ກອງປະຊຸມເຜີຍແຜ່ການຄົ້ນຄ້ວາວິທະຍາສາດທາງດ້ານກົດໝາຍ-ສັງຄົມ ຄັ້ງທີ 4 ກ່ຽວກັບການຈັດຕັ້ງປະຕິບັດກົດໝາຍໃນໄລຍະການແຜ່ລະບາດຂອງພະຍາດໂຄວິດ-19 - FLP

ໃນວັນທີ 30 ກັນຍາ 2022 ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ໄດ້ຈັດກອງປະຊຸມເຜີຍແຜ່ການຄົ້ນຄ້ວາວິທະຍາສາດທາງດ້ານກົດໝາຍ-ສັງຄົມ ຄັ້ງທີ 4 ກ່ຽວກັບການຈັດຕັ້ງປະຕິບັດກົດໝາຍໃນໄລຍະການແຜ່ລະບາດຂອງພະຍາດໂຄວິດ-19 ທີ່ຫ້ອງປະຊຸມ L01 ຕຶກອາເນກປະສົງ ໃຫ້ກຽດເປັນປະທານ ໂດຍ ທ່ານ ຮສ. ວຽງວິໄລ ທ່ຽງຈັນໄຊ ຄະນະບໍດີ ຄນລ,ມີຜູ້ຕ່າງໜ້າຈາກ ຄນລ, ມຊ, ສະຖາບັນຍຸຕິທຳແຫ່ງຊາດ,ຕ່າງໜ້າອົງການໄອຍະການປະຊາຊົນສູງສຸດ,ສານປະຊາຊົນສູງສຸດ,ອົງການກວດກາລັດຖະບານ,ຕ່າງໜ້າຈາກບັນດາກົມ,ບັນດາກະຊວງ.

ໃນກອງປະຊຸມດັ່ງກ່າວ ທ່ານ ຮສ.ວຽງວິໄລ ທ່ຽງຈັນໄຊ ໄດ້ກ່າວວ່າ : ກອງປະຊຸມເຜີຍແຜ່ການຄົ້ນຄ້ວາວິທະຍາສາດທາງດ້ານກົດໝາຍ-ສັງຄົມ ຄັ້ງທີ 4 ປະຈຳປີ 2022 ນີ້ ມີຈຸດປະສົງເພື່ອເສີມຂະຫຍາຍ ແລະ ສົ່ງເສີມວິທີດຳເນີນການຄົ້ນຄ້ວາວິທະຍາສາດທາງດ້ານກົດໝາຍ ການສົນທະນາແລກປ່ຽນຄວາມຄິດເຫັນ ປະຈຳປີ 2022 ແລະ ເພື່ອໃຫ້ບັນດານັກຄົ້ນຄ້ວາທັງຫລາຍ ໄດ້ເຜີຍແຜ່ຜົນງານຂອງຕົນອອກສູ່ສັງຄົມ ເພື່ອໄດ້ຮັບຮູ້ຢ່າງກ້ວາງຂ້ວາງ ພ້ອມທັງ ເປັນເວທີທີ່ສຳຄັນໃນການປຶກສາຫາລື ຖາມ-ຕອບ ຂໍ້ສົງໄສໃສ່ບົດຄົ້ນຄ້ວາ ເພື່ອສົ່ງເສີມພັດທະນານັກຄົ້ນຄ້ວາໃຫ້ມີຄວາມຮູ້ ຄວາມສາມາດເພີ່ມຂື້ນກ່ວາເກົ່າ ແລະ ເພື່ອຈາລະລຶກຜົນງານຂອງໂຄງການ ທີ່ປະກອບສ່ວນເຂົ້າໃນການພັດທະນາ ທີ່ເປັນມືອາຊີບໃຫ້ແກ່ ຂະແໜງການສຶກສາກົດໝາຍ ແລະ ວຽກງານໃນຂົງເຂດຍຸຕິທຳຢູ່ ສປປ ລາວ.

ໃນໄລຍະຜ່ານມາ ເຫັນວ່າ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ແມ່ນໄດ້ຈັດກອງປະຊຸມດັ່ງກ່າວ 4 ຄັ້ງ ແລ້ວ,

ຄັ້ງທີ່1,ໃນວັນທີ 19 ທັນວາ 2018 ໄດ້ຈັດກອງປະຊຸມເຜີຍແຜ່ການຄົ້ນຄ້ວາວິທະຍາສາດ ທາງດ້ານກົດໝາຍລະດັບຊາດ ປະຈຳປີ 2018, ມີບົດຄົ້ນຄ້ວານຳມາສະເໜີທັງໝົດ 16 ບົດ
ຄັ້ງວັນທີ2, ໃນວັນທີ 19 ທັນວາ 2019 ໄດ້ຈັດກອງປະຊຸມເຜີຍແຜ່ການຄົ້ນຄ້ວາວິທະຍາສາດ ທາງດ້ານກົດໝາຍ ປະຈຳປີ 2019 ມີບົດຄົ້ນຄ້ວານຳມາສະເໜີທັງໝົດ 16 ບົດ
ຄັ້ງວັນທີ3, ໃນວັນທີ 15 ທັນວາ 2021 ໄດ້ຈັດກອງປະຊຸມເຜີຍແຜ່ການຄົ້ນຄ້ວາວິທະຍາສາດ ທາງດ້ານກົດໝາຍ ປະຈຳປີ 2021 ມີບົດຄົ້ນຄ້ວານຳມາສະເໜີທັງໝົດ 12 ບົດ
ໃນຄັ້ງນີ້ ແມ່ນຄັ້ງທີ4, ໄດ້ຈັດຂື້ນວັນທີ 30 ກັນຍາ 2022, ແມ່ນກອງປະຊຸມເຜີຍແຜ່ການຄົ້ນຄ້ວາວິທະຍາສາດທາງດ້ານສັງຄົມ-ກົດໝາຍ ປະຈຳປີ 2022 ມີບົດຄົ້ນຄ້ວານຳມາສະເໜີທັງໝົດ 13 ບົດ

ສະນັ້ນ ການຈັດກອງປະຊຸມແຕ່ລະຄັ້ງແມ່ນ ໄດ້ຮັບການສະໜັບສະໜູນຈາກໂຄງການລາວ/031 ແລະ ໄດ້ປະຕິບັດຕາມແຜນທີ່ວາງໄວ້ ເຊີ່ງບາງກອງປະຊຸມກໍ່ໄດ້ຮັບຜົນດີເກີນຄາດ. ເຖີງຈະມີການລະບາດຂອງພະຍາດໂຄວິດ-19, ທີ່ຜ່ານມານັ້ນ, ທາງໂຄງການ ກໍ່ຍັງສາມາດນໍາໃຊ້ລະບົບອອນລາຍໃນການປະຕິບັດໜ້າທີ່ ໃນຊ່ວງຂອງການປິດເມືອງ ຮ່ວມກັບບັນດາຄູ່ຮ່ວມມືຝ່າຍລັດຖະບານ ສປປ ລາວ ຂອງໂຄງການຢ່າງສະໝໍ່າສະເໝີ.ນອກຈາກ,ໂຄງການຍັງສຶບຕໍ່ ສ້າງຄວາມເປັນເອກະພາບ ແລະ ການຮ່ວມມືກັບບັນດາຄູ່ຮ່ວມພັດທະນາຕ່າງປະເທດທີ່ພັດທະນາ ໃນຂົງເຂດດຽວກັນໃຫ້ມີຄວາມສອດຄ່ອງ ແລະ ເປັນໄປຕາມຍຸດທະສາດການນຳໃຊ້ຊັບພະຍາກອນ ແລະ ງົບປະມານ ທີ່ຢືນຢົງ.ບັນດາການພັດທະນາທີ່ມີຄວາມສຳຄັນນີ້ໄດ້ຮັບການປະເມີນຜົນຫລາຍໆກິດຈະກຳທີ່ພົ້ນເດັ່ນໃນປີນີ້ ໂດຍສະເພາະໃນຂະແໜງການສຶກສາ ເວົ້າສະເພາະກໍແມ່ນການຍົກສູງການສຶກສາກົດໝາຍ, ສະຖາບັນສຶກສາກົດໝາຍໃຫ້ມີການພັດທະນາຂື້ນ ໂດຍຜ່ານການຝຶກອົບຮົມໃຫ້ແກ່ຄູ-ອາຈານ,ນັກສຶກສາ ແລະ ນັກວິຊາການກົດໝາຍ ໃນຫົວຂໍ້ ກົດໝາຍສະເພາະດ້ານ,ການເຮັດບົດຄົ້ນຄ້ວາວິທະຍາສາດ ແລະ ບົດຄົ້ນຄ້ວາກົດໝາຍ,ການສ້າງຄູ່ມືການຄົ້ນຄ້ວາທາງດ້ານກົດໝາຍ ໂດຍ ຄນລ ມຊ ເພື່ອເປັນເຄື່ອງມືຫລັກ ໃຫ້ແກ່ບັນດາສະຖາບັນທີ່ຢູ່ໃນເປົ້າໝາຍຂອງໂຄງການໄດ້ນໍາໃຊ້.ນອກຈາກນີ້,ຍັງສາມາດຖອດຖອນບົດຮຽນ ແລະ ວິທີການພັດທະນາ ແລະ ຮັກສາຄຸນນະພາບຂອງສະຖາບັນສຶກສາກົດໝາຍໄວ້ໄດ້ ຕາມແບບແຜນ ເພື່ອເປັນການຂະຫຍາຍຕາໜ່າງດ້ານການຮ່ວມມື ແລະ ສົ່ງເສີມໃຫ້ນັກສຶກສາກົດໝາຍ ແລະ ຂະແໜງຍຸດຕິທຳຢູ່ ສປປ ລາວ ມີຄວາມເຂັມແຂງໃນຕໍ່ໜ້າ.

ໃນນີ້ຂ້າພະເຈົ້າຂໍຊົມເຊີຍ ທ່ານຫົວໜ້າທີ່ປຶກສາດ້ານວິຊາການ ໂຄງການລາວ/031 ແລະ ຂໍຂອບໃຈການສະໜັບສະໜູນຮ່ວມມືທີ່ດີຈາກ ສະຖາບັນການຊ່ວຍເຫລືອທາງດ້ານກົດໝາຍ ແລະ ວິຊາການ ທີ່ສາມາດດຳເນີນກິດຈະກຳຂອງໂຄງການດ້ວຍຄວາມຕັ້ງໃຈ ແລະ ການຮັບປະກັນຄຸນນະພາບ ພ້ອມທັງ ຂໍຍ້ອງຍໍພິເສດ ແກ່ ຄະນະຮັບຜິດຊອບງານ, ຫົວໜ້າໂຄງການລະດັບຊາດ ການນຳ ຄະນະນິຕິສາດ ແລະ ລັດຖະສາດ ທີ່ໄດ້ນໍາພາຈັດຕັ້ງກອງປະຊຸມໃນຄັ້ງນີ້ໃຫ້ມີຜົນເດັ່ນທາງດ້ານກົດໝາຍ ເພື່ອພັດທະນາບຸກຄະລາກອນ ໃຫ້ ມີປະສິດທິພາບ ແລະ ເກີດໝາກຜົນອັນສຳເລັດໃນ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ.