ຄະນະຊາວໜຸ່ມ ປະຊາຊົນ ປະຕິວັດລາວ ຄະນະນິຕິສາດ ແລະ ລັດຖະສາດ (ຄນລ) ມະຫາວິທະຍາໄລແຫ່ຊາດ(ມຊ) ໄດ້ຈັດກອງປະຊຸມໃຫຍ່ຄັ້ງທີ VIII ຂຶ້ນທີ່ຫ້ອງປະຊຸມL1 - FLP

ໃນຕອນບ່າຍທີ 27 ທັນວາ 2023 ຜ່ານມານີ້, ຄະນະຊາວໜຸ່ມ ປະຊາຊົນ ປະຕິວັດລາວ ຄະນະນິຕິສາດ ແລະ ລັດຖະສາດ (ຄນລ) ມະຫາວິທະຍາໄລແຫ່ຊາດ(ມຊ) ໄດ້ຈັດກອງປະຊຸມໃຫຍ່ຄັ້ງທີ VIII ຂຶ້ນທີ່ຫ້ອງປະຊຸມL1 . ໂດຍການເປັນປະທານຮ່ວມຂອງສະຫາຍ ຮສ.ປອ.ວຽງວິໄລ ທ່ຽງຈັນໄຊ ສະມາຊິກສະພາແຫ່ງຊາດ ຄະນະປະຈໍາພັກມະຫາວິທະຍາໄລແຫ່ງຊາດ ເລຂາຄະນະພັກຮາກຖານ ຄນລ, ສະຫາຍ ສີສຸພັນ ພົມມະນີວົງ ກໍາມະການສູນກາງຊາວໜຸ່ມ ປະຊາຊົນປະຕິບັດລາວ ຮອງເລຂາຄະນະພັກບໍລິຫານງານກະຊວງສຶກສາທິການ ແລະ ກິລາ, ສະຫາຍ ວິສຸດາ ຈອມມະນີຈັນ ເລຂາຊາວໜຸ່ມຮາກຖານ ຄນລ, ທ່ານ ນາງ. ທັດສະນາລອນ ສີສຸນ໌ນ ປະທານສະຫະພັນແມ່ຍິງຮາກຖານ ຄນລ ແລະທ່ານ ບຸນເຖີງ ສີທອນແກ້ວຈຳປາ ປະທານ ກໍາມະບານຮາກຖານ ຄສຄ, ມີບັນດາແຂກທີ່ຖືກເຊີນ, ສະມາຊິກ ຄຊປປລ ທີ່ເປັນພະນັກງານ, ຄູ-ອາຈານ ແລະນັກສຶກສາ ຄນລ ເຂົ້າຮ່ວມ.

ໃນພິທີ ສະຫາຍ ວິສຸດາ ຈອມມະນີຈັນ ເລຂາຊາວໜຸ່ມ ຄະນະນິຕິສາດ ແລະ ລັດຖະສາດ ໄດ້ຂຶ້ນຜ່ານບົດລາຍງານການເຄື່ຶອນໄຫວໃນໄລຍະ 5 ປີ (2019-2023 ) ຜ່ານມາ ແລະສະເໜີທິດທາງແຜນການ 5 ປີ ໃນຕໍ່ໜ້າ (2023-2028) ຂອງ ຄນລ ໃນການຈັດຕັ້ງປະຕິບັດວຽກງານຕໍ່ທີ່ປະຊຸມ; ເຊິ່ງສະຫາຍໄດ້ຍົກໃຫ້ເຫັນຜົນງານອັນພົ້ນເດັ່ນຫຼາຍດ້ານເຊັ່ນ: ຄະນະຊາວໜຸ່ມປະຊາຊົນປະຕິວັດລາວ ຮາກຖານ ຄນລ ແມ່ນຮາກຖານໜຶ່ງທີ່ຂຶ້ນກັບຄະນະຊາວໜຸ່ມ ມະຫາວິທະຍາໄລແຫ່ງຊາດ ໂດຍໄດ້ຮັບການນຳພາຊີ້ນໍາ ໂດຍກົງຈາກຄະນະພັກຮາກຖານ ຄະນະນິຕິສາດ ແລະ ລັດຖະສາດ, ປະກອບມີຄະນະບໍລິຫານງານທັງໝົດ 5 ສະຫາຍ, ຍິງ 3 ສະຫາຍ, ມີໜ່ວຍຊາວໜຸ່ມຂຶ້ນກັບທັງໝົດ 3 ໜ່ວຍ ແລະ 24 ຈຸ, ມີສະມາຊິກທັງໝົດ 1.063 ສະຫາຍ, ຍິງ 649 ສະຫາຍ, ໃນນັ້ນ ສມຊ ຊາວໜຸ່ມພະນັກງານ, ຄູ-ອາຈານ 53 ສະຫາຍ ຍິງ 33 ສະຫາຍ ແລະ ສະມາຊິກພັກສົມບູນ 50 ສະຫາຍ ຍິງ 30 ສະຫາຍ,ຄະນະຊາວໜຸ່ມປະຊາຊົນປະຕິວັດລາວ ຮາກຖານ ຄນລ ໄດ້ຖືເອົາການສຶກສາອົບຮົມການເມືອງ-ແນວຄິດເປັນບັນຫາສໍາຄັນ ໂດຍຕິດພັນກັບຂະບວນການວຽກງານຊາວໜຸ່ມ ໂດຍສະເພາະແມ່ນສະມາຊິກຊາວໜຸ່ມນັກສຶກສາໃຫ້ມີແນວຄິດອຸ່ນອ່ຽງທຸນທ່ຽງ, ມີຄວາມເຊື່ອໝັ້ນຕໍ່ການນຳພາຂອງພັກ-ລັດ, ມີຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ ແລະ ໄດ້ນຳໃຊ້ຫຼາຍຮູບແບບໃນການສຶກສາອົບຮົມທາງດ້ານແນວຄິດ ເຊັ່ນ:

– ເຂົ້າຮ່ວມພິທີປາຖະກະຖາວັນສະຖາປານາ ສປປລາວ, ວັນເກີດປະທານໄກສອນ ພົມວິຫານ, ວັນສ້າງຕັ້ງພັກປະຊາຊົນປະຕິວັດລາວ, ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ແລະ ວັນສຳຄັນຂອງຊາດຂອງພັກ;

– ຈັດຕັ້ງເຜີຍແຜ່, ເຂົ້າຮ່ວມເຊື່ອມຊືມມະຕິກອງປະຊຸມໃຫຍ່ຂັ້ນຕ່າງໆ, ກົດລະບຽບຂອງຄະນະຊາວໜຸ່ມປະຊາຊົນປະຕິວັດລາວ ສະໄໝທີ VIII, ເຂົ້າຮ່ວມເຊື່ອມຊືມເອກະສານມະຕິຄໍາສັ່ງຕ່າງໆຂອງພັກຕາມການແຈ້ງການຂອງຄະນະພັກຮາກຖານ;

– ໄດ້ປັບປຸງ, ແຕ່ງຕັ້ງຄະນະໜ່ວຍທຸກໜ່ວຍທີ່ຂຶ້ນກັບໃຫ້ມີຄະນະໜ່ວຍຄົບຊຸດເພື່ອນໍາພາວຽກງານຊາວໜຸ່ມ ຈໍານວນ 2 ຄັ້ງ ເພື່ອໃຫ້ສອດຄ່ອງໃນການຈັດຕັ້ງປະຕິບັດວຽກງານຂອງຄະນະບໍລິຫານງານຊາວໜຸ່ມ ຮາກຖານ ຄນລ;

– ໄດ້ອອກໃບຍົກຍ້າຍຊາວໜຸ່ມ ໃຫ້ແກ່ນັກສຶກສາປີ 4 (ປີສຸດທ້າຍ) ນັບແຕ່ສົກສຶກສາ 2019-2023 ໄດ້ຈໍານວນທັງໝົດ 1.812 ສະຫາຍ, ຍິງ 957 ສະຫາຍ;

– ໄດ້ຈັດຕັ້ງກອງປະຊຸມຝຶກອົບຮົມການບໍລິຫານວຽກງານຊາວໜຸ່ມ ແລະ ວຽກງານຂໍ້ແຂ່ງຂັນ 4 ບຸກໃຫ້ແກ່ຄະນະບໍລິຫານງານຊາວໜຸ່ມ ຮາກຖານ ຄນລ ຈຳນວນ 2 ຄັ້ງ, ມີຜູ້ເຂົ້າຮ່ວມທັງໝົດ 85 ສະຫາຍ, ຍິງ 34 ສະຫາຍ ແລະ ຜ່ານທາງອອນລາຍ ຈຳນວນ 1 ຄັ້ງ ຜູ້ເຂົ້າຮ່ວມທັງໝົດ 55 ສະຫາຍ, ຍິງ 24 ສະຫາຍ

– ໄດ້ເຂົ້າຮ່ວມກອງປະຊຸມຝຶກອົບຮົມວຽກງານ ຊປປລ ຂອງ ຄຊປປລ ມຊ, ທີ່ ທ່າລາດ ແຂວງວຽງຈັນ ສມຊ ຊາວໜຸ່ມເຂົ້າຮ່ວມ 4 ສະຫາຍ, ຍິງ 2 ສະຫາຍ;

– ສໍາເລັດໃນການເປີດຂະບວນການແຂ່ງຂັນ 4 ບຸກ ຂອງ ຄຊປປລ ວາງອອກ ແລະ ໄດ້ຈັດຕັ້ງການປະເມີນຂໍ້ແຂ່ງຂັນ 4 ບຸກ ປະຈໍາປີ (ສົກປີ 2019-2023); ໃນນັ້ນ ຮາກຖານ ຄະນະນິຕິສາດ ແລະ ລັດຖະສາດ ໄດ້ຮັບນາມມະຍົດ 4 ບຸກ ແລະ ທຸງໄຊນໍາໜ້າຂະບວນການແຂ່ງຂັນ 4 ບຸກ ຄັ້ງທີ 1 (ປີ 2020);

– ສໍາເລັດການເກັບກໍາສະຕິ ແລະ ເງິນສະຕິ ຂອງແຕ່ລະປີສໍາເລັດ 100% ແລະ ຖອກເງິນພັນທະໃຫ້ຂັ້ນເທິງ ຄົບຕາມຈໍານວນ ແລະ ໃນທັນເວລາທີ່ຂັ້ນເທິງກຳນົດ;

– ກໍ່ສ້າງ ແລະ ເຝິກຝົນຫຼໍ່ຫຼອມມະຫາຊົນກ້າວໜ້າເຂົ້າເປັນສະມາຊິກຊາວໜຸ່ມປະຊາຊົນປະຕິວັດລາວ ຈໍານວນ 5 ສະຫາຍ ແລະ ສໍາເລັດໜັງສືສະເໜີຂໍລາອອກຂອງສະມາຊິກຊາວໜຸ່ມທີ່ພົ້ນອາຍຸກະສຽນ ແລະ ໄດ້ຈັດພິທີລາອອກ ຈໍານວນທັງໝົດ 11 ສະຫາຍ, ຍິງ 2 ສະຫາຍ;

– ກໍ່ສ້າງ ແລະ ເຝິກຝົນຫຼໍ່ຫຼອມມະຫາຊົນກ້າວໜ້າເຂົ້າເປັນ ສະມາຊິກພັກສໍາຮອງ ຈໍານວນ 12 ສະຫາຍ, ຍິງ 7ສະຫາຍ;

– ກໍ່ສ້າງ ແລະ ເຝິກຝົນຫຼໍ່ຫຼອມສະມາຊິກພັກສໍາຮອງເລື່ອນເປັນສະມາຊິກພັກສົມບູນ ຈໍານວນ 13 ສະຫາຍ, ຍິງ 8 ສະຫາຍ;

ຈາກນັ້ນ ໃນພິທີຍັງໄດ້ມີການປ່ອນບັດ ຄັດເລືອກເອົາ ຄຊປປລ ຄະນະນິຕິສາດ ແລະ ລັດຖະສາດ ມຊ ຊຸດໃໝ່; ມີຜູ້ສະໝັກທັງໝົດ 7 ສະຫາຍ, ຄັດເລືອກເອົາ 5 ສະຫາຍ; ຜ່ານການຄັດເລືອກໃນທີ່ປະຊຸມ ໄດ້ເລືອກ ສະຫາຍ ວິສຸດາ ຈອມມະນີຈັນ ເປັນເລຂາ, ສະຫາຍ ບົງສະຫັວນ ບຸດດາວົງ ເປັນຮອງ, ສະຫາຍ ຄອນສະຫັວນ ວົງວັນນະໄຊ ເປັນປະທານກວດກາ, ສະຫາຍ ໄກ່ສອນ ດາລາສັກ, ສະຫາຍ ວິໄລວັນ ທຳມະວົງ ເປັນຄະນະ.