ງານປະກວດສິລະປະວັນນະຄະດີ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ສົກຮຽນ : 2023-2024
ໃນວັນທີ 13 ມີນາ 2024 ທີ່ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດໄດ້ຈັດການປະກວດສິລະປະວັນນະຄະດີ ປະຈຳສົກສຶກສາ 2023-2024 ເພື່ອເປັນການສ້າງຂະບວນການຕ້ອນຮັບວັນສ້າງຕັ້ງ ຄະນະນິຕິສາດ ແລະ ລັດຖະສາດ ຄົບຮອບ 38 ປີ ແລະ ເປັນກິດຈະກຳທີ່ເຮັດໃຫ້ນັກສຶກສາຄະນະນິຕິສາດ ແລະ ລັດຖະສາດ ຮູ້ຮັກສາວັດທະນະທຳອັນດີງາມຂອງຊາດ ຕາມນະໂຍບາຍຂອງກະຊວງສຶກສາທິການ ແລະ ກິລາວາງອອກກໍຄື 3 ລັກສະນະ ແລະ 5 ຫຼັກມູນຂອງການສຶກສາ.
ການປະກວດສິລະປະຄັ້ງນີ້ນອກຈາກເປັນການສ້າງຂະບວນການຄືດັ່ງກ່າວແລ້ວຍັງເປັນການຄັດເລືອກເອົາຕົວແທນຜູ້ທີ່ໄດ້ຮັບລາງວັນຊະນະເລີດເຂົ້າຮ່ວມແຂ່ງຂັນສິລະປະວັນນະຄະດີປະຈຳປີ 2024ຂອງມະຫາວິທະຍາໄລແຫ່ງຊາດອີກດ້ວຍ. ໃນການປະກວດສິລະປະວັນນະຄະດີຄັ້ງນີ້ໄດ້ຮັບກຽດໄຂພິທີໂດຍ ທ່ານ ອຈ.ປອ ສົມເດດແກ້ວວົງສັກ ຮອງຄະນະບໍດີຄະນະນິຕິສາດ ແລະ ລັດຖະສາດ ຊຶ່ງມີຜູ້ເຂົ້າຮ່ວມຈາກພາກສ່ວນຕ່າງໆເປັນຕົ້ນແມ່ນມາຜູ້ຕາງໜ້າຫ້ອງການຄຸ້ມຄອງນັກສຶກສາມະຫາວິທະຍາໄລແຫ່ງຊາດ, ບັນດາຫົວໜ້າພາກວິຊາ, ຫົວໜ້າພະແນກ, ຄູ-ອາຈານ ແລະ ນັກສຶກສາທັງ 5 ພາກວິຊາ, ການປະກວດສິລະປະຄັ້ງນີ້ມີ 2 ປະເພດຄື: ປະກວດນັກຮ້ອງສຽງດີ ແລະ ປະກວດບົດຟ້ອນລວມໝູ່.ຊຶ່ງມີຜູ້ເຂົ້າປະກວດມາຈາກ 5 ພາກວິຊາ ເຊັ່ນ : ພາກວິຊາກົດໝາຍແພ່ງ, ພາກວິຊາກົດໝາຍອາຍາ, ພາກວິຊາກົດໝາຍທຸລະກິດ, ພາກວິຊາລັດຖະສາດ ແລະ ພາກວິຊາພົວພັນສາກົນບັນຍາກາດໃນການປະກວດສິລະປະວັນນະຄະດີປີນີ້ເຖິງແມ່ນວ່າແຕ່ລະພາກສ່ວນຈະມີເວລາໃນການຝຶກຊ້ອມໜ້ອຍຫຼາຍ ແຕ່ທຸກພາກສ່ວນກໍໄດ້ເຮັດໄດ້ດີ ແລະ ໄດ້ຮັບສຽງເຊຍຢ່າງເບີກບານມ່ວນຊື່ນຈາກກອງເຊຍຂອງຕົນ. ຜົນການປະກວດສິລະປະວັນນະຄະດີປີນີ້ ລາງວັນຊະນະເລີດນັກຮ້ອງສຽງດີໄດ້ແກ່ ນາງ ສຸດາພອນ ວັນນະວົງນັກສຶກສາມາຈາກພາກວິຊາພົວພັນສາກົນ, ລາງວັນຮອງຊະນະເລີດອັນດັບໜຶ່ງໄດ້ແກ່ທ້າວ ພົງ ສົມມະນີ ນັກສຶກສາມາຈາກພາກວິຊາກົດໝາຍທຸລະກິດ ແລະ ລາງວັນຮອງຊະນະເລີດອັນດັບສອງໄດ້ແກ່ນາງ ຈັນທະພອນ ຊົງໃຈຢົ້ວນັກສຶກສາມາຈາກພາກວິຊາພົວພັນສາກົນ. ສ່ວນປະເພດບົດຟ້ອນລວມໝູ່ ລາງວັນຊະນະເລີດໄດ້ແກ່ນັກສຶກສາຈາກພາກວິຊາພົວພັນສາກົນທີ່ຍັງຮັກສາແຊ້ມໄວ້ໄດ້, ລາງວັນຮອງອັນດັບໜຶ່ງໄດ້ແກ່ບົດຟ້ອນລວມໝູ່ຈາກນັກສຶກສາພາກວິຊາລັດຖະສາດ ແລະ ລາງວັນຮອງຊະນະເລີດອັນດັບສອງໄດ້ແກ່ບົດຟ້ອນລວມໝູ່ນັກສຶກສາຈາກພາກວິຊາກົດ ໝາຍແພ່ງ.
ການປະກວດສິລະປະວັນນະຄະດີປີນີ້ແມ່ນມີບັນຍາກາດຟົດຟື້ນມ່ວນຊື່ນຊຶ່ງພາກສ່ວນເຂົ້າປະກວດໄດ້ມີຄວາມສາມັກຄີ, ຄວາມເອົາໃຈໃສ່ຂອງຄູ-ອາຈານ ແລະ ນັກສຶກສາສົ່ງບົດເພງ ແລະ ບົດຟ້ອນຂອງຕົນເພື່ອຮັກສາໄວ້ຊຶ່ງຮີດຄອງ,ປະເພນີອັນດີງາມອັນມີຄຸນຄ່າທີ່ຄວນຮັກສາໄວ້ໃຫ້ຄົນຮຸ່ນຫຼັງໄດ້ສານຕໍ່ບໍ່ໃຫ້ສູນຫາຍ. ຄະນະນິຕິ ສາດ ແລະ ລັດຖະສາດເອງກໍໄດ້ເຮັດໜ້າທີ່ອັນສຳຄັນ ສົມກັບການຍອມຮັບວ່າມີຫຼັກສູດທີ່ໄດ້ມາດຕະຖານຂອງມະຫາວິທະຍາໄລເຄືອຄ່າຍອາຊຽນ. ນອກຈາກນັ້ນຍັງໄດ້ຕົວແທນນັກສຶກສາເພື່ອກະກຽມເຂົ້າຮ່ວມແຂ່ງຂັນສິລະປະວັນນະຄະດີປະຈຳປີ 2024 ຂອງມະຫາວິທະຍາໄລແຫ່ງຊາດໄດ້ຕາມຈຸດປະສົງທີ່ໄດ້ຄາດໝາຍໄວ້.
ຂຽນຂ່າວ ໂດຍ : ທ່ານ ອຈ ເລັງສັກ ບຸນທະລາດ ຫົວໜ້າພະແນກຄຸ້ມຄອງນັກສຶກສາ
ພາບບັນຍາກາດ
