ຄະນະທີມງານຄູອາຈານ ແລະ ນັກສຶກສາ ປະລິນຍາໂທນິຕິສາດ ສາຂາ ກົດໝາຍທຸລະກິດ ມະຫາວິທະຍາໄລແຫ່ງຊາດ ທັດສະນະສຶກສາປະກອບການຮຽນ-ການສອນ ແລະ ເກັບກຳຂໍ້ມູນ ຂຽນວິທະຍານິພົນ
ວັນທີ 18 ມີນາ 2024 ຄະນະນິຕິສາດ ແລະ ລັດຖະສາດ (ມຊ) ຄະນະທີມງານຄູອາຈານ ແລະ ນັກສຶກສາ ປະລິນຍາໂທນິຕິສາດ ສາຂາ ກົດໝາຍທຸລະກິດ ມະຫາວິທະຍາໄລແຫ່ງຊາດ ໄດ້ທັດສະນະສຶກສາປະກອບການຮຽນ-ການສອນ ແລະ ເກັບກຳຂໍ້ມູນ ຂຽນວິທະຍານິພົນ ທີ່ ພະແນກອຸດສາຫະກຳ ແລະການຄ້າ ແຂວງບໍແກ້ວ ຈໍານວນ 25 ທ່ານ ເຊີ່ງທັດສະນະຄັ້ງນຳພາໂດຍ ທ່ານ ອຈ ທັດສະນະລອນ ສີສຸນົນ ຮອງຄະນະບໍດີ ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ
ນາງສີອຳໄພ ໂສລະຖີ ຮອງຫົວໜ້າພະແນກອຸດສາຫະກຳ ແລະການຄ້າ ຕ່າງໜ້າຄະນະພັກ-ຄະນະນຳ ແລະ ພະນັກງານ-ລັດຖະກອນ ພາຍໃນພະແນກ ອຄ ແຂວງບໍ່ແກ້ວຕ້ອນຮັບ ເຊີ່ງທ່ານໄດ້ກ່າວ ແລະ ລາຍງານບາງຕອນວ່າ ມີຄວາມດີໃຈ ແລະ ຍິນດີຕ້ອນຮັບ ພ້ອມທັງຂໍສະແດງຄວາມຊົມເຊີຍ ທີ່ບັນດາທ່ານ ໃຫ້ກຽດ ແລະ ຕັດສິນໃຈເລືອກເອົາແຂວງບໍ່ແກ້ວ ເວົ້າສະເພາະ ພະແນກອຸດສາຫະກຳ ແລະການຄ້າ ເປັນຈຸດເປົ້າໝາຍໜຶ່ງ ໃນການມາດທັດສະນະແລກປ່ຽນບົດຮຽນໃນຄັ້ງນີ້ ຢ່າງສຸດອົກສຸດໃຈ…..ຂໍສະແດງຄວາມຊົມເຊີຍ.
ບັນດາທ່ານ ທີ່ເຄົາລົບ ແລະ ນັບຖືຢ່າງສູງ.
ການທັດສະນະສຶກສາ, ລົງເລິກສະຖານທີ່ຕ່າງໆ ເພື່ອແລກປ່ຽນບົດຮຽນ ແມ່ນອົງປະກອບທີ່ສຳຄັນ ຂອງຫຼັກສູດການຮຽນ-ການສອນ ເພື່ອຮັບປະກັນໃຫ້ການຮຽນໃນຫ້ອງຮຽນ ກໍຄື ການຮຽນພາກທິດສະດີ-ຫຼັກມູນວິທະຍາສາດແລະ ແນວທາງ-ນະໂຍບາຍຕ່າງໆ ຂອງພັກ-ລັດ ທີ່ວາງອອກໃນແຕ່ລະໄລຍະ ຕິດພັນກັບຂອດການຈັດຕັ້ງປະຕິບັດຕົວຈິງ ຢູ່ທ້ອງຖິ່ນ ຮາກຖານ ແລະ ກົມກອງຕ່າງໆ ທີ່ປິ່ນອ້ອມ ສາຂາວິຊາຮຽນຂອງພວກເຮົາ ໂດຍສະເພາະ ໃນການນຳເອົາບັນດາຂໍ້ມູນຕົວຈິງ ໄປວິເຄາະ-ວິໄຈ ສ້າງເປັນບົດຄົ້ນຄ້ວາວິ ທະຍາສາດ-ບົດວິທະຍານິພົນ ຮັບໃຊ້ສັງຄົມ ແລະສາຂາວິຊາຊີບ ໃນເງື່ອນໄຂໃໝ່ຢ່າງສອດຄ່ອງເໝາະສົມ.
ໂດຍອິງຕາມຄຳຖາມເຈາະຈີ້ມທີ່ທາງຄະນະຮັບຜິດຊອບໄດ້ສົ່ງໃຫ້, ບັນດາຂໍ້ມູນຂ່າວສານທີ່ຄະນະທີມງານຂອງບັນດາທ່ານ ຢາກລົງເລິກແລກປ່ຽນໃນຂົງເຂດອຸດສາຫະ ກຳ ແລະການຄ້າ ແມ່ນກ່ຽວກັບ ການຄ້າຊາຍແດນ ກັບໄທ, ຈີນ ແລະ ມຽນມ້າ ນອກນັ້ນ ກໍຄື ບັນຫາອື່ນໆ ທີ່ຕິດພັນກັບພະແນກການອື່ນ. ດັ່ງນັ້ນ, ກ່ອນຈະເຂົ້າສູ່ການລົງເລິກດ້ານວິຊາການ ທີ່ມີລັກສະນະສະເພາະ ຂ້າພະເຈົ້າຂໍຍົກໃຫ້ເຫັນສະພາບຈຸດພິເສດລວມຂອງວຍກງານອຸດສາຫະກຳ ແລະການຄ້າ ໂດຍສັງເຂບ ເພື່ອເປີດທາງໃຫ້ບັນດາທ່ານ ສົນທະນາກັບຂະແໜງວິຊາສະເພາະທີ່ກ່ຽວຂ້ອງ ດັ່ງນີ້:
1). ສະພາບຈຸດພິເສດລວມ ຂອງແຂວງ.
ແຂວງບໍ່ແກ້ວ ຕັ້ງຢູ່ພາກເໜືອ ຂອງ ສປປ ລາວ ມີເນື້ອທີ່ທັງໝົດ 6.196 ກິໂລຕາແມັດ, ມີຊາຍແດນຕິດກັບ 3 ແຂວງ ຂອງລາວ ແລະ 2 ແຂວງ ຂອງ 2 ປະເທດ ຄື: ແຂວງຊຽງຮາຍ ລາຊາອານາຈັກໄທ ຍາວ 145 ກິໂລແມັດ ແລະ ແຂວງທ່າຂີ້ເຫຼັກ ສະຫະພາບມ່ຽນມ່າ ຍາວ 98 ກິໂລແມັດ, ມີດ່ານສາກົນ 3 ແຫ່ງ ຄື: ດ່ານສາກົນຂົວມິດຕະພາບ 4, ດ່ານສາກົນບ້ານມອມ, ດ່ານສາກົນສາມຫຼ່ຽມຄໍາ; ມີດ່ານທ້ອງຖິ່ນ 2 ແຫ່ງ ແລະ ດ່ານປະເພນີ 3 ແຫ່ງ. ປະກອບມີ 5 ເມືອງ, 248 ບ້ານ, 37.991 ຄອບຄົວ, ພົນລະເມືອງ 205.751 ຄົນ, ຍິງ 101.594 (ບໍ່ລວມເຂດເສດຖະກິດພິເສດ 3 ຫຼ່ຽມຄໍາ) ມີ 13 ເຜົ່າ, ຄວາມໜາແໜ້ນຂອງພົນລະເມືອງສະເລ່ຍ 33 ຄົນ ຕໍ່ 1 ກິໂລຕາແມັດ. ປີ 2023 ເສດຖະກິດຂອງແຂວງ ຂະຫຍາຍຕົວໃນລະດັບ 4,8%,ລວມຍອດຜະລິດຕະພັນພາຍໃນ GDP 3.715,28 ຕື້ກີບ ທຽບໃສ່ແຜນການ ປະຕິບັດໄດ້ 99,48% ສະເລາຍລາຍຮັບ 967,33 ໂດລາ ຕໍ່ຄົນ, ຕໍ່ປີ.
ແຂວງບໍ່ແກ້ວ ໄດ້ວາງ 7 ຍຸດທະສາດໃນການພັດທະນາ ແລະ ຜັນຂະຫຍາຍມະຕິ VI ແລະ ແຜນພັດທະນາເສດຖະກິດ-ສັງຄົມ ຄັ້ງທີ 9 ຂອງແຂວງ ໄລຍະ 2021-2025 ຄື:
ໜຶ່ງ, ສືບຕໍ່ຮັກສາສະຖຽນລະພາບທາງດ້ານການເມືອງໃຫ້ໜັກແໜ້ນ, ສັງຄົມມີຄວາມສະຫງົບ-, ເປັນລະບຽບຮຽບຮ້ອຍດີ, ສ້າງສິ່ງເອື້້ອອຳນວຍຄວາມສະດວກ ແລະ ຮັບປະກັນໃຫ້ແກ່ການພັດທະນາເສດຖະກິດ-ສັງຄົມ.
ສອງ, ພັດທະນາຄົມມະນາຄົມ-ຂົນສົ່ງທີ່ມີຄຸນນະພາບ ເຊື່ອມຕໍ່ບັນດາແຂວງພາກເໜືອຂອງລາວ ກັບປະເທດໃກ້ຄຽງ ແລະ ອະນຸພາກພື້ນ.
ສາມ, ພັດທະນາການທ່ອງທ່ຽວທີ່ຍືນຍົງ ເຊື່ອມຕໍ່ປະເທດໃກ້ຄຽງ ແລະ ພາກເໜືອຂອງລາວ.
ສີ່, ສົ່ງເສີມການຜະລິດສິນຄ້າກະສິກໍາສະອາດຍືນຍົງ ເພື່ອສະໜອງຄວາມຕ້ອງການຂອງການຊົມ ໃຊ້ພາຍໃນ ແລະ ເປັນສິນຄ້າສົ່ງອອກ.
ຫ້າ, ພັດທະນາພະລັງງານໄຟຟ້າ ເພື່ອສະໜອງໃຫ້ແກ່ການຊົມໃຊ້ພາຍໃນ ແລະ ເປັນຂາອອກ.
ຫົກ, ພັດທະນາຊັບພະຍາກອນມະນຸດທີ່ມີຄຸນນະພາບ.
ເຈັດ, ຊຸກຍູ້ສົ່ງເສີມການພັດທະນາເຂດເສດຖະກິດພິເສດສາມຫຼ່ຽມຄໍາ ໃຫ້ກາຍເປັນແມ່ແຮງຍູ້ເສດຖະກິດຂອງແຂວງໃຫ້ຂະຫຍາຍຕົວ.
ພ້ອມນີ້ ກໍຍັງໄດ້ກຳນົດເອົາ 4 ຂະແໜງທີ່ເປັນເສດຖະກິດປາຍແຫຼມ ເຊັ່ນ: ຂະແໜງຂົນສົ່ງ; ຂະແໜງກະສິກຳ, ຂະແໜງທ່ອງທ່ຽວ ແລະ ຂະແໜງການຄ້າ ຕິດພັນກັບການຈັດຕັ້ງຜັນຂະຫຍາຍວາລະແຫ່ງຊາດ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ສ້າງຂະບວນການຮັກຊາດ-ພັດທະ ນາ ຕິດພັນກັບຄຳຂັວນ 3 ເຂັ້ມ 3 ບຸກ ຄື:
– 3 ເຂັ້ມ:
1). ເຂັ້ມງວດປະຕິບັດກົດໝາຍ ແລະ ລະບຽບການ.
2). ເຂັ້ມງວດການແກ້ໄຂບັນຫາຫຍໍ້ທໍ້.
3). ເຂັ້ມງວດງານ ເພື່ອຍົກປະສິດທິພາບ-ປະສິດທິຜົນ.
– 3 ບຸກ:
1). ບຸກໃນການສ້າງຊັບພະຍາກອນໃຫ້ມີຄຸນນະພາບ,
2). ບຸກໃນການສ້າງຄວາມເປັນເຈົ້າການພັດທະນາ ແລະ
3). ບຸກໃນການສ້າງຂະບວນການ ໃຫ້ພົ້ນເດັ່ນ ແລະ ຍືນຍົງ.
– ທົ່ວແຂວງບໍ່ແກ້ວ ມີສະຖານທີ່ທ່ອງທ່ຽວທັງໝົດ 77 ແຫ່ງ, ໃນນີ້ ທຳມະຊາດ 54 ແຫ່ງ, ປະຫວັດສາດ 4 ແຫ່ງ ແລະ ວັດທະນະທຳ 19 ແຫ່ງ. ທີ່ໄດ້ເປີດບໍລິການໄປແລ້ວ ປະກອບມີ: ຫໍຫຼັກເມືອງ, ວັດທາດສຸວັນນະຜາຄຳ, ວັດຈອມເຂົາມະນີລັດ, ເມືອງເກົ່າສຸວັນນະໂຄມຄຳ, ຄ້າຍທະຫານຝະລັ່ງເກົ່າ, ທາດດອນມອນ, ຜາພະ, ປ່າສະຫງວນແຫ່ງຊາດນ້ຳກ່ານດອນຊາວ,ດອນເຜິ້້ງຄຳ, ວັດສີບຸນເຮືອງ………………….
2). ສະພາບຈຸດພິເສດດ້ານທີ່ຕັ້ງ-ພາລະບົດບາດ ແລະກົງຈັກການຈັດຕັ້ງ.
– ພະແນກອຸດສາຫະກໍາ ແລະ ການຄ້າແຂວງບໍ່ແກ້ວ ແມ່ນກົງຈັກການຈັດຕັ້ງຫນຶ່ງ ຂອງແຂວງ, ມີພາລະບົດບາດ ເປັນເສນາທິການໃຫ້ກະຊວງ ອຸດສາຫະກໍາ ແລະ ການຄ້າ(ສາຍຕັ້ງ) ແລະ ອົງການປົກຄອງແຂວງ (ສາຍຂວາງ) ໃນດ້ານວິຊາການ ແລະ ການຄຸ້ມຄອງບໍລິຫານລັດຕາມການແບ່ງຂັ້ນຄຸ້ມຄອງ.
– ພະແນກອຸດສາຫະກໍາ ແລະ ການຄ້າແຂວງບໍ່ແກ້ວ ປະກອບມີ 8 ຂະແໜງ, ມີພະນັກງານ-ລັດ ຖະກອນ 52 ທ່ານ, ຍິງ 14 ທ່ານ, ມີຄະນະພະແນກ 4 ທ່ານ, ຍິງ 2 ທ່ານ, ຫົວໜ້າຂະແໜງ 8 ທ່ານ ຍິງ 2 ທ່ານ, ຮອງຫົວ ໜ້າຂະແໜງ 10 ທ່ານ, ຍິງ 1 ທ່ານ.
– ຫ້ອງການອຸດສາຫະກໍາ ແລະການຄ້າແຕ່ລະເມືອງ ປະກອບມີ 4 ໜ່ວຍງານ, ມີພະນັກງານທັງໝົດ 50 ທ່ານ, ຍິງ 12 ທ່ານ; ຄະນະນໍາ 12 ທ່ານ ໃນນີ້:
+ ອຄ ເມືອງຫ້ວຍຊາຍ ມີ 11 ທ່ານ, ຍິງ 2 ທ່ານ, ຄະນະ 3 ທ່ານ.
+ ອຄ ເມືອງຕົ້ນເຜິ້ງ ມີ 16 ທ່ານ, ຍິງ 4 ທ່ານ, ຄະນະ 3 ທ່ານ
+ ອຄ ເມືອງປາກທາ ມີ 9 ທ່ານ, ຍິງ 3 ທ່ານ, ຄະນະ 2 ທ່ານ.
+ ອຄ ເມືອງຜາອຸດົມ ມີ 7 ທ່ານ, ຍິງ 3 ທ່ານ, ຄະນະ 2 ທ່ານ.
+ ອຄ ເມືອງເມິງ ມີ 7 ທ່ານ, ຍິງ 3 ທ່ານ, ຄະນະ 2 ທ່ານ.
2). ການເຄື່ອນໄຫວ ວຽກວິຊາສະເພາະ.
- ລວມຍອດມູນຄ່າຜະລິດຕະພັນອຸດສາຫະກໍາປຸງແຕ່ງ ແລະ ຫັດຖະກໍາປະຕິບັດໄດ້ 300.108 ຕື້ກີບ, ໃນນີ້; ມູນຄ່າກຳຫັດຖະກໍາ 99.415 ຕື້ກີບ.
- ມູນຄ່າການຈໍລະຈອນສິນຄ້າພາຍໃນທັງຫມົດ 972.233.335.000 ກີບ.
– ມູນຄ່າສົ່ງອອກສິນຄ້າທັງໝົດ = 20.428.585 $; ໃນນີ້, ສົ່ງອອກໄປ ສປ ຈີນ ກວມ 89,46%; ນອກນີ້ແມ່ນສົ່ງອອກໄປປະເທດໄທ; ສິນຄ້າສົ່ງອອກຫຼັກໆໄດ້ແກ່: ຢາງພາລາ, ໝາກກ້ວຍ, ໝາກຖົ່ວເຫຼືອງ, ໝາກໂມ, ໝາກອຶ, ໝາກນໍ້າມັນ; ນອກນີ້ຍັງມີ ເຫຍື່ອເບັດຕຶກປາ, ເຄື່ອງປະດັບຈາກຂົນໄກ່ງວງ, ເຟີນີເຈີ, ຫີນຂົບ ເມັດຢາງ, ອາລຸຍມີນຽມ ແລະ ເຄື່ອງປ່າຂອງດົງ ຄື: ໝາກຕາວ, ດອກແຂມ ແລະ ຂີ້ຊີແຫ້ງ.
– ມູນຄ່າສິນຄ້ານໍາເຂົ້າ:
+ (ຂັ້ນກະຊວງອະນຸຍາດ) = 48.814.360 $ ກວມເອົາອັດຕາສ່ວນ 60,99 % ຂອງມູນຄ່ານໍາເຂົ້າທັງໝົດ; ສິນຄ້າຕົ້ນຕໍ ໄດ້ແກ່ ນໍ້າມັນກາຊວນ, ນໍ້າມັນແອັດຊັງ, ແກັດຫຸງຕົ້ນ, ລົດຈິບ, ລົດກະບະ ແລະ ພາຫະນະປະເພດອື່ນໆ.
+ (ຂັ້້ນແຂວງອະນຸຍາດ) = 30.642.645 $ ກວມເອົາ 39,01 % ຂອງມູນຄ່ານໍາເຂົ້າທັງໝົດ; ສິນຄ້າຕົ້ນຕໍໄດ້ແກ່: ໝວດເຄື່ອງກໍ່ສ້າງ; ຮອງລົງມາແມ່ນ ສິນຄ້າຮັບໃຊ້ການຜະລິດກະສິກໍາ ແລະ ຟາມລ້ຽງສັດຕ່າງໆ ເຊັ່ນ: ຝຸ່ນເຄມີ-ຊີວະພາບ, ຢາປາບສັດຕູພືດ, ແນວພັນສັດ, ຫົວອາຫານສັດ, ສັດມີຊີວິດ; ຕໍ່ມາແມ່ນ ວັດຖຸດິບນຳມາຜະລິດພາຍໃນໂຮງງານ; ໝວດສະບຽງອາຫານ ເຊັ່ນວ່າ: ໝາກໄມ້ລວມ, ນໍ້າຕານ, ຜະລິດຕະພັນນົມ, ສີ້ນສ່ວນສັດແຊ່ແຂງ, ເຂົ້າສານ, ພືດພັກສົດ, ເຂົ້າໜົມ, ເຄື່ອງດື່ມ ແລະ ອື່ນໆ; ນອກນີ້ຍັງມີ ເຄື່ອງນຸ່ງຮົ່ມ ແລະ ເຄື່ອງໃຊ້ສອຍປະຈຳວັນ; ສິນຄ້າຝຸມເຟືອຍ; ສິນຄ້ານໍາເຂົ້າຊົ່ວຄາວມາຜະລິດເພື່ອສົ່ງອອກ ແລະ ສິນຄ້າອື່ນໆອີກ.
+ ສິນຄ້າຜ່ານແດນທັງໝົດບັນລຸ 1.541.880.505 $.
– ທົ່ວແຂວງມີໂຮງງານອຸດສາຫະກໍາປຸງແຕ່ງ ແລະ ຫັດຖະກໍາ ທັງໝົດ 247 ແຫ່ງ, ມີມູນຄ່າການ ລົງທຶນທັງໝົດ 197.007 ຕື້ກີບ ໃນນີ້: ມີໂຮງງານຂະໜາດໃຫຍ່ 01 ແຫ່ງ, ໂຮງງານຂະໜາດກາງ 49 ແຫ່ງ, ໂຮງງານຂະໜາດນ້ອຍ 74 ແຫ່ງ ແລະ ແບບຄອບຄົວ 123 ແຫ່ງ, ການລົງທຶນຕ່າງປະເທດ 13 ຫົວໜ່ວຍ, ມູນຄ່າການລົງທຶນ 82.038 ຕື້ກີບ.
– ທົ່ວແຂວງບໍ່ແກ້ວ ມີຫົວໜ່ວຍທຸລະກິດທີ່ໄດ້ຂຶ້ນທະບຽນວິສາຫະກິດ ທັງໝົດ 6.385 ຫົວໜ່ວຍ ມີທຶນຈົດທະບຽນ 4.453 ຕື້ກີບ ໃນນັ້ນ: ຂະແໜງການຜະລິດ 735 ຫົວໜ່ວຍ, ຂະແໜງການຄ້າ 3.518 ຫົວໜ່ວຍ, ຂະແໜງບໍລິການ 2.132 ຫົວໜ່ວຍ; ມີຫົວໜ່ວຍທຸລະກິດຕ່າງປະເທດ 89 ຫົວໜ່ວຍ ມີທຶນຈົດທະບຽນ 694 ຕື້ກີບ (ຈີນ 77 ຫົວໜ່ວຍ, ເກົາຫຼີ 04 ຫົວໜ່ວຍ, ຝະລັ່ງ 1 ຫົວໜ່ວຍ, ຫວຽດນາມ 05 ຫົວໜ່ວຍ ແລະ ໄທ 03 ຫົວໜ່ວຍ; ໃນນີ້:
– ຈຸນລະວິສາຫະກິດ ມີ 4,883 ຫົວໜ່ວຍ, ກວມເອົາ 76,47%.
– ວິສາຫະກິດ ຂະໜາດນ້ອຍ ມີ 1.159 ຫົວໜ່ວຍ, ກວມເອົາ 18,15%.
– ວິສາຫະກິດຂະໜາດກາງ ມີ 204 ຫົວໜ່ວຍ, ກວມເອົາ 3,19%.
– ວິສາຫະກິດຂະໜາດໃຫ່ຍ ມີ 139 ຫົວໜ່ວຍ, ກວມເອົາ 2,17%.
- ຫົວໜ່ວຍທຸລະກິດຕ່າງປະເທດ ລວມມີ 89 ຫົວໜ່ວຍ ກວມ: 1,39%.
ສັງເກດໄດ້ວ່າ: MSME ລວມມີ 6.246 ຫົວໜ່ວຍ, ກວມເຖິງ 97,82% ໃນຂະນະທີ່ ວິສາຫະກິດຂະໜາດໃຫຍ່ ກວມພຽງ 139 ຫົວໜ່ວຍ ຫຼືພຽງ 2,17% ໃນນີ້:
+ ຂົງເຂດການຄ້າ ມີເຖິງ 3.518 ຫົວໜ່ວຍ ຫຼືເທົ່າກັບ 55,09%.
+ ຂົງເຂດການບໍລິການ ລວມມີ 2.132 ຫົວໜ່ວຍເທົ່າກັບ 33,39%.
+ ຂົງເຂດການຜະລິດ ທີ່ເປັນພື້ນຖານຫຼັກແຫລ່ງໃນການສ້າງຄວາມເຂັ້ມແຂງ ໃຫ້ແກ່ພື້ນຖານເສດຖະ ກິດ, ເປັນພື້ນຖານ ໃນການສ້າງລາຍຮັບ-ສ້າງວຽກເຮັດງານທຳ ທີ່ ໝັ້ນຄົງ ໃຫ້ງົບປະລັດ ແລະ ສັງຄົມ ພັດມີພຽງ 735 ຫົວໜ່ວຍ ຫຼື ກວມພຽງ11,51%.
– ພາຍໃນແຂວງມີຕະຫຼາດທັງໝົດ ຈໍານວນ 48 ແຫ່ງ, ໃນນີ້ ຕະຫຼາດໃຫຍ່ 02 ແຫ່ງ, ຕະຫຼາດກາງ 09 ແຫ່ງ, ຕະຫຼາດນ້ອຍ 23 ແຫ່ງ ແລະ ຕະຫຼາດນັດ 14 ແຫ່ງ.
– ທົ່ວແຂວງ ມີສິນຄ້າໂອດອບ ຈໍານວນ 8 ຫົວໜ່ວຍ, ລວມ 29 ລາຍການສິນຄ້າ ກວມ 3 ເມືອງ ຄື: ເມືອງຫ້ວຍຊາຍ 6 ຫົວໜ່ວຍ, ຕົ້ນເຜິ້້ງ 1 ຫົວໜ່ວຍ ແລະເມືອງເມິງ 1 ຫົວໜ່ວຍ ຍັງ 2 ເມືອງ ທີ່ຍັງບໍ່ທັນມີ ຄື: ປາກທາ ແລະ ຜາອຸດົມ; ສະເພາະປີ 2023 ເພີ່ມຂຶ້ນ 2 ຫົວໜ່ວຍ.
– ໄດ້ປະກອບສ່ວນຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃນຂົງເຂດອຸດສາຫະກຳ ແລະການຄ້າຢ່າງຕັ້ງໜ້າ, ອັນພົ້ນເດັ່ນເປັນຮູບປະທຳ ແມ່ນການສະເໜີແຂວງອອກຂໍ້ຕົກລົງຮັບຮອງໂຮງງານນ້ຳດື່ມຕົວແບບ ເພື່ອສົ່ງເສີມການຜະລິດ ແລະການຊົມໃຊ້ຜະລິດຕະພັນພາຍໃນ ທົດແທນ ແລະ ຫຼຸດຜ່ອນການນຳເຂົ້າ ຕາມທິດ ຫັນສັງຄົມການບໍລິໂພກ ໄປສູ່ສັງຄົມການຜະລິດ ໄດ້ 2 ໂຮງງານ ຄື: ໂຮງງານນ້ຳດື່ມພູຂຽວ ແລະ ອັນຍະມະນີ.
