ຄະນະບໍລິຫານງານກຳມະບານຮາກຖານ ຄນລ ເປີດກອງປະຊຸມໃຫຍ່ຄັ້ງທີ IV ຂອງຕົນຂຶ້ນ

ໃນຕອນເຊົ້າ ວັນທີ21ພຶດສະພາ2019ນີ້, ຄະນະບໍລິຫານງານສະຫະພັນກຳມະບານ ຮາກຖານ ຄະນະນິຕິສາດ ແລະ ລັດຖະສາດ (ຄນລ) ມະຫາວິທະຍາໄລແຫ່ງຊາດ ໄດ້ຈັດກອງປະຊຸມໃຫຍ່ຄັ້ງທີ IV ຂອງຕົນຂຶ້ນ ທີ່ຫ້ອງປະຊຸມໃຫຍ່ຊັ້ນ 3 ຂອງ ຄນລ. ໂດຍການເປັນປະທານຂອງ ສະຫາຍ ຮສ. ວຽງວິໄລ ທ່ຽງຈັນໄຊ ຄະນະພັກ ມຊ  ເລຂາຄະນະພັກຮາກຖານ ຄນລ, ຄະນະບໍດີ ຄນລ, ສະຫາຍ ບຸນມີ ພິພັກຄະວົງ ຄະນະປະຈຳ ປະທານກວດກາສະຫະພັນກຳມະບານ ມຊ, ມີປະທານ ສະຫະພັນກໍາມະບານ, ເລຂາຊາວໜຸ່ມ, ປະທານສະຫະພັນແມ່ຍິງ ຄນລ, ບັນດາແຂກຖືກເຊີນ, ມີບັນດາຫົວໜ້າໜ່ວຍ, ຫົວໜ້າຈຸ ແລະສະມາຊິກກໍາມະບານ ຄູ-ອາຈານ ແລະສະມາຊິກກໍາມະບານນັກສຶກສາຄະນະດັ່ງກ່າວເຂົ້າຮ່ວມຈຳນວນ 180 ສະຫາຍ.
ໃນທີ່ປະຊຸມ ສະຫາຍ ປທ. ບຸນຄົງ  ເພັດດາວຮຸ່ງ ປະທານກຳມະບານຮາກຖານ ຄນລ ໄດ້ຂຶ້ນຜ່ານບົດສະຫຼຸບວຽກງານການເຄື່ອນໄຫວຂອງກໍາມະບານຮາກຖານຕົນໃນໄລຍະເວລາ 5ທີ່ຜ່ານມາ  ແລະຜ່ານທິດທາງແຜນການເຄື່ອນໄຫວໃນໄລຍະ 5ປີຕໍ່ໜ້າ; ເຊິ່ງສະຫາຍໄດ້ຍົກໃຫ້ເຫັນຜົນງານຫຼາຍດ້ານ ເປັນຕົ້ນ ແມ່ນດ້ານການເມືອງແນວຄິດ ແມ່ນໄດ້ຈັດຕັ້ງປະຕິບັດເຜີຍແຜເຊື່ຶອມຊຶມເອກະສານຕ່າງໆທີ່ສໍາຄັນຂອງພັກ, ຂອງລັດ, ສູນກາງກໍາມະບານລາວ ແລະສະຫະພັນກໍາມະບານ ມຊ. ໃຫ້ແກ່ພະນັກງານ ແລະສະມາຊິກກໍາມະບານທົ່ວ ຄນລ, ວຽກງານຂະຫຍາຍສະມາຊິກກຳມະບານ ໃນປີ 5ຈະມີການຮັບເອົາມະຫາຊົນກ້າວໜ້າເຂົ້າເປັນສະມາຊິກກຳມະບານ 16ຄັ້ງ ເຮັດໃຫ້ສະມາຊິກກຳມະບານໃນປັດຈຸບັນມີ ທັງໝົດ 1,250 ສະຫາຍ ຍິງ 679 ສະຫາຍ ວຽກງານວິຊາສະເພາະແມ່ນສະມາຊິກແຕ່ລະສະຫາຍໄດ້ເອົາໃຈໃສ່ປະຕິບັດວຽກງານວິຊາສະເພາະຂອງຕົນຢ່າງມີຄວາມຮັບຜິດຊອບສູງ ນອກນັ້ນ ຍັງໄດ້ເຂົ້າຮ່ວມການເຄື່ອນໄຫວ, ການເຮັດກິດຈະກຳຕ່າງໆ ກັບອົງການຈັດຕັ້ງ ຊາວໜຸ່ມ ແລະແມ່ຍິງ, ດ້ານວຽກງານສະຫວັດດີການສັງຄົມ ໄດ້ມີການຊຸກຍູ້ ແລະມອບເງິນອຸດໜູນໃຫ້ແກ່ສະມາຊິກກຳມະບານ ທີ່ເຈັບເປັນ, ເກີດລູກ, ສ້າງຄອບຄົວໃໝ່ ແລະນອນໂຮງໝໍ,ພ້ອມທັງໄດ້ຜ່ານທິດທາງແຜນການໃນ 5 ຕໍ່ໜ້າ, ເຊິ່ງຮາກຖານກໍາມະບານ ຄນລ ຈະສືບຕໍ່ປັບປຸງແບບແຜນວິທີເຮັດວຽກໃນແຕ່ລະຂັ້ນແຕ່ລະດ້ານໃຫ້ປະສົບຜົນສຳເລັດຍິ່ງຂຶ້ນກວ່າເກົ່າ.

  ຈາກນັ້ນ, ໃນທີ່ປະຊຸມໄດ້ປ່ອນບັດ-ຄັດເລືອກເອົາຄະນະບໍລິຫານງານກຳມະບານຊຸດໃໝ່ ຂອງຮາກຖານຕົນ ຈໍານວນເປົ້າໝາຍ 9 ສະຫາຍ, ເລືອກເອົາ 5ສະຫາຍ; ຜົນຂອງການປ່ອນບັດ-ຄັດເລືອກໃນທີ່ປະຊຸມເຫັນດີໃຫ້ສະຫາຍ ປອ. ສົມເດດ  ແກ້ວວົງສັກ ເປັນປະທານຄະນະບໍລິຫານງານ ສະຫະພັນກໍາມະບານຮາກຖານ ຄນລ,  ສະຫາຍ ປທ. ບຸນເຖີງ ສີທອນແກ້ວຈຳປາ ເປັນຮອງ, ສະຫາຍ ປທ. ເລັ່ງສັກ  ບຸດທະລາດ ເປັນປະທານກວດກາ, ສະຫາຍ ປທ. ແກ້ວສາຍຈົງ ສາຍສຸວັນນະວົງ  ແລະ ສະຫາຍ ປທ ນ. ໄກສອນ  ອິນສີລິ ເປັນຄະນະ.
ໃນຕອນທ້າຍພິທີ ສະຫາຍ ຮສ. ວຽງວິໄລ  ທ່ຽງຈັນໄຊ ໄດ້ກ່າວໂອ້ລົມ ແລະໃຫ້ທິດຊີ້ນຳແກ່ ຄະນະບໍລິຫານງານສະຫະພັນກໍາມະບານຊຸດໃໝ່ ເຊິ່ງສະຫາຍໄດ້ຮຽກຮ້ອງມາຍັງທຸກສະຫາຍໃຫ້ເອົາໃຈໃສ່ວຽກງານດ້ານການເມືອງແນວຄິດ, ສິນທຳປະຕິວັດ, ມີຄວາມຈົງຮັກພັກດີຕໍພັກ, ເອົາໃຈໃສ່ໃນການຂຶ້ນຫ້ອງສິດສອນ, ຄົ້ນຄວ້າວິທະຍາສາດ, ເອົາໃຈໃສ່ໃນການເຄື່ອນໄຫວກິດຈະກຳນອກຫລັກສູດ, ເອົາໃຈໃສ່ວຽກງານກອງທຶນສະຫວັດດີການຊ່ວຍເຫລືອເຊິ່ງກັນ ແລະກັນ, ເອົາໃຈໃສ່ການສຶກສາອົບຮົມດ້ວຍຫລາຍຮູບການໃຫ້ມີຫລາຍຮູບຫລາຍສີເພີ່ມທະວີການຕິດຕາມກວດກາຊອກໃຫ້ເຫັນບັນຫາ ແລະເເກ້ໄຂໃຫ້ທັນເວລາ.