ຄະນະພັກຮາກຖານ ຄນລ ຈັດກອງປະຊຸມເຜີຍແຜ່-ເຊື່ອມຊຶມມະຕິກອງປະຊຸມຄັ້ງທີ 7
ໃນວັນທີ 14 ກຸມພາ 2019 ຜ່ານມານີ້ ຄະນະພັກຮາກຖານ ຄະນະນິຕິສາດ ແລະ ລັດຖະສາດມະຫາວິທະຍາໄລແຫ່ງຊາດ ໄດ້ຈັດກອງປະຊຸມເຜີຍແຜ່-ເຊື່ອມຊຶມມະຕິກອງປະຊຸມຄັ້ງທີ 7 ຂອງຄະນະບໍລິຫານງານສູນກາງພັກສະໄໝທີ X, ຂຶ້ນທີ່ຫ້ອງປະຊຸມຂອງຮາກຖານຕົນ, ໂດຍການເປັນປະທານຂອງສະຫາຍ ຮສ. ປອ. ຮຸ່ງເພັດ ຈັນທະວົງ ຮອງເລຂາອົງຄະນະພັກ, ຮອງອະທິການບໍດີ ມະຫາວິທະຍາໄລແຫ່ງຊາດ, ມີສະຫາຍ ຮສ. ວຽງວິໄລ ທ່ຽງຈັນໄຊ ເລຂາຄະນະພັກຮາກຖານ, ຄະນະບໍດີ ຄະນະນິຕິສາດ ແລະ ລັດຖະສາດ, ມີບັນດາສະຫາຍສະມາຊິກພັກ, ພະນັກງານຫຼັກແຫຼ່ງພາຍໃນຮາກຖານດັ່ງກ່າວເຂົ້າຮ່ວມ.
ໃນໂອກາດນີ້, ສະຫາຍ ຮສ. ປອ. ຮຸ່ງເພັດ ຈັນທະວົງ ຮອງເລຂາອົງຄະນະພັກ, ຮອງອະທິການບໍດີ ມະຫາວິທະຍາໄລແຫ່ງຊາດ ໄດ້ໃຫ້ທິດຊີ້ນໍາກ່ຽວກັບຈຸດປະສົງຂອງການເຜີຍແຜ່-ເຊື່ອມຊຶມ ມະຕິກອງປະຊຸມຄັ້ງທີ 7 ຂອງຄະນະບໍລິຫານງານສູນກາງພັກສະໄໝທີ X ໃນຄັ້ງນີ້, ແມ່ນເພື່ອໃຫ້ຄະນະນໍາ, ພະນັກງານຫຼັກແຫຼ່ງໃນຮາກຖານ ຄະນະນິຕິສາດ ແລະ ລັດຖະສາດໄດ້ຮັບຮູ້ ແລະເຂົ້າໃຈກ່ຽວກັບວຽກງານຂອງພັກ ແລະເພື່ອນຳເອົາແນວທາງນະໂຍບາຍຂອງພັກໄປຜັນຂະຫຍາຍໃຫ້ສອດຄ່ອງ ແລະເກີດດອກອອກຜົນ, ພ້ອມນັ້ນສະຫາຍ ຍັງໄດ້ເນັ້ນໜັກໃຫ້ພະນັກງານ, ຄູ-ອາຈານເອົາໃຈໃສ່ວຽກງານແນວຄິດການເມືອງ, ຈັດຕັ້ງປະຕິບັດໜ້າທີ່ຮັບຜິດຊອບຂອງຕົນໃຫ້ສໍາເລັດ, ສ້າງວຽກງານການພັດທະນາໂຄງລ່າງພື້ນຖານ, ເພີ່ມທະວີຄວາມເຂັ້ມແຂງທາງດ້ານວິຊາການ, ວຽກງານຄຸ້ມຄອງງົບປະມານກໍຄືລາຍຮັບ-ລາຍຈ່າຍ, ວຽກງານກໍ່ສ້າງພະນັກງານສືບທອດປ່ຽນແທນ ແລະຕໍ່ຕ້ານການສໍ້ລາດບັງຫຼວງເປັນຕົ້ນ.
ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງມະຕິຂອງຄະນະບໍລິຫານງານສູນກາງພັກ ເລກທີ 057/ຄບສພ, ລົງວັນທີ 9 ທັນວາ 2018 ວ່າດ້ວຍການເພີ່ມທະວີການນຳພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະສ້າງຄວາມເຂັ້ມແຂງຂອງການຄຸ້ມຄອງມະຫາພາກ, ເອກະສານມະຕິຂອງຄະນະບໍລິຫານງານສູນກາງພັກສະໄໝທີ X ເລກທີ 056/ຄບສພ, ລົງວັນທີ 19 ທັນວາ 2018 ວ່າດ້ວຍການປັບປຸງຮາກຖານການເມືອງ ຂອງລະບອບປະຊາທິປະໄຕ ປະຊາຊົນໃຫ້ເຂັ້ມແຂງ ແລະໜັກແໜ້ນ ແລະເອກະສານເຜີຍແຜ່ເນື້ອໃນຈິດໃຈວັນຕ້ານການສໍ້ລາດບັງຫຼວງສາກົນ ຄົບຮອບ 15 ປີ. ຈາກນັ້ນໃນທີ່ປະຊຸມຍັງໄດ້ມີການແລກປ່ຽນຄວາມຄິດເຫັນໃນຄຳຖາມເຈາະຈີ້ມປະເດັນຕ່າງໆຮ່ວມກັນ ເພື່ອຫາທິດທາງ ແລະວີທີແກ້ໄຂບັນຫາຕ່າງໆ.
