ນັກສຶກສາ ຄນລ ສຳເລັດການລົງຝຶກງານ ສົກຮຽນ 2018-2019

ລາຍລະອຽດ

ເຜີຍແຜ່ເມື່ອ ວັນຈັນ, 11 ກຸມພາ 2019 06:14

ນັກສຶກສາ ຄນລ ສຳເລັດການລົງຝຶກງານ ສົກຮຽນ 2018-2019 ເປັນສົກຮຽນໜຶ່ງທີ່ສຳຄັນຄືກັນກັບສົກຮຽນອື່ນທີ່ຜ່ານມາ, ພາຍຫລັງສຳເລັດການສອບເສັງພາກຮຽນທີ I, ພາກວິຊາກົດໝາຍແພ່ງ, ພາກວິຊາກົດໝາຍອາຍາ, ພາກວິຊາລັດຖະສາດ, ພາກວິຊາພົວພັນສາກົນ ແລະ ພາກວິຊາກົດໝາຍທຸລະກິດ ໄດ້ມີການຈັດສົ່ງນັກສຶກສາລົງຝຶກງານໃນສະຖາບັນກ່ຽວຂ້ອງກັບຂະແໜງການຮຽນ ທີ່ໄດ້ຕິດຕໍ່ ແລະ ທາບທາມໄວ້ກ່ອນການສອບເສັງພາກຮຽນທີ I ແລ້ວນັ້ນ. ສະຖານທີ່ລົງຝຶກງານທີ່ບັນດາພາກວິຊາຂອງ ຄນລ ສົ່ງນັກສຶກສາລົງຝຶກງານໄດ້ແກ່ ສຳນັກງານນາຍົກລັດຖະມົນຕີ, ບັນດາກະຊວງ, ອົງການປົກປ້ອງກົດໝາຍ(ສານປະຊາຊົນ, ອົງການໄອຍະການປະຊາຊົນ….) ສຳນັກງານປົກຄອງນະຄອນຫລວງວຽງຈັນ, ຫ້ອງວ່າການປົກຄອງແຂວງ ແລະ ເມືອງ, ອົງການຈັດຕັ້ງສາກົນ, ບັນດາສະຖາບັນ ແລະ ບັນດາບໍລິສັດເອກະຊົນຈຳນວນໜຶ່ງ.

ຈຸດປະສົງຂອງການລົງຝຶກງານແມ່ນ 1.) ເພື່ອໃຫ້ນັກສຶກສາໄດ້ ຮຽນຮູ້ການປະຕິບັດຕົວຈິງ ຫລື ການເຮັດວຽກຕົວຈິງ ແລະ ໄດ້ສົມທຽບການປະຕິບັດກັບທິດສະດີທີ່ໄດ້ຮຽນມາ; 2.) ເພື່ອໃຫ້ນັກສຶກສາໄດ້ຮູ້ທີ່ຕັ້ງ, ພາລະບົດບາດ, ສິດ ແລະ ໜ້າທີ່ລວມທັງໂຄງປະກອບການຈັດຕັ້ງຂອງສຳນັກງານ, ສານປະຊາຊົນ, ອົງການໄອຍະການປະຊາຊົນ, ຫ້ອງວ່າການ ແລະ ອົງການຈັດຕັ້ງສາກົນຈຳນວນໜຶ່ງ; 3.) ເພື່ອໃຫ້ນັກສຶກສາໄດ້ຮຽນຮູ້ການພົວພັນລະຫວ່າງໜ່ວຍງານຕ່າງໆຕາມສາຍຕັ້ງ ແລະ ສາຍຂວາງຢູ່ພາຍໃນ ແລະ ສາກົນ; 4.) ເພື່ອໃຫ້ນັກສຶກສາໄດ້ຮຽນຮູ້ເຖິງລະບົບ ແລະ ວິທີການເຮັດວຽກຂອງອົງການດັ່ງກ່າວ.