໃນພາກຕົວຈິງສູງຂຶ້ນ(ເປັນມາດຕະຖານພາກພື້ນແລະສາກົນ)

– ການພັດທະນາລະບົບຖານຂໍ້ມູນແລະ e-admin

ແຜນວຽກງານປະຈໍາສົກສຶກສາ 2022-2023

1. ວຽກງານແນວຄິດການເມືອງ

ສືບຕໍ່ ຊີ້ນຳ-ນຳພາ ສຶກສາອົບຮົມແນວຄິດຄຸນສົມບັດສິນທຳປະຕິວັດ, ຄຸນທາດການເມືອງຂອງພະນັກງານ, ຄູ-ອາຈານ ແລະ ນັກຮຽນ-ນັກສຶກສາ ໃຫ້ມີແນວຄິດອຸ່ນອ່ຽງທຸນທ່ຽງ, ເຊື່ອໝັ້ນການນຳພາຂອງພັກ, ຍຶດໝັ້ນໃນອຸດົມການຂອງພັກ, ຕັ້ງໜ້າພັດທະນາວິຊາຊີບ, ວິຊາການ, ຕັ້ງໜ້າປະຕິບັດໜ້າທີ່ການເມືອງຂອງຕົນໃຫ້ດີ, ປະຕິບັດຕາມກົດໝາຍ-ກົດລະບຽບຕ່າງໆທີ່ວາງໄວ້ ຢ່າງເປັນປະຈໍາ.

2. ວຽກງານດ້ານວິຊາການ

– ສືບຕໍ່ເປີດ-ຮັບນັກສຶກສາ ໃນລະດັບປະລິນຍາຕີ ແລະ ປະລິນຍາໂທ ຕາມແຜນທີ່ກໍານົດໄວ້.

– ສືບຕໍ່ສົ່ງເສີມ ການຮ່ວມມືກັບໂຄງການຮ່ວມມືຕ່າງປະເທດ ແລະ ສະຖາບັນກົດໝາຍຕ່າງໆ ທັງພາຍໃນ ແລະ ຕ່າງປະເທດເຊັ່ນ:ໂຄງການຮ່ວມມືກັບຕ່າງປະເທດ: ໂຄງການ ລາວ/031 ປະເທດລຸກຊໍາບວກ, ໂຄງການສົ່ງເສີມການພັດທະນາ ແລະ ສ້າງຄວາມເຂັ້ມແຂງລັດທີ່ປົກຄອງດ້ວຍກົດໝາຍ (J-ROL), ມະຫາວິທະຍາໄລ ຂອງປະເທດຍີ່ປຸ່ນ ( ນາໂກຢາ, ເຄໂອ), ມະຫາວິທະຍາໄລອາຊຽນ ແລະ ການຮ່ວມມືກັບມະຫາວິທະຍາໄລອື່ນໆ

ການຈັດຕັ້ງປະຕິບັດ

• ນໍາເອົາທິດທາງ ແລະ ແຜນການໄປຜັນຂະຫຍາຍໃຫ້ຄູ–ອາຈານ, ນັກຮຽນ – ນັກສຶກສາ ຮັບຊາບ ແລະ ຫັນເປັນແຜນການຈັດຕັ້ງໃຫ້ບັນລຸຜົນສໍາເລັດ.
• ຊຸກຍູ້, ຕິດຕາມ ແລະ ປະເມີນຜົນການຈັດການຮຽນ – ການສອນ, ການປະຕິບັດໜ້າວຽກ ທັງສາຍພັກ, ສາຍລັດ, ການຈັດກິດຈະກຳນອກຫຼັກສູດ ແລະ ວຽກງານ 3 ອົງການຈັດຕັ້ງມະຫາຊົນ.
• ຊີ້ນຳ, ຕິດຕາມ, ກວດກາ ແລະ ການແບ່ງໜ້າທີ່ຮັບຜິດຊອບມີການປະຊຸມ ເພື່ອລາຍງານ ແລະ ຖອດຖອນບົດຮຽນເປັນແຕ່ລະໄລຍະ.

ບັນດາທ່ານແຂກຜູ້ມີກຽດ ໃນໄລຍະ 1 ປີທີ່ຜ່ານມາ ພວກເຮົາມີສິ່ງທ້າທາຍ ແລະ ທົດສອບຫຼາຍຢ່າງພໍສົມຄວນ ເນື່ອງຈາກການແຜ່ລະບາດຂອງພະຍາດ ໂຄວິດ-19 ແຕ່ພວກເຮົາໄດ້ດຳເນີນການຮຽນ-ການສອນ ດ້ວຍຮູບແບບອອນລາຍ ຢ່າງເປັນປົກກະຕິ ເຊິ່ງເຫັນໄດ້ຈາກ ຄູ -ອາຈານ ທຸກທ່ານ ໄດ້ຮຽນຮູ້ວິທີການໃຫມ່ໆ ແລະ ນຳໃຊ້ເຕັກນິກເຂົ້າໃນການຮຽນ-ການສອນ ບໍວ່າຈະສອນຜ່ານລະບົບ Google meet, Zoom, Google Classroom ແລະ ຮູບແບບອື່ນໆທີ່ຫລາກຫລາຍ ຈົນເຮັດໃຫ້ນັກສຶກສາ ສາມາດເຂົ້າໃຈບົດຮຽນໄດ້ເປັນຢ່າງດີ, ມີການຖາມ-ຕອບ ກັບຄູອາຈານ ແລະ ສາມາດປະສົບຜົນນຳເລັດຕາມຄາດໝາຍທີ່ວາງໄວ້.

        ສຸດທ້າຍນີ້, ຂໍອວຍພອນໄຊໃຫ້ ທ່ານ ຮສ ວຽງວິໄລ ທ່ຽງຈັນໄຊ ຄະນະບໍດີ ຄນລ ມະຫາວິທະຍາໄລແຫ່ງຊາດ, ຈົ່ງມີສຸຂະພາບແຂງແຮງ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ, ຂໍອວຍພອນໃຫ້ ບັນດາທ່ານ ຜູ້ມີກຽດ ທ່ານ ຍິງ ແລະ ທ່ານ ຊາຍ, ບັນດາທ່ານຮອງຄະນະບໍດີ, ຫົວໜ້າພາກ, ຫົວໜ້າພະແນກ, ຄູ-ອາຈານ, ພະນັກງານ ແລະ ນັກສຶກສາ ຈົ່ງມີສຸຂະພາບແຂງແຮງ, ມີຄວາມສຸກ ແລະ ປະສົບຜົນສຳເລັດວຽກງານຂອງຕົນ.

ພາບບັນຍາກາດ 01, ພາບບັນຍາກາດ 02