ກອງປະຊຸມໃຫຍ່ຄັ້ງທີ VII ຂອງຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ຮາກຖານ ຄນລ
ຕອນບ່າຍວັນທີ 26 ເມສາ 2019 ນີ້, ຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດໄດ້ຈັດກອງປະຊຸມໃຫຍ່ຄັ້ງທີ VII ຂອງຕົນຂຶ້ນ ທີ່ຫ້ອງປະຊຸມ ຊັ້ນສາມ L1 ຕຶກອາເນກປະສົງ, ໂດຍການເປັນປະທານຂອງ ສະຫາຍ ຮສ. ປທ. ວຽງວິໄລ ທ່ຽງຈັນໄຊ ເລຂາຄະນະພັກຮາກຖານ ຄະນະບໍດີ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ, ເປັນກຽດເຂົ້າຮ່ວມຂອງສະຫາຍ ສະຫາຍ ສີສຸພັນ ພົມມະວົງ ຄະນະບໍລິຫານງານຊາວໜຸ່ມ ກະຊວງສຶກສາ ແລະ ກິລາ ຮອງເລຂາຄະນະບໍລິຫານງານຊາວໜຸ່ມ ມະຫາວິທະຍາໄລແຫ່ງຊາດ, ມີຜູ້ຕາງໜ້າຈາກ 3 ອົງການຈັດຕັ້ງມະຫາຊົນ, ມີເລຂາ-ຮອງເລຂາ ຄະນະບໍລິຫານງານຊາວໜຸ່ມຈາກ15 ຮາກຖານອ້ອມຂ້າງມະຫາວິທະຍາໄລແຫ່ງຊາດ, ມີຫົວໜ້າໜ່ວຍ-ຮອງໜ່ວຍ, ຫົວໜ້າຈຸ-ຮອງຈຸພ້ອມດ້ວຍສະມາຊິກຊາວໜຸ່ມພາກສ່ວນພະນັກງານ, ຄູ-ອາຈານ ແລະສະມາຊິກຊາວໜຸ່ມນັກສຶກສາທົ່ວຄະນະນິຕິສາດ ແລະ ລັດຖະສາດເຂົ້າຮ່ວມ.
ໃນພິທີສະຫາຍ ທອງຄຳ ລໍຢາງ ຄະນະບໍລິຫານງານຊາວໜຸ່ມ ເລຂາຄະນະບໍລິຫານງານຊາວໜຸ່ມຄະນະນິຕິສາດ ແລະ ລັດຖະສາດໄດ້ຂຶ້ນຜ່ານບົດສະຫຼຸບວຽກງານການເຄື່ອນໄຫວຊາວໜຸ່ມຮາກຖານຕົນໃນໄລຍະຜ່ານມາ ແລະຜ່ານທິດທາງແຜນການໃນຕໍ່ໜ້າ; ເຊິ່ງສະຫາຍໄດ້ຍົກໃຫ້ເຫັນຜົນງານອັນພົ້ນເດັ່ນທີ່ຄະນະບໍລິຫານງານຊາວໜຸ່ມຮາກຖານຕົນໄດ້ສຸມເຫື່ອແຮງ ແລະສະຕິປັນຍາພ້ອມກັນຕັ້ງໜ້າປະຕິບັດເຮັດລ້ອນໜ້າທີ່ຕາມຂັ້ນເທິງມອບໝາຍໃຫ້ຈົນສໍາເລັດເປັນຕົ້ນແມ່ນວຽກງານກິດຈະກໍາການສ້າງຂະບວນການຕ່າງໆໂດຍສະເພາະແມ່ນການເຂົ້້າຮ່ວມກິດຈະກໍາການບໍລິຈາກເລືອດຊ່ວຍເຫຼືອສັງຄົມ, ການອອກແຮງຕ້ອນຮັບວັນສໍາຄັນຕ່າງໆຂອງຊາດ ກໍຄືທຸກໆກິດຈະກໍາທີ່ທາງຂັ້ນເທິງມອບໝາຍໃຫ້ທັງກິດຈະກໍາທັງພາຍໃນ ແລະຕ່າງປະເທດ
ຈາກນັ້ນໃນທີ່ປະຊຸມໄດ້ມີການປ່ອນບັດຄັດເລືອກເອົາຄະນະບໍລິຫານງານຊາວໜຸ່ມຮາກຖານຄະນະນິຕິສາດ ແລະ ລັດຖະສາດຊຸດໃໝ່ສະໄໝທີ VII ຈໍານວນ 5 ສະຫາຍ; ຈາກຜູ້ສະໝັກ7 ສະຫາຍ; ຜົນການປ່ອນບັດ-ຄັດເລືອກ ແມ່ນສະຫາຍ ປທ ນາງ ວິສຸດາ ຈອມມະນີຈັນ ເປັນເລຂາຄະນະບໍລິຫານງານຊາວໜຸ່ມ ຮາກຖານຄະນະນິຕິສາດ ແລະ ລັດຖະສາດ, ສະຫາຍ ປທ ປັນຍາສັກ ແສງອ່ອນແກ້ວ ເປັນຮອງເລຂາຜູ້ທີ1 , ສະຫາຍ ປທ ນາງ ຄອນສະຫວັນ ວົງວັນນະໄຊ ເປັນຮອງເລຂາຜູ້ທີ່ 2, ທັງເປັນປະທານກວດກາ , ສະຫາຍ ປທ ບຸນເລີດ ຊາພັກດີ ເປັນຄະນະ ແລະ ສະຫາຍ ປຕ ນາງ ວິໄລວັນ ທຳມະວົງ ເປັນຄະນະ .
ໂອກາດດຽວກັນ, ສະຫາຍ ຮສ. ປທ. ວຽງວິໄລ ທ່ຽງຈັນໄຊ ເລຂາຄະນະພັກຮາກຖານ ຄະນະບໍດີ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ,ໄດ້ໃຫ້ຄໍາໂອ້ລົມຕໍ່ກອງປະຊຸມ, ເຊິ່ງກ່ອນອື່ນສະຫາຍ ໄດ້ກ່າວຍ້ອງຍໍຊົມເຊີຍຕໍ່ຜົນງານການເຄື່ອນໄຫວ ທີ່ທາງຄະນະບໍລິຫານງານ ຊາວໜຸ່ມ ຄະນະນິຕິສາດ ແລະ ລັດຖະສາດ ຍາດມາໄດ້ໃນໄລຍະຜ່ານມາ, ເຊິ່ງສະຫາຍ ໄດ້ຕີລາຄາສູງ ແລະເປັນເອກະພາບຕໍ່ຜົນງານການເຄື່ອນໄຫວຂອງຄະນະບໍລິຫານງານຊາວໜຸ່ມຮາກຖານຄະນະນິຕິສາດ ແລະ ລັດຖະສາດ; ພ້ອມນັ້ນ ສະຫາຍ ຍັງໄດ້ກ່າວເນັ້ນ ໃຫ້ຄະນະບໍລິຫານງານຊາວໜຸ່ມຊຸດໃໝ່ໃຫ້ເອົາໃຈໃສ່ປະຕິບັດໜ້າທີ່ຂອງຕົນຢ່າງສະເໝີຕົ້ນ
ສະເໝີປາຍ, ໂດຍສະເພາະແມ່ນວຽກງານ 4 ບຸກ, ວຽກງານການສຶກສາອົບຮົມການເມືອງ-ແນວຄິດໃຫ້ແກ່ສະມາຊິກຊາວໜຸ່ມທົ່ວຄະນະນິຕິສາດ ແລະ ລັດຖະສາດ, ຜັນຂະຫຍາຍມູນເຊື້ອອັນດີງາມ ແລະຍາດແຍ່ງເອົາຜົນງານມາໃຫ້ຄະນະນິຕິສາດ ແລະ ລັດຖະສາດ ກໍຄືສະມາຊິກຊາວໜຸ່ມທຸກຄົນພາຍໃນຮາກຖານຊາວໜຸ່ມຄະນະຕົນ.
