ພິທີປາຖະກະຖາ” ວັນຜ່າວົງປິດລ້ອມກອພັນທີ2ວິລະຊົນ” ແລະ ” ວິລະກຳໂຕນຄຸກຢ່າງມະຫັດສະຈັນຂອງຜູ້ນຳພັກ ແລະ ແນວລາວຮັກຊາດຄົບຮອບ 59 ປີ”

ໃນຕອນເຊົ້າຂອງວັນທີ 28 ມິຖຸນາ 2019 ນີ້, ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ໄດ້ຈັດຕັ້ງພິທີ ປາຖະກະຖາເນື່ອງໃນ 2 ວັນປະຫວັດສາດ ຄື: ເຫດການຜ່າວົງປິດລ້ອມ ຂອງກອງພັນທີ 2 ຄົບຮອບ 60 ປີ (18 ພຶດສະພາ 1959-18 ພຶດສະພາ 2019) ແລະວິລະກຳໂຕນຄຸກ ຢ່າງມະຫັດສະຈັນຂອງ ບັນດາຜູ້ນຳແນວລາວຮັກຊາດ ຄົບຮອບ 59 ປີ ( 24 ພຶດສະພາ 1960- 24 ພຶດສະພາ 2019)ຂຶ້ນທີ່ ຫ້ອງປະຊຸມB10 ໂດຍ​ໃຫ້ກຽດຂຶ້ນປາຖະກະຖາຂອງ ທ່ານ ພຈວ ຄຳຜາງ ກອງຈັນແສງ ຮອງປະທານ ສະຫະພັນນັກຮົບເກົ່າແຫ່ງຊາດລາວ, ເຂົ້າຮ່ວມຮັບພິທີມີ: ທ່ານ ຮສ. ວຽງວິໄລ ທ່ຽງຈັນໄຊ ຄະນະບໍດີ ຄະນະນິຕິສາດ ແລະ ລັດຖະສາດ, ພ້ອມດ້ວຍຮອງຄະນະບໍດີ, ພະນັກງານ, ຄູ-ອາຈານ ແລະນັກສຶກສາ ຄະນະຕົນເຂົ້າຮ່ວມ.
ໃນພິທີ  ທ່ານ ພຈວ ຄຳຜາງ ກອງຈັນແສງ ໄດ້ຍົກສະພາບການຖືກປິດລ້ອມຂອງກອງພັນທີ 2, ການຜ່າວົງປິດລ້ອມຂອງກອງພັນທີ 2 ໃນວັນທີ 18 ພຶດສະພາ – 2ມິຖຸນາ 1959 ທີ່ທົ່ງໄຫຫີນ ຊຽງຂວາງ,​ ທ່ານໄດ້ຍົກໃຫ້ເຫັນເຖິງ ຄວາມໝາຍສໍາຄັນ ແລະປັດໄຈພື້ນຖານການຜ່າວົງປິດລ້ອມຂອງກອງພັນທີ 2, ລວມເຖິງສະພາບການ ແລະການເຄື່ອນໄຫວປະຕິວັດຂອງບັນດາຜູ້ນຳພັກ-ລັດ ແລະແນວລາວຮັກຊາດໃນໄລຍະ 1957-1959.ນອກນັ້ນ ທ່ານຍັງໄດ້ບັນຍາຍເຖິງ ວັນວິລະກຳໂຕນຄຸກ ຂອງບັນດາຜູ້ນຳແນວລາວຮັກຊາດ ທີ່ໂຕນອອກຈາກຄຸກໂພນເຄັງຢ່າງມະຫັດສະຈັນ, ການກະກຽມ ໂຕນອອກຈາກຄຸກໂພນເຄັງຂອງບັນດາຜູ້ນຳ ແລະສາເຫດການໂຕນຄຸກຢ່າງມະຫັດສະຈັນ ຂອງບັນດາຜູ້ນໍາໄປສູ່ເຂດທີ່ໝັ້ນ ປະຕິວັດຢ່າງປອດໄພ ຈາກເຫດການດັ່ງກ່າວ ຖືເປັນເຫດການອັນສໍາຄັນທີ່ສຸດ ໃນປະຫວັດສາດຂອງຊາດລາວ, ເປັນບົດຮຽນອັນລໍ້າຄ່າໃຫ້ແກ່ຂະບວນຕໍ່ສູ້ຂອງກອງທັບປະຊາຊົນລາວ ທີ່ສາມາດຍາດເອົາໄຊຊະນະໄດ້ໃນໄລຍະຕໍ່ມາ. ຈາກຜົນສໍາເລັດ ແລະໄຊຊະນະດັ່ງກ່າວໄດ້ສະແດງ ໃຫ້ເຫັນເຖິງການນໍາພາອັນສະຫລາດສ່ອງໃສຂອງພັກ-ລັດ, ສະແດງໃຫ້ເຫັນເຖິງຄວາມພິລະອາດຫານ ແລະກ້າຕັດສິນໃຈຂອງຜູ້ນໍາ ກໍຄືນັກຮົບປະຕິວັດທຸກຄົນຍາມໃດກໍມີຄວາມສາມັກຄີເປັນຈິດໜຶ່ງ ໃຈດຽວ, ມີຄວາມມານະອົດທົນ ບໍ່ຄອນແຄນຕໍ່ກົນອຸບາຍ ແລະການນາບຂູ່ຂອງສັດຕູ, ຕັ້ງໜ້າປະຕິບັດຕາມພາລະໜ້າທີຢ່າງເຂັ້ມງວດ, ກຽມພ້ອມເສຍສະຫຼະຊີວິດເພື່ອປະເທດ ເພື່ອແນໃສ່ຍາດເອົາເອ ກະລາດ, ຄວາມເປັນເຈົ້າຕົ້ນເອງ ເພື່ອປົດປ່ອຍປະເທດອອກຈາກແອກປົກຄອງຂອງຈັກກະພັດຕ່າງດ້າວ.
ການ ປາຖະກະຖາຄັ້ງນີ້, ກໍເພື່ອແນໃສ່ເຮັດໃຫ້ບັນດາສະມາຊິກພັກ, ພະນັກງານ, ຄູ-ອາຈານ ແລະນັກສຶກສາ ໃຫ້ມີນຳ້​ໃຈ​ຮັກ​ຊາດ, ລະນຶກເຖິງຄຸນງາມ ຄວາມດີ, ຄວາມເສຍຫຼະ ແລະນ້ຳໃຈຮັກຊາດອັນພິລາດອາດຫານ ຂອງນັກຮົບຕໍ່ປະເທດຊາດ, ພ້ອມກັນຄົ້ນຄວ້າສຶກສາຮໍ່າຮຽນເອົາແບບຢ່າງຄຸນສົມບັດ ສິນທຳ ປະຕິວັດ ຂອງບັນດາທ່ານຜູ້ນໍາແນວລາວຮັກຊາດ ທີ່ມີຄວາມສະຫລາດສ່ອງໃສ, ມີນ້ຳໃຈຮັກຊາດຕໍ່ກັບການນຳພາຂອງພັກທີ່ສາມາດຍາດເອົາທຸກໆໄຊຊະນະ ຂອງຂະບວນການປະຕິວັດ.